Read Masana YEREMIYAS 12 Bible Online

YEREMIYAS 12 - Masana bible

YEREMIYAS 12

¹Ɗigerta vaŋ suwi ŋolo Ma-Vatɗina, kay a nan ka kitat jaran hiɗi naŋu; may nan min lawaŋ kay kita ma naŋ kaamna. Sum sa joona fi slen kayn kay mige? Nisi lakay hay sle'ta ŋal kiliŋ kayn kay mige? Si sum sa di newta.

²Naŋ pisiyawa gaa'a, so'olsi paawa gaa kay nagata, nisi ka wul voksiya, nisi ka vuɗ vuɗna; naŋ ka goboy hiɗi vunsiya, may gine'e hiɗi diksi ma kalaf zulla.

³May naŋu, Ma-Vatɗina, naŋ wanu, naŋ ka ɗuwanu, naŋ fek dikanu vok iraŋu, naŋ ma yawsi goyo ki fok-dimina ma tuɗum ŋat goyna nala, naŋ ma vulsi goyo kay buura vi cita-goyta.

⁴Nagata ma mus hay do'olla nala ta-ta lancitige? Us ma hay fulda ma so goyo su? Kuɗ joota vi sum sa hay nagata, muuriyana hiɗi layayna ka vat goyo, kay nisi di'e: Nam ma wi dabta vaydi.

⁵La naŋ kat tuwaŋ hiɗi sum sa jaŋ hiɗi sesi ɦawana, May nisi suwaŋu, naŋ as ruwa hiɗi kulumayn ɗawn ruwatige? La naŋ musi hay sle'ta kayni hay nagata ta toyt haya'ta tuta, hay li ma niy-lumna Yordan ti kulo ɗawni naŋ ma li linige?

⁶Kay ɓosiyoŋŋa kay tuwsi noŋo, hiɗi jafna vi buŋu di newt kaŋu, nisi ka siwel kaŋu hiɗi delsi kulo ŋolo, naŋ ma vi kuɗsiɗi hay li ma nisi ma di yoboyn ma ŋaana kaŋu.

⁷Nan noy ziyna vanawa goyo, vocota vanu muɗi kiran bisi, na'a ta dikan mina'ta nan vula'awa goy hay ɓam sa gaw kanna.

⁸Vocota vanu muɗi kiranu ki zlona ma hay fulda nala, nisi di delsiyawa katanu, kuɗ kayni nan kaasiyawa gawi.

⁹Vocota vanu muɗi kanu ki layna ma busuwn goɓi talamna nala su? Layayn ma gar tina ka ŋuy katsi su? Tuɗgiya, tokgi muuriya ma hay sinen kafe, maram hay liyn ma tina.

¹⁰Sum sa ŋom farayna ŋolo ka ti sine gulda-guldana van goyo, nisi ka tay sinen gaa'a, sine ma naana vanu nisi ka muɗum goy liyn ma fulu, liyn ma wiŋŋa.

¹¹Nisi muɗumawa goy liyn ma hiweŋŋa; nam ka hay do'olla, nam hini goy hiweŋ vok iranu. Kay nagat kaf hini goy hiweŋ', kay sa may jiɓer kay van kaynɗi.

¹²Hay liy ma ɗiŋiriŋŋa vi fulda kaf sum sa to slen gaana ka co'o, kay kew-gaferaŋa vi Ma-Vatɗina ka ti ɓuraŋi, hay vun liy hena pa ta-ta tam vun liy hena; sle'ta may kay sa kep noŋɗi.

¹³Jaf ma nisi cukum gaana mi alkamarena, may nisi ma feɗem mi jikisna, nisi vul joot mi tuwsiya bay fi va kuɗ kayni. Muɗgi zulo'o hiɗi feɗna vigiya, kuɗ ɦiyda ŋolda vi Ma-Vatɗina.

¹⁴Kayni mi va ma Ma-Vatɗina ka di'e kat sum sa ziyna visi galanu sa varta visi joona, sa yaw kuɗ vocota ta nan ɓurawa' mi sumuna vanu, mi sa Israyella, nan ma yawsis goy hay nagata visi pa, nan ma yaw ziyna vi Yuda goy jarsi pa.

¹⁵May hay li ma nan yawsiyawa goyo, nan ma hot li slugot kisi lo, nan ma hotsiyaya, gigekaw hay vocota valamu valamu, gigekaw hay nagata valamu valamu.

¹⁶La nisi hat hagata vi sumuna vanu, la nisi yi va kisi hiɗi semda van ala Ma-Vatɗin ka iriya, ki nisi hat mi sumuna vanu kay yi va kisi hiɗi sem Baal nala ni, nan ma hot tunsi jar sumuna vanu.

¹⁷May la nisi hum noŋɗi, nan ma yawsi goyo, nan ma yaw jaf-sum nisin goyo, nan ma cisi goyo, din mi Ma-Vatɗina.