Read Masana YEREMIYAS 18 Bible Online

YEREMIYAS 18 - Masana bible

YEREMIYAS 18

¹Ma-Vatɗina ka di yoboyna valam tam Yeremiyas hiɗi dit ala:

²Fokaŋ kulo'o, tuɗaŋ hay ziyna vi sa ma in dowayna; ɗawni nan ma daŋ yoboyna vanu.

³Nan kali hay ziyna vi sa ma in dowayna, nan fi kayni, nam ka li kulo kay guɓuna.

⁴Doway ma nam inimna ɓulak goyo, ki naga-dirginna ɓulak hay ɓam sa ma in dowayn nala. Nam kot in doway mara'a, ki nam fi kayni kiram ŋaa'a kay li'e nala.

⁵Ma-Vatɗina hot di yoboyn tan ala:

⁶Nan as li tigiya ki sa in dowayn kayni li nala ɗisu? Nigi jafna vi Israyel? Din Ma-Vatɗina. Nigi ka hay ɓan kayni ki dowayna hay ɓam sa ma in dowayna nala, nigi jafna vi Israyella.

⁷Hay li ma nan di va'a, kay jaf-sumuna, kay mulda, kay pat sle hen goyo, kay ka sle hen goyo, kay ɦo sle hen gaa'a;

⁸may jaf-sum nisina sa nan di slen kisina, hin joota visi goyo, nan ham kay joota ta nan var kay li tisiya.

⁹Lo hay li ma nan di va'a kay jaf-sumuna, kay mulda, kay in slen kulo'o, kay pi slen gaa'a;

¹⁰may la jaf-sum nisina li slen ma joona vok iranu, min human vunanɗi, nan ham kay ŋaata ta nan var kay la' tisita.

¹¹Wulini naŋ ma di tam jafna vi Yuda hiɗi sum sa hay Yerusalemna ala: Ma-Vatɗin ka di'e: Humgiya, nan ka kot joot kigiya, nan ka var kay li va tigiya. Hotgiyay bugolgiya tam hagata joota vigiya, muɗgi varta vigiya hiɗi lopna vigiya.

¹²May nisi di'e: Kayn goy ɦawa'a. Kay numa min tap kuɗ varta vuma'a, numa li ɗawni, gigekaw tap kuɗ varta joota vi dikamu.

¹³Kuɗ kayni Ma-Vatɗina ka di ala: Jobgi labara vun jaf-sumun tige. Sa ma bay hum labar kayni mi gige? Goor-wayata vi Israyel li sle ma liwisnawa suw asa.

¹⁴Niy-mogoyna ma hay Libaŋ as hin hiɗiy ma hay sinen goy su? Lebo niy ma sleɗna hiɗi niy-ma-riŋŋa, ma may goy gine pana as so goy su?

¹⁵May sumuna vanu yisi jokanawa, nisi li ɗifin ma no'osna tam lawayn ma waana; nisi muɗi tulur hay poyta visiya; muɗi cal goy hay haga ma jewna, kay tuɗ hay haga ma gurayna, haga ma koti goyɗina.

¹⁶Nisi muɗ nagata visi goy ti nagata ta hini goy ɦawata, Sum sa jik hayn kaf muɗi ɦuyum', nisi gila yisiya.

¹⁷Ŋray ca ki simeɗ ma may gal kuɗuwn pa nala, nan ma munsi goy vok sa ma gawta; nan ma muɗ ŋoran tisiya, nan ma ɗuwsiya hay buura vi lasta visiɗi.

¹⁸Nisi di'e: nigiyaya, pay lawt kay Yeremiyas, kay la mul-ma-ɗifin mayɗi kaw gatta as vat goyɗi, la sum sa yalla sayɗi kaw ɗek-yalda as vatɗi, la sa jobta sayɗi kaw yoboyn as vatɗi. Nigiyaya, cayt goy hiɗi vunaya, ɓakŋa valam kaf lakŋi nay ma tun ŋalda vay kalamɗi.

¹⁹Human humge, Ma-Vatɗina, humaŋ del sum sa gaw kanna.

²⁰Joot as hot kay baŋal ŋaata su? Kay nisi jugoɗ zullawa kay yaw irita van goyo. Humaŋ ma gaŋ gi ge, nan coli kulo vok iraŋu, kay jobaŋ kisiya, kay naŋ ma yaw ɦiyda vaŋ goy kisiya.

²¹Kay na'ta vulaŋ gurona visi goy tam mayta, cisi goyo hiɗi kew-gaferaŋa; hin boyna visi goy bay guro'o, hinsi muɗ duhulu kaw, hin jufaysi mit goyo kay moyna; hin kew-gaferaŋa cal guro-joriyona visi goy vun duura.

²²Hin tiyn pat kulo hay ziyna visiya, hay li ma naŋ ma cuk sum sa tisi ɓuraŋŋa kisi koloy wit', kay nisi jugoɗ zuldawa kay gan gaa haya'a, nisi gan jawtawa gaa gayanu.

²³May naŋu Ma-Vatɗina, naŋ wi law ma nisi pum kanu kay can goyna kafe; naŋ ma vul gida kay jiw-zlata visiɗi, ɦas sulukŋa visi goy vok iraŋɗi, hinsi yak gaa'a vok iraŋu, naŋ ma li katsiya hay buur ma ɦiyda vaŋu.