Read Masana YEREMIYAS 17 Bible Online

YEREMIYAS 17 - Masana bible

YEREMIYAS 17

¹Sulukŋa vi Yuda ŋray ca ki ɗot ɗoy tam kawayn nala, ki ɓiriy hiɗi vun diyamaŋ ma celɓetna nala; nam ɓiriy hay tablena vi dikgiya, nam ka ɓiriy kulo tam miyok giwin-ma-ɗifinna vigiya.

²Nisi ka var kay giwin-ma-ɗifinna visiya, hiɗi laway ma waana Astarte* ma goboy hiɗi gu ma goɗayna, kulo kay liy ma ɗiŋiriŋŋa kaw, ki nisi ka var kay gurona visi nala kaw.

³hiɗiyta vanu hiɗi sinena va'a, farayna vigiya, slena vigi noŋ kafe, hiɗi liyna vigi ma ɗiŋiriŋŋa noŋ kaf nan min hinsi vurumumu, kuɗ jiw-zlata ta nigi la' kay yam nagata vigi kafta.

⁴Vocota ta nan vulgiya nigi ma ba' goyo kuɗ joota vigiya; nan min ligi gorvo hay ɓam sa gawt kigina, hay nagata ta nigi may wa'ɗi; kay nigi do kuta vi ɦiyda vanawa, kut na'ta ma ŋal dok-doko.

⁵Ma-Vatɗina ka di ala: Be'da ka kay sa ma tun vida valam hay sana, be'da ka sa ma tun vida valam hay sliwna, may dikam cali goy gine'e hiɗi Ma-Vatɗina.

⁶Nam ki gu-zigiyna hay fulda nala, iram may wi ŋaat co noŋɗi; nam mus hay liyn ma ŋalay goyna vi fulda, nagata ta yolla ta ziy hayɗi.

⁷Bolda ka kay sa ma tun vida valam hay Ma-Vatɗina, sa ma cubta-sle'ta valamu mi Ma-Vatɗina.

⁸Nam ki guna ma piy goboy hiɗi niyna nala, ma cuk so'olom goy jar niy-ma-riŋŋa; hay li ma zalla co'o nam may wumɗi, humam hin dok-dok goɗiya; kay busata vi koɓorona, narta may hay dikam noŋɗi, nam vuɗ jaf dok-doko.

⁹Dikga vi san guni suw slen kaf, na' joo ŋolo kaw, sa ma as kay wa'a mi gige?

¹⁰Nanu Ma-Vatɗina, nan fek dikga, nan fek glesna, kay vul mi gige kuɗ poyta valamu, kuɗ vuɗna vi lopna valamu.

¹¹Ki ceketa esl se ma na' gumɗin nala, sa ma fi farayn hiɗi hagata ta bay-ɗigerta kaw nam nala; jar buura valamu nam ma hinimu, hay dabta nam muɗ mi sa ma ɦoyaya.

¹²Namu mi zlamda-mulda vi gajijita, ini kulo hay tun cawta pa. Mi liy ɗifin ma peldetna vaya.

¹³Naŋu mi cubta-sle'ta vi Israyel, naŋ Ma-Vatɗina. Nisi kaf sa noyaŋ goyo ma muɗ zulo'o, nisi sa cal goy gine hiɗi nanu, sesi ma ɗoys gaa kay nagata. Kay nisi noy Ma-Vatɗina kaar ma law niy ma irinawa goyo.

¹⁴Yeran goyo Ma-Vatɗina, nala nan ma yer goyo, suɗan goyo, nala nan ma suɗ goyo; kay naŋu mi gajijita vanu.

¹⁵Humaŋu nisi ka dan ala: yoboyna vi Ma-Vatɗina ka arige? Hinim vunam hob tige!

¹⁶May nanu, kay humaŋ vunaŋu, nan may tel tuwan kay muɗ goy sa ma ŋomda bugolaŋɗi, nan may gar buur ma tuw-tita namna zawnɗi, ki naŋ wi nala. Sle ma kal goy hay vunanu ka vok iraŋ haraŋ lak'.

¹⁷Naŋ ma lin mi ma vulan nartaɗi, naŋu, liyn ma ŋayna vanu hay buura ma joona.

¹⁸Hin sum sa lan lasta muɗ zulo'o, hinan nan muɗ zuloɗi, hinsi tuwsi visi bat-bat', nan hayɗin hinan tuwan van bat-batɗi. Hin buura vi joota co kisiya, naŋ ma watsi hiɗi bakmaran sem ma'.

¹⁹Ma-Vatɗina ka di tan ala: Tuɗaŋu, colaŋ hay vun-galana vi gurona vi sumuna, vun-galana ma muliyana vi Yuda kaf jik hayamna, naŋ ma li nala tam vun-galana vi Yerusalem kafe.

²⁰Naŋ ma di tisi ala: Humgi yoboyna vi Ma-Vatɗina, muliyana vi Yuda, nigi sum sa hay Yuda kafe, nigi sum sa hay Yerusalemna kafe, nigi sa jik hay vun-galan tani.

²¹Ma-Vatɗina ka di ala: ligi ŋali hiɗi ciwta vigiya; nigi ma ziy jak hay buur ma sabatna loɗi, nigi ma jikim hay vun-galana vi Yerusalem loɗi.

²²Jakŋ ma vo hay ziyna vigiya nigi ma yawam goy hay buura vi sabatna loɗi, ligi lop hay buur namna loɗi. May ligi buura vi sabatna goy peldete, kay nan vul hagata tam sumaygi nala.

²³Nisi min humɗi, nisi min jak humsiɗi; nisi so dekdelsi goyo, kay hum loɗi, kay vi gatta loɗi kaw.

²⁴Ma-Vatɗin di'e: La nigi humanu, la nigi kal jakŋa hay vun galana vi hoyok-ziyn tani hay buura vi sabatnaɗi, la nigi li buura vi sabatn goy peldete, la nigi li lop mara hay buur namna noŋɗi,

²⁵nala muliyana hiɗi sa yerimana, sa lakay kay zlamda-mulda vi David, ɓey kay kekena hiɗi kulumayna, nisiya hiɗi sa yerimana visiya, sum sa hay Yuda hiɗi sa hay Yerusalemna ma jik hay hay vun-galan tani, hoyok-ziyn tani sumun ma lak ziy hayam dok-doko.

²⁶Nisi ma may goy hay hoyok-ziyna vi Yuda hiɗi ziy ma ŋuyi tam Yerusalem kafna pa, hay nagata vi Benyamin, hay lokŋa, hay hiɗiyta vi gal ma kayamna pa, kay mar ɗifin ma ŋal-goyna hiɗi faray ma ŋatna, kay mar vulda hiɗi ɗifin ma no'osna, kay li ɗifinna vi lop ma slugona hay ziyna vi Ma-Vatɗina.

²⁷May nan vulgi hagata ala: nigi li buura vi sabatn goy peldete, kay nigi ma ziy jakɗi, kay nigi ma jik jakŋa hay vun-galana vi Yerusalem hay buura vi sabatnɗi, la slen cani hay li ma nigi min humumɗi, hay na'ta nan ma do kut kuɗ vun-galana vi hoyok-ziyna, nam ma ŋal ziy ma mulda vi Yerusalem, nam ma tew noŋɗi.