Read Masana YEREMIYAS 15 Bible Online

YEREMIYAS 15 - Masana bible

YEREMIYAS 15

¹Ma-Vatɗina di tanu: la Musus hiɗi Samuel co vok iran kaw, nan ma wi haw sumun kaynɗi. Digiɗsi goy vok iranu, hinsi tuɗa.

²La nisi di ala numa ma tuɗ arige? Naŋ ma hotsi dit ala: Kay mitta, sa nagay mitta; kay kew-gaferaŋa, sa nagay kay kew-gaferaŋa; kay mayta sa, nagay kay mayta; kay gorvota, sa nagay kay gorvota.

³Ma-Vatɗin di'e: nan ma cuk bakmaran ay kuɗ batam fiɗi katsiya; kew-gaferaŋa kay cisi goyo, durnayna kay sabsiya, layay ma dukalawna hiɗi muuriya ma fulla kay jetsi goyo, kay cisi goyo kaw.

⁴Nan ma muɗsi mi va ma narta kuɗumu kay muliyana gaa kay nagat kafe, kuɗ Manase goora vi Ezekiyas, mulla vi Yuda, kuɗ slen ma nam lum hay Yerusalem kafna.

⁵Sa ma as wak hawag mi gige Yerusalem? Sa ma as yorag mi gige? Sa ma as tuɗ vag labara vagu mi gige?

⁶Ma-Vatɗina di'e: Nak noyanawa goyo, nak hotay goy bugolo; may nan meɗ ɓan goy kagu, nan min ɦog gaa'a, nan makawa kay lag slugota.

⁷Nan col hay vun-galana vi hoyok-ziyna, kay sirsi goyo hiɗi simeɗna; nan hinsi goy bay guro'o, nan ci sumuna van goyo, nisi sa min cal goy hay hagata joota visiɗina.

⁸Boy sa duhulla va'a ka ŋolo suw ŋeslna ma goloŋ kel niyna, hay falay calak' nan min mar sa ma ɓulak slena kisiya, nan min mar sa ma ɓulak slena kay sum goor ma joriyona. Nan min gi yorta hiɗi narta gaa kisi koloy wit'.

⁹Na'a ta vuɗ guron sem siɗiyata hini goy ɦawa'a, na' mita; fatta va'a ɗik gaa'a hay li ma liyn ka falay tuwa, na' cawiya, muɗi zulo'o. Nisi sa hinina, nan min vulsi mi kew-gaferaŋa mi sa gawt kisina, din mi Ma-Vatɗina.

¹⁰joot kanu, sumu nak vuɗan kay mige? Sumun hay nagat kaf ka can waya, ka cirepanu kaw. Nan vul va goy balɗi, sli va belɗi kaw, may hiɗi kayn kaf sumun ka ŋulanu.

¹¹Ma-Vatɗina di tanu: Gasiya, naŋ ma fi sle'ta hay voko, gasiya, nan ma li sa ma gawta dono'o kay girifaŋu, hay buura vi joota, hay buura vi lasta.

¹²Kawayna as kus kaway ma gal gaana hiɗi wayna su?

¹³Slena vigiya hiɗi farayna vigiya nan min hinsi vurumumu, kuɗ joota vigiya ta nigi la' hay nagata vigi kafta.

¹⁴Nigiya hiɗi sa ma gawta vigiya, nan min kalgi hay nagata ta nigi may wa'ɗi, kay kuta vi ɦiyda vanu doowa, na' ka ŋal kigiya.

¹⁵Naŋ wi kafe, Ma-Vatɗina, humaŋ ma gaŋ kan gi ge, yaŋ ma jokanɗige. Naŋ ma joban yan tam sa lan lasna. Naŋ ma slan goyɗi, Kay naŋ may muɗ ɦiy koloyɗi. Naŋ ma wi ala nan ziy zulot kayn kuɗaŋ naŋu.

¹⁶Nan yaw yoboyna vaŋawa, nan ligimawa; yoboyna vaŋu vaŋu hoban hayanawa, kay semda vaŋu ka tuni tanu, Ma-Vatɗina, Lawna vi vok-ma-duura.

¹⁷Liyn ma musta vi sa burahta nan may mus hayamu kay firi hiɗi namɗi; may kuɗ donota vaŋu, nan mus goy van kepe, kay naŋ hoban hiɗi ɦiyda.

¹⁸Lasta vanu tuɗ voka' dok-doko kay mige? Milla ma tanna ka ɓasan ŋolo kay mige? Nam min citɗi kay mige? Naŋ min li kanu ki kaara ma so goyo nala kay mige? Ki niyn ma san mulak kuɗumɗi nala kay mige?

¹⁹Kuɗ na'ta Ma-Vatɗina ka di ala: la naŋ hotay tanu, nan ma hotaŋ dita, naŋ ma col vok iranu, la naŋ ɓuraw ir sle ŋaan goy hiɗi sle ma waana, naŋ ma muɗ ki vunan nan nala. Hotay kiraŋ si nisiya, may naŋ hayɗin as hot kirsiɗi.

²⁰Nan ma muɗaŋ vok sumun kayni, ki gulmun ma donona ma kawayn nala; nisi ma duraŋu, may nisi ma kol kaŋɗi, kay nan ka hiɗi naŋu kay suɗaŋ goyo, kay butaŋ goyo, din mi Ma-Vatɗina.

²¹Nan ma butaŋ goy hay ɓam sa joona, nan ma suɗaŋ goy hay ɓam sa waskayna.