Read Masana YEREMIYAS 11 Bible Online

YEREMIYAS 11 - Masana bible

YEREMIYAS 11

¹Yoboyna ma Ma-Vatɗin dum hay vun Yeremiyasna:

²Humgi yoboyna vi bonota kayni, nigi ma dum goyo tam sumuna vi Yuda hiɗi sum sa hay Yerusalemna.

³Naŋ ma disi ala: Lawna vi Israyel di'e: Yoboyna vi bonot kayni sa ma humumɗina nam beɗay goyo.

⁴Yoboyna vi bonota ma nan vulum mi sumaygiya, hay li ma nan kalsi ay goy hay nagat Egipte pa, hay zul ku ma yor kawayna, nan disi ala: Humgi della vanu, ligi kuɗ sle ma nan digit kafna, nala nigi ma muɗ si sumuna vanu, nan ma muɗ mi Lawna vigiya may.

⁵Nala nan ma hob vun va ma nan yum kanu tam sumaygiya, kay vulsi nagata ta miira hiɗi yumda ka riŋ goy haya, ki nigi ka wi vaydi nala. Nala nan hot dit ala: Amen, Ma-Vatɗina.

⁶Ma-Vatɗina di tanu: Siwelaŋ yoboyn kayni kaf goy hay hoyok-ziyna vi Yuda, hiɗi hagana vi Yerusalem kaf, daŋ ala: Humgi yoboyna vi bonota kayni, ligi kuɗumu.

⁷Kay nanu mi sa ma li ɗekka kir sumaygiya, tun caw tam buur ma nan kalsi ay goy hay nagat Egipte pa, ta-ta vaydi, nan ka ɗeksi hay graw culumta kaf, nan ka disi ala: Humgi della vanu.

⁸May nisi min humɗi, nisi min jak humsiɗi, gigekaw tap kuɗ so'otta vi dikam ta joota; nala nan hob vun dita vi bonota kayni kaf katsiya, yoboyna ma nan vulsi hagata kay li kuɗumu, may nisi min li kuɗumɗi.

⁹Ma-Vatɗina di tanu: Ŋra-vunda ka jar sum sa hay Yuda hiɗi sum sa hay Yerusalemna.

¹⁰Nisi hotay hay joota vi sumaysi sa jewna, sumaysi sa min hum dita vanɗina, sa jun tuwsi tam laway mara'a kay girifimu. Jafna vi Israyel hiɗi jafna vi Yuda kus bonota ta jarma'tawa, bonota ta nan juna' hiɗi sumaysiya.

¹¹Kuɗ na'ta Ma-Vatɗin ka di ala: Wulin kayni nan min hin joot co kisiya, nisi as a kal goy loɗi, nisi ma siwel tanu, may nan ma humsi loɗi.

¹²Hoyok-ziyna vi Yuda hiɗi sum sa hay Yerusalemna ma tuɗ yi sem lawayna ma nisi li ɗifin ma no'os talamna, may laway namna ma suɗsi goy vun-zlatɗi.

¹³Kay nigi jafna vi Yuda ka hiɗi lawayn ŋolo, hiɗi hoyok-ziyn ŋolo kaw, kay Yerusalem ka hiɗi giwin-ma-ɗifinna ŋolo, ma mar zulot kisiya ŋray ca ki haga ma haya'na nala, kayni mi giwin-ma-ɗifinna, ma nisi ŋal no'os ma hisna kulo kalamu mi Baal.

¹⁴May naŋu, naŋ ma siɗawan kay sumun kaynɗi, naŋ ma siwel kulo tanɗi, naŋ ma siɗaw tanɗi kaw, kay nan may humsi noŋɗi, la nisi yan senu hay li ma nisi ka vun lawta kaw.

¹⁵Sa hayan kisina lum hay ziyna van kayni mi meloge? Jiw-zlata ta nisi la'ta may ŋaɓɗi, ɗifin ma peldetna ma hay ziyna vigina hinsi yawam goyo, kay hay li ma nigi li jootawa, nigi li firi suwa.

¹⁶Gu-olive ma goɗayna, selem tiya kuɗ jifiyta valamu hiɗi vuɗna valamu. Kayni ti semda ta Ma-Vatɗin vulgiya. May jar suwana ma ŋolla, nam do kut kuɗumu, ɓam-gu namna as gut loɗi.

¹⁷Ma-Vatɗina vi vok-ma-duura, ma pigi gaana yi jootiyawa kaŋu, kuɗ joota ta jafna vi Israyel hiɗi jafna vi Yuda li'e mi tuwsiya, kay nisi ɓulakan dikan, hay li ma nisi li ɗifin ma no'osna tam Baal.

¹⁸Ma-Vatɗina ɗekanawa, nan waawa kaw. Naŋ ɗekanawa kay varta visiya.

¹⁹Nan ay ki goor ɦu-dimi ma ŋal kiliŋ ma nisi tuɗ ŋatam goyna nala, slen ma nisi var kay lum tanu nan may wumɗi. (Nisi di'e): Nay ma ka gun gaa'a hiɗi vuɗna valamu, nay ma yawam goyo hay nagata vi sa irin pa, hin humay gay kay semda valam loɗi.

²⁰May Ma-Vatɗina vi vok-ma-duura mi sa ma ka kitat ɗigere, namu mi ma fek dikga hiɗi glesna, nan wi sla naŋ ma joban yan katsiya, kay nan vul lawta vanawa hay ɓaŋu.

²¹Sum sa hay Anatot sa min ba irita vaŋu, sa ka di ala: Naŋ ma kus yoboyn hay semda vi Ma-Vatɗinɗi, la naɗi naŋ ma mit hay ɓuma'a! Nala sum nisina Ma-Vatɗin ka di tisiya:

²²Kay na'ta Ma-Vatɗina vi vok-ma-duura ka di ala: Wulin kayn fuma tuwma'awa! Sum sa joriyona kew-gaferaŋa ma cisi goyo, guro-jufayna hiɗi guro-boyna visiya mayta ma vatsiya.

²³Sa as hin kuɗsi kep loɗi; kay nan ma hin joota co kay sum sa hay Anatot, hay busata ta nan ma fok kulo kisiya.