Read Masana YEREMIYAS 13 Bible Online

YEREMIYAS 13 - Masana bible

YEREMIYAS 13

¹Ma-Vatɗin ka di yoboyn tan ala: tuɗaŋu, gusaŋ kanti ma barawna, naŋ ma junum furaŋu; may naŋ ma ŋuruɓum goloŋ jar niynɗi.

²Kuɗ dita vi Ma-Vatɗina, nan gus kantina, nan junum furanu.

³Ma-Vatɗina ka di yoboyn tan sem ma ma'na lo ala:

⁴Kanti ma naŋ gusumu junum furaŋŋa naŋ ma yawamu, fokaŋ kulo'o, tuɗaŋ hay gal Eufrata, ɗawni, naŋ ma ŋayam hay baŋana vi hiɗiyna.

⁵Nan kaliya, nan ŋayam goboy hiɗi Eufrata, ki Ma-Vatɗina vul hagat tan nala.

⁶Mus bugol noŋ ca kayni, Ma-Vatɗin di tanu: Fokaŋ kulo'o, tuɗaŋ gal Eufrata, naŋ ma yaw kantina ma nan vulaŋ hagata kay naŋ tuɗ ŋayam ɗawni.

⁷Nan kali gal Eufrata, nan bigiɗ kantina hay liy ma nan ŋayam hayamna, nan yawamiya; may nan ɗuw kayni kantin loɗay goyo, ŋaata valam may loɗi.

⁸Ma-Vatɗina ka di yoboyn tan ala:

⁹Humgi dita vanu: Nan ma ɓulak subur-tuwta vi Yuda goy ɗawni, ki kayn nala kaw, nan ma ɓulak subur-tuwta vi Yerusalem kaw.

¹⁰Sum nisina sa joona sa min kay hum yoboyna vanɗi, sa tuɗ kuɗ so'otta vi diksiya, sa jun tuwsi tam laway hegena, kay girif gaa vok laway namna, sum nisina hinsi muɗ ki kantin lakŋi nala, ŋaata vi kanti namna may loɗi.

¹¹Kay na'ta, ki san jun kantin hay furam nala, nan kaw jun jafna vi Israyel kaf tanu, jafna vi Yuda kaf kaw, kay nisi ma muɗ goy si sumuna vanu, semda vanu, suburta vanu hiɗi ganta vanu. May nisi min humɗi. Din mi Ma-Vatɗina.

¹²Dit kayni naŋ ma disita: Ma-Vatɗina Lawna vi Israyel ka di ala: Dowayn kaf ma li hobay hiɗi vinna. Nisi ma hot dit taŋ ala: Numa kay tuwma may wi ala dowayn kaf ma li hobay hiɗi vinna ɗisu?

¹³Nala naŋ ma hot disi ala: Ma-Vatɗina ka di ala: Sum sa hay nagat kayni nan ma hobsi haysi kafe, muliyan sa ka lakay kay zlamda-mulda vi David, muliyan-sa-ɗifinna, sa jobta, sum sa hay Yerusalem kafna, nan ma ɦoysi hiɗi dolayna.

¹⁴Nan ma kirapsi kulo kat tuwsiya, sumayn hiɗi guron kat tuwsiya, din mi Ma-Vatɗina. Nan ma vi yanɗi, nan ma wi haw saɗi, va ma telan kay cisi goy mayɗi.

¹⁵Humgiya, jakgi humgi kaw, ligi taŋgas loɗi. Kay law kayn mi Ma-Vatɗina.

¹⁶Vulgi gajijit mi Ma-Vatɗina Lawna vigiya, jew a nam hin jufunda co'o, jew a segi ci dugumu kat goorhoyona hay ŋarpita, nigi ma cub haraŋa, may nam ma muɗ goy ŋus-mitta, nam ma muɗum goy ɗugul ma diɓilikŋa.

¹⁷La nigi hum slen kaynɗi, nan ma tiy goy ŋayaya, kuɗ subur-tuwta vigiya; nan ma jaŋ zimiy goyo, iran ma kus zimiya, kay farayna vi Ma-Vatɗina ka kal goy gorvo'o.

¹⁸Daŋ tam mulla hiɗi ca-mulda ala: Lakgi gaa kay nagata! Kay bogorayta vi mulda ta tuni kigita nigawa gaa'a.

¹⁹Hoyok-ziyna vi Negeb vunam dukawa, sa ma malam goy mayɗi. Sum sa hay Yudan kaf kali goy gorvo'o, nisi yaway gorvo noŋ kaf.

²⁰Poŋgi irgi kulo'o, ɗuwgi sum sa may hay gal ma gaa pana, faray ma vulgitna ka arige? Fukunayna ma vulgi suburta ka arige?

²¹Nigi ma di mige hay li ma nan co durgiya? Nigiya si sa hatsiya kay nisi ma ti mul kigiya, tuw-tita ma vigiya ki cata ka puka nala ɗisu?

²²Nigi ma di hay dikgi ɗawn ala van kayni co kigiya kay mige? Van kayni co kigiya kuɗ joota vigi ta suwi dak-dakka, kuɗ na'ta kayni vun sligara vigi ka kusi kulo'o, dubukgi ma to'o kaw.

²³Sa ma wurana as muɗ ɗigiyam su? Zinilla as muɗ tuwam ma ɗoyn su? Nala kaw nigi as kay li ŋaata su? Nigi sa tuwgi vuli goy tam joota?

²⁴Nan ma mersi goyo ki usna dol goy kuɗ simeɗ ma fulla nala.

²⁵Ma-Vatɗina di'e: Kayni mi galla vigiya ma nan ŋaɓam kigina, kay yigi jokanawa goyo, nigi tun vida vigiyawa hay sinda.

²⁶Sligara ma kusuɓi kulo kirgina nan ma yawam goyo, kay nisi ma wi zulota vigiya.

²⁷Nan wi zlata-bulota hiɗi molwota vigiyawa, tuwgi ma muɗi viyuwu kulo kay hiɗiyna, goy hay sinena kaw, nan wi liwista vigiyawa, joot kigiya, sum sa Yerusalem sa por tuwgi goyɗina. Nisi ma vi yigi ir nata loge?