Read Masana YEREMIYAS 22 Bible Online

YEREMIYAS 22 - Masana bible

YEREMIYAS 22

¹Ma-Vatɗina ka dan ala: Tuɗaŋ hay ziyna vi mulla vi Yuda, ɗawni naŋ ma di dit kayni.

²Naŋ ma dum ala: Humaŋ yoboyna vi Ma-Vatɗina, naŋ mulla vi Yuda, naŋ ma ka musi hay zlamda-mulda vi David, naŋu, sa sunda vaŋu hiɗi sumuna vaŋu sa jik hay vun-galan tani.

³Ma-Vatɗina ka di ala: ligi ɗigerta hiɗi gasita, sa ma sumun ka yaw slen kalamna nigi ma butum goyo, sa ma pulla nigi ma curoɗomɗi, sa ma kuyunɗi, cata duhultaɗi kaw, ligi waskaytɗi, busuw ma bay li joota nigi ma ɦokom goy hay liyn tanɗi kaw.

⁴Kay la nigi li kuɗ dit kayni, muliyana sa lakay kay zlamda-mulda vi David ma cuk hay vun-galana vi ziyd zawni, ɓey kulo kay keke-ma-duura hiɗi kulumayna, nisiya, sa sunda visiya hiɗi sumun kaf.

⁵Ma-Vatɗina hot di'e: Nan yi va kanu hay semda van ala: la nigi hum yoboyn kaynɗi, ziyd zawni ma ɓulak goyo.

⁶Kay Ma-Vatɗina ka law kay ziyda vi mulla vi Yuda ala: Naŋu kiranu ki Galaad nala, ki sin-hiɗiyta vi Libaŋ nala; may nan ma muɗaŋ goy mi ful ma wiŋŋa, ki hoyok-ziyna ma sa may hayɗi nala.

⁷Nan ka kot sum sa ɦo hoyok-ziyn gaana, gigekaw hiɗi sle-ma-duura valamu valamu, gu-gamna vigi ma ŋaa'a ŋolla nisi ma ɦom gaa'a, ma cukum hay kuta.

⁸Jaf-sumun ŋolo ma jik kat hoyok-ziyn tani, nisi ma di jar tuwsi ala: Ma-Vatɗina li slen nala kat hoyok-ziyn kayni kay mige?

⁹Sumun ma hotsi dit ala: kay mige bonota ta jarsi hiɗi Ma-Vatɗina Lawna visiya nisi noya' goyo, kay mige nisi kali girif gaa vok lawayn hegena, sunumu kaw.

¹⁰Tiygi kay sa ma mitina noŋɗi, yorgi tuwgi kalamɗi kaw; may tiygiya, tiygi kay sa ma min kala, kay nam ma hotay loɗi, nam ma wi naga ta nam vuɗ haya'ta loɗi.

¹¹Kay kayni mi slen ma Ma-Vatɗina dum kay Sallum goora vi Yosiyas, mulla vi Yuda, ma ka ti mul hay baŋal Yosiyas, bulumu, ma kal goy hay liyn tani pana; nam ma hotay hayam loɗi;

¹²may nam ma mit hay liyn ma nisi kalam gorvo hayna, nam ma wi nagat tan loɗi.

¹³Joot kay sa ma in ziyna valamu hiɗi hagata bay-ɗigerta, joot kay sa ma kot ziy-gurayna valamu hiɗi hagata gunita, joot kay sa ma wurak sugolomna ma lum lopnaɗina, vulum gurjuɗi kaw.

¹⁴Sa ma di ala: nan min in ziy ma ŋulona, nan min in ziy ma hayam hiriŋ-hiriŋ', nan min kot fenetren kiramu, ŋuyum tuwam hiɗi gu-gamna, nan min korom tuwam slaw cutut'.

¹⁵Naŋ min ti mulda kayni kay dikaŋ ma min gu-gamna su? Buŋu ay ti'e, ci'e kaw ɗisu? May nam li ɗigerta hiɗi gasita, may nam ay musi sleɗe.

¹⁶Nam ay ka kitat hay liya'a kay sa ma hawna hiɗi sa ma vun curo'da, may nam ay musi sleɗe. Kayn ɗek ala nam wanu ɗisu? Din mi Ma-Vatɗina.

¹⁷May naŋu, iraŋu hiɗi dikaŋ ka cani kay li sle ma haramna, kay ɦok busuw ma bay li joot goyo, kay curoɗ sumuna, kay li waskayta.

¹⁸Kuɗ kayni, Ma-Vatɗina ka law kay Yoyakim, goora vi Yosiyas mulla vi Yuda ala: Nisi ma tiyim ala: yayya ɓasunna, yayya ɓasunta loɗi, nisi ma tiyim ala: yayya mulla Yayya kumagini! Loɗi.

¹⁹Pita valam ma li ŋray ca hiɗi pita vi kurona. Nisi ma sabamu, gum goy gine hay vun-galana vi Yerusalem.

²⁰Jikaŋ kulo kay hiɗiya Libaŋ siwelaŋu, siwelaŋ delaŋ kulo ŋolo kay hiɗiyt Basan, siwelaŋ kulo ŋolo kay hiɗiyt Abarim. Kay nisi kaf sa ay minaŋu ciy goyo.

²¹Nan law taŋu hay li ma naŋ ka hay lasta, may naŋ di ala naŋ min humɗi. Naŋ li ki kayn nala hay joriyota vaŋ pa; naŋ min human delanɗi.

²²Sa ŋomda vaŋ kaf simeɗn ma dolsiya, nisi sa minaŋu ma kal goy gorvo'o, nala naŋ ma hin hay zulota, hay tiwinta.

²³Naŋ ma musi kulo kay Libaŋ, ma tokosayna vaŋ ka tuni kulo hum gu-gamna, naŋ ma yor sem gaage hay li ma tuw-tita ma co kaŋu. Tuwtita ta ŋray ca ki cata ta ka puka nala.

²⁴Ma-Vatɗin di'e: nan ka iriya. La Yekoniya goora vi Yoyakim mulla vi Yuda muɗ ki wayta ta ga' hay cita-ɓam ta jufta nala kaw, nan as patam goyo.

²⁵Nan ma vulaŋ goy hay ɓam nisi sa min irita vaŋu, nan ma vulaŋ hay ɓam sum sa tuwaŋ vaŋ voksi bat-bat', hay ɓam Nebukadnesar, mulla vi Babilon, hay ɓam sum sa Kaldeena.

²⁶Naŋu hiɗi suŋ ta vuɗaŋga, nan min gigi irgi hay naga tara'a ta nigi vuɗ haya'ɗi, nigi ma mit ɗawni;

²⁷may nagata ta diksi tisi kay hot haya'ta, nisi ma hot haya'ɗi.

²⁸Yekoniya namna ki doway ma muɗi bis nala su? Ki doway ma toy goyo nala su? Ki va ma tekɗi nala su? Namu hiɗi jafna valamu? Irsi giy goyo hay nagat ta nisi wa'ɗita kayn kay mige?

²⁹Nagata, nagata, nagata, humag yoboyna vi Ma-Vatɗina:

³⁰Ma-vatɗina ka di ala: San kayni nigi ma ɗom selem jar sum sa gurona valam sayɗina, ki sa ma buura valamu ma li dak-dakɗi nala, kay jar gurona valamu kep kaw as mus mulda vi Davidɗi, as ti mul hay Yudaɗi kaw.