Read Masana YEREMIYAS 19 Bible Online

YEREMIYAS 19 - Masana bible

YEREMIYAS 19

¹Ma-Vatɗina ka di ala: Tuɗaŋu, gusaŋ doway nagana kep hay ɓam sa ma kot dowayna, yawaŋ sum sa maariyana vi sumuna hiɗi sa maariyana vi muliyan-sa-ɗifinna kuɗaŋu.

²Tuɗaŋ hay lokŋa vi Ben-Hinnom, ma ka vun liy ma in dowayna, ɗawni naŋ ma siwel yoboy ma nan daŋgina.

³Nan ma disi ala: Humgi yoboyna vi Ma-Vatɗina, nigi muliyana vi Yuda, nigi sum sa hay Yerusalemna. Ma-Vatɗina vi vok-ma-duura, Lawna vi Israyel ka di ala: Humgiya, nan min hin joot co'o kay liyn tani, sum sa hum labara vi joo na'ta kaf na' ma ŋelsi humsiya.

⁴Nisi noyanawa goyo, nisi muɗ liyn tanawa liwisi, nisi li ɗifin ma no'osnawa tam lawayn mara'a, lawayn ma nisi kay tuwsi may wumɗi, sumaysi wumɗi, muliyana vi Yuda wumɗi kaw, liyn tani nisi hobomawa hiɗi busuw ma bay joota;

⁵nisi in liyn ma ɗiŋiriŋŋawa tam Baal, kay ŋal gurona visi goy hay kuta ki ɗifin ma ŋal-goyna tam Baal, kayni may mi va ma nan vulsi hagat kalamɗi, va ma nan may disi kalamɗi kaw, va ma varta vanu may var kalam noŋɗi kaw.

⁶Ma-Vatɗina di'e: Kuɗ na'ta kayni buur ka tuɗay ɗaw, hay buur namna ɗawni liyn tani ma yum ala Tofet hiɗi lokŋa vi Ben-Hinnom loɗi, may ma yum ala lokŋa vi cimta-goyta.

⁷Ŋra-vunda vi Yuda hiɗi Yerusalem nan ma vata' goyo hay liy namna; nan ma cuksi gaa vok sa gawt kisina hiɗi kew-gaferaŋa, hiɗi ɓam sum sa min ba irita visiya; tuwsi ma mitina nan ma vulum goy a ti'e mi layayn ma dukalawna hiɗi muur ma kay nagata.

⁸Hoyok-ziy namna nan ma muɗum goy mi liyn ma hiweŋŋa, hiɗi liyn ma sumun cen kuɗumu; nisi kaf sa jik goboy hiɗi liy namna ɗawni ma muɗ ɦuyum', ma feɗ kuy-kuy' kuɗ bakmara ma fumna.

⁹Nan ma lisi a nisi mut sliw guro sa jufayna hiɗi guro-boyna visiya segena ma mut sliw segena, jar yorta hiɗi lasta ta sa gaw kisina hiɗi sa min (ba) irita visiya min li tisiya.

¹⁰Bugolda naŋ ma to dowayn goyo vok ir sum sa tuɗis kuɗaŋu.

¹¹Naŋ ma di tisi ala: Ma-Vatɗina vi vok-ma-duura ka di'e: Sumun tani hiɗi hoyok-ziyn tani nan ma tosi goy ɗawn ki kayn nala, ki sa ma in dowayta to dowayt goyo, bugolda doway na'ta hot jak kulo loɗi nala. Sum sa mitina nisi ma pisi hay Tofet kay liyn ma pi sumun may loɗi.

¹²Ma-Vatɗin di'e: Nan ma li slen ki kayn nala kat liyn tani hiɗi sum sa hayamna, hoyok-ziyn tani nan ma muɗum ŋray ca ki Tofet nala.

¹³Ziyna vi Yerusalem hiɗi ziyna vi muliyana vi Yuda ma muɗ liwisi ki liyna vi Tofet nala, ziyn kaf ma nisi li ɗifin ma ŋal-goyna kulo kalamu tam vok-ma-duura vi dukalawn kaf, ma nisi li ɗifin ma yamam goyna tam lawayn mara'a kulo kalamna kaw.

¹⁴Yeremiyas hotay bugolomu hay Tofet pa, hay liyn ma Ma-Vatɗin gum haya kay di vun-jobta. bugolda nam col hay wur-daŋŋa vi ziyna vi Ma-Vatɗina, nam di tam sumun kaf ala:

¹⁵Ma-Vatɗin vi vok-ma-duura, Lawna vi Israyel ka di ala: Humgiya, hoyok-ziyn tani hiɗi hoyok-ziy ma juni kuɗumna kaf nan min hin joota ta nan di ka'ta co kalamu, kay nisi so dekdelsiyawa goy yiŋ-yiŋ', nisi min hum yoboyna vanɗi.