Read Masana YEREMIYAS 20 Bible Online

YEREMIYAS 20 - Masana bible

YEREMIYAS 20

¹Paskur, goora vi Immer, mul-ma-ɗifinna, sa ma ŋolla vi ŋomda vi slen hay ziyna vi Ma-Vatɗina kaw, humam hum Yeremiyas ka di vun-jobta hiɗi slen cani,

²Paskur ci Yeremiyas ma jobta til', nam gum daŋgaya hay ziyda vi Ma-Vatɗina, hay vun-gala ma ŋolla vi Benyamin.

³May hay buurta ka'ta, Paskur gi Yeremiyas ay goy hay daŋgayna. Yeremiyas dumu: Semda ta Ma-Vatɗin vulaŋu may ti semda vi Paskur loɗi, may semda vaŋ joki ala Magor-Misabib.[5]

⁴Kay Ma-Vatɗin ka di ala: Humaŋu, nan ma vulaŋ goy tam hiwirta, naŋu hiɗi boniyoŋŋa kaf; kew-gaferaŋa vi sa gaw kisin ma calsi goyo, iraŋ ma wisiya. Sum sa hay Yuda kafe nan ma vulsi goy mi mulla vi Babilon, nam ma narsi gorvo hay Babilon, ma calsi hiɗi kew-gaferaŋa.

⁵Faray ma hay hoyok-ziyn namna nan ma vulum goyo, vuɗna vi lopna visi kafe, sle ma ŋaa ma hayamna kafe, farayna vi muliyana vi Yuda kaf nan ma vulum hay ɓam sa gaw kisina, sa gawta ma vurumsiya, ma yawsiya, ma narsi hay Babilon.

⁶Naŋu Paskur hiɗi nisi kaf sa lak hay ziyna vaŋu kaw, nigi ma kal goy gorvo'o, naŋ ma kal hay Babilon, ɗawni naŋ ma mita, nisi ma paŋ ɗawni, naŋu hiɗi boniyoŋŋa kaf sa naŋ disi vun-jobta ta sinda.

⁷Naŋ ɗutanawa, Ma-Vatɗina nan hin tuwanawa ɗuta; naŋ vanawa, naŋ kolawa kanu. May buurta kaf sumun ka cen kuɗanu, sumun kaf ka burahanu.

⁸Kay la nan tun caw lawa, ŋaata nan siwel hiɗi delan kulo ŋolo, nan ka siwel kay ɦawlata hiɗi curoɗa, may yoboyna vi Lawna muɗi kanu hay buurta kaf, ki va ma zulo kuɗumu hiɗi va ma sa cen kuɗumu nala.

⁹La nan di ala nan min di va kalamɗi, nan min yum selem kuloɗi, nam ka vidikan dikanu ki kuta-ŋalta nala, nam ka kali jar zokanu, nan so tuwan kay telemu, may nan asɗi.

¹⁰Kay nan hum yoboy ma joon vun sumun ŋolo; narta hay liyn kafe, pigi lawt kalamu, nay ma pi lawt kalamu. Nisi kaf sa ay lakay hay sle'ta hiɗi nanu ka sara la nan geɗa klasige. La nam hin tuwam ɗut klasige, nala nay ma kol kalamu, nay ma job yay talamu.

¹¹May Ma-Vatɗina ka hiɗi nanu, ki sa ma dono ŋolla nala, kuɗ kayni nisi sa lan lasi ka geɗa, nisi ma kol kanɗi kaw. Nisi ma hob hiɗi zulota kay nisi may kolɗi, muɗ ɗawni ti zulota vatɗita ta yam sa as jok ka'ɗita.

¹²Ma-Vatɗina vi vok-ma-duura wak sa ma ɗigera, nam fek glesna hiɗi dikga, naŋ ma job yaŋ katsiya, kay nan hin tuwan hay ɓaŋu,

¹³gigi nul tam Ma-Vatɗina, suburgi Ma-Vatɗina, kay nam but ciwta vi sa ma vun lasta goy hay ɓam sum sa joona.

¹⁴Be'da-goyta kay buur ta nan vuɗ haya'ta, buur ta sun vuɗan haya'ta, bolda ma li ka'ɗi.

¹⁵Be'da-goyta kay sa ma tuɗ labar tam bunu, kay hobom hayam hiɗi firit ala: Cata vaŋ vuɗaŋ goor ma jufawa.

¹⁶San kayni ma li ki hoyok-ziyna ma Ma-Vatɗina tom goyo bay kir-hawta nala li ge, hinim hum tiyna hay graw culumta, tiyna vi duura hay falayt may humge.

¹⁷Nisi may can goy kalaf hay sunɗi kay mige? Hay sun ma kalafna may muɗ ki zul ma panna nalaɗi kay mige? Na' ba hiɗi haynɗi kayn kay mige?

¹⁸Sun vuɗan goyo kay wi lasta hiɗi tuw-tita kayn kay mige? Kay vat buura van jar zulota kayn kay mige?