Read Masana YEREMIYAS 14 Bible Online

YEREMIYAS 14 - Masana bible

YEREMIYAS 14

¹Yoboyna vi Ma-Vatɗina ma nam dum mi Yeremiyas, hay liyna vi koɓorona:

²Yuda ka ti do'olla, hoyok-ziyna va'a hini goy ɦawa'a, muɗi jufunu, ɦoy gaa'a, toy gaa kurup'. ciriyna vi Yerusalem ka pat kulo'o may.

³Sa ŋulona cuk sa gurayn gar niyna, sa gurayna tuɗ kel kaara, may nisi fi niy noŋɗi, nisi hotay hiɗi genna visi goy ɦawa'a; cawi zulo yuloŋ', nisi kusuɓ yisiya.

⁴Nagata muni kirna'a, kay niyn may si hay nagat loɗi, sum sa zumna kaw sutaysi toya, nisi kusuɓ yisiya.

⁵Dukga ta fulda kaw, hay li ma na' vuɗawa, na' hin goora va' goy hay fulu, kay hatna mayɗi.

⁶Kuro ma fulla lak kulo kay liy ma jiŋilla, ci simeɗna ki cekemna nala; iram liweka, kay hatn mayɗi.

⁷La jiw-zlata vuma'a li di-goyt kuma'a, naŋ ma li lopo kuɗ semda vaŋu, naŋ Ma-Vatɗina. Kay bay-vida vuma'a ka ŋolo, numa li sulukawa kataŋu.

⁸Naŋu mi cubta-sle'ta vi Israyel, naŋu mi ma su'da visiya hay buur ma lasta, naŋ ma li ki sa ma pulla hay nagat nala litige? Naŋ ma li ki sa ma rogoyna ma co bur buri ɦawa nala litige?

⁹Naŋ ma li ki sa ma wasna nala kay mige? Ki sa ma donona ma asay kay gatmaɗi nala kay mige? May naŋ ka jarma zaw, Ma-Vatɗina. Semda vaŋ ka tuni tuma'a, naŋ ma noyma goyɗi.

¹⁰Kayni mi va ma Ma-Vatɗina dum kay sum nisina: Nisi wi kay jaŋ tani tani, nisi wi yal kay ŋom sesiɗi, nala Ma-Vatɗina min jun hiɗi nisiɗi, humam ka gum wulini kay sulukŋa visiya, nam ka kitat kay sulukŋa visiya.

¹¹Ma-Vatɗina di tanu: Naŋ ma siɗaw kay sumun kaynɗi. Naŋ ma siɗaw kay ŋaat ma fisiyaɗi.

¹²La nisi li laata, nan ma hum siɗawta visiɗi; la nisi li ɗifin ma ŋal-goyna hiɗi vulda tanu, nan ma li firi hiɗi kaynɗi; kay nan min cisi goyo hiɗi kew-gaferaŋa, hiɗi mayta hiɗi bakmarana.

¹³Nan hot dita: Hey! Bum-Sumuna Ma-Vatɗina, saraŋ tige, sa jobta ka disi ala: nigi ma wi kew-gaferaŋaɗi, mayt as figi noŋɗi; may nan ma vulgi sle'ta hay liyn tani. Sle'ta ta gasit noŋo.

¹⁴Ma-Vatɗina hot di tanu: Sa jobta dum hay semda van kayn mi sle ma sinna; nan may cuksi ays noŋɗi, nan may vulsi haga noŋɗi, nan may law va tisi noŋɗi, slen ma vul tuwam kirsina may mi gasiɗi, slen ma nisi dum voksina mi sle ma waana, slen ma nisi dum tigina mi ɗutta vi diksiya.

¹⁵Kuɗ na'ta Ma-Vatɗina di'e: Sum sa jobta sa law hay semda vanu bay nan cuksiya, nisi sa di ala: Kew-gaferaŋa hiɗi mayta ma li hay nagatɗi, sum sa jobta nisina mayta hiɗi kew-gaferaŋa ma vatsi goyo.

¹⁶Sum sa nisi di sle ma vokŋa katsina ma yak gaa'a hay hagana vi Yerusalem. Mayta hiɗi kew-gaferaŋa ma vatsi goyo; sa as kay pisi gaa noŋɗi, nisiɗi, gurona visi sa jufayna hiɗi sa boynɗi kaw, nan ma hotsi ɦiyda visi goy kisiya.

¹⁷Daŋ yoboyn kayn tisi ala: Zimiyna ka jaŋ goy kiranu henjeta hiɗi falayta, nam may tel noŋɗi; kay goor-wayata, goota vi sumuna vanu milla ma ŋolla ma ɓas ŋolla ga'awa.

¹⁸La nan tuɗ goy hay sinena, iran cuk kay sum sa calay kay kew-gaferaŋa, la nan kal hay hoyok-ziyna, iran cuk kay sum sa cimiy kay mayta. Sa jobta hiɗi muliyan-sa-ɗifinna kaw jaŋ hay nagata bay wi liyn ma nisi tuɗ hayna.

¹⁹Naŋ noy Yudawa goyo su? Siyon muɗawa kiraŋ bisi su? Naŋ calma'a bay vulma yerta-goyta nala kay mige? Numa ka cub kay fi sle'ta, may sle'ta may coɗi, numa gar yerta-goyta, may co kuma kayni ti narta ŋolda,

²⁰Ma-Vatɗina, numa wi joota vuma'a, jiw-zlata vi sumayma'a, kay numa li sulukawa kataŋu.

²¹Kuɗ semda vaŋu, muɗma bisɗi, naŋ muɗ zlamda-mulda vi gajijita vaŋ goy waaɗi, yaŋ ma jokɗi, ja bonota vaŋ hiɗi numaɗi.

²²Jar lawayn ma waana, ma si niy ka su? Dukalawn ma vul niyna ka arige? May mi naŋ Ma-Vatɗina Lawna vuma'a ɗisu? Numa ka zamaŋ ɓaŋu, kay naŋu mi ma li slen kayni kafna.