Read Masana YEREMIYAS 23 Bible Online

YEREMIYAS 23 - Masana bible

YEREMIYAS 23

¹Joot kay sa ŋomda sa ci fukunay ma hay farana van goyo, merem goy kaw, Din mi Ma-Vatɗina.

²Kayni ti dita vi Ma-Vatɗina, Lawna vi Israyel, dita ta nam da' kay sa ŋom sumuna valamu: Nigi mer fok-dimina vanawa goyo, nigi digiɗimawa goyo, nigi min kotom tuwamɗi; kuɗ kayni nan mi watgiya, kuɗ joota vi lopna vigiya, din mi Ma-Vatɗina.

³Caw fok-dimina van ma hinina, nan ma tapam yalamu ay goy hay naga ma nan merem goy hayna pa; nan ma naram hay ciŋana valamu, nam ma vuɗa, biya jafna kaw.

⁴Nan ma tun sa ŋomda kalamu kay ŋomomu; nam ma li nar loɗi, tuwam ma wirimɗi kaw, mara ma kiɗa goy kuɗumɗi kaw, din mi Ma-Vatɗina.

⁵Humgiya, buura ka ma'a, mi buura ma nan ma fok jaf ma ɗigera kulo hay jafna vi David; nam ma ti mulda, ma muɗ ŋol kaw, nam ma li ɗigerta hiɗi gasita hay nagata.

⁶Hay liyna valam ɗawni, Yuda ma suɗ goyo, Israyel ma lak hay sle'ta hay nagata visiya; kayni ti semda ta nisi ma yum hiɗi na'ta: Ma-Vatɗina, ɗigerta vuma'a.

⁷Kay na'ta Ma-Vatɗin di'e: Buura ka tuɗay ɗaw, hay buur namna ɗawni, a nisi ma di ala Ma-Vatɗin ka iriya, namu mi ma yaw gurona vi Israyel ay goy hay Egipte pana, nisi ma di nala loɗi.

⁸May nisi ma di ala: Ma-Vatɗin ka iriya, namu ma kal jafna vi Israyel hay nagata ta gal gaata; ma hotsiyaya kaw, namu ma hotsiyay hay nagata ta nan digiɗsi goy haya' kafta pa, nisi ma hot lak hay nagata visiya.

⁹Law kat sa jobta. Dikan ɓulakiya hayan kalafi, zokan kaf ka wira; nanu ki sa ma ɦoyayna nala, nanu ki sa ma liŋiriy ki dolayna nala, kuɗ Ma-Vatɗina hiɗi yoboyna valam ma peldetna.

¹⁰Kay nagata hobay hiɗi zlata-bulota, nagat ka hay do'olla kuɗ be'da, liyn ma hatna hay fulda soy goyo, nisi jaŋ tam joota, donota visi ka kayn kay li jiw-zlata tuta.

¹¹Sa jobta hiɗi muliyan-sa-ɗifinna vunsi duguniya, kalaf hay ziyna van noŋ kaw nan fi jiw-zlata visiyawa, din mi Ma-Vatɗina.

¹²Kuɗ kayni hagata visi ma muɗ sli zlaraŋgadaya, jufunu kaw, san ma zutsiya, nisi ma yak gaa'a, kay nan ma hin joota co kisiya, hay busat ta nan ma watsiya, din mi Ma-Vatɗina.

¹³Jar sa jobta vi Samariya, nan wi sle ma dab sem sanna; nisi di vun-jobta hay sem Baal, nisi viy sumuna van sa Israyella goyo.

¹⁴May jar sa jobta vi Yerusalem iran wi sle ma liwisna; nisi li zlata-bulota, nisi poy hay sinda, nisi vul donot mi sa li joona, kay sa hot bugolom tam joota valam loɗi; nisi kaf ŋray ca ki Sodoma nala vok iranu, sum sa hay Yerusalem ŋray ca ki Gomora nala.

¹⁵Kay na'ta Ma-Vatɗina vi vok-ma-duura ka law kay sa jobta ala: Nan min hobsi haysi hiɗi goyo-goyna, nan ma vulsi niy ma galakŋa a ci'e, kay liwista mer goy hay nagat kaf kayni kuɗ sa jobta hay Yerusalem.

¹⁶Kayni mi va ma Ma-Vatɗina vi vok-ma-duura dumna: Sa jobta sa ka di vun-jobta tigina nigi ma hum dita visiɗi, nisi dum mi sle ma waa ma ɗutgi goyna, nisi dum mi sle ma diksi varamna, may mi sle ma may goy vi Ma-Vatɗinɗi.

¹⁷Nisi di tam sum sa ɗuwan birek-cekŋa ala: Ma-Vatɗin di ala: Nigi ma fi sle'ta, tam sumun kaf sa tap sle ma diksi varamna, nisi disi ala: Va ma joo as co kigiɗi.

¹⁸Sa ma kal mus hay ŋra-vunda vi Ma-Vatɗina kay ɗuwa, kay hum yoboyna valam kaw mi gige? Sa ma jak humam tam yoboyna valamu, humumawa kaw mi gige?

¹⁹Hay li ma simeɗ ma biwna vi Ma-Vatɗina co'o, ɦiyda valamu kal goyo, co ɗawni mi biira, nam wat gaa kay sa joona.

²⁰ɦiyda vi Ma-Vatɗina as tun gaaɗi, ta-ta nam hob vun varta vi dikam tuwa. Nigi ma hum caw slen kayni hay liy ma vokŋa.

²¹Sa jobta nisina nan may cuksiɗi, may nisi jaŋa, nan may di va tisi noŋɗi, may nisi di vun-jobta.

²²Lali nisi co coy hay ŋra-vunda vanu, nisi ɗawni ma di labara van goy tam sumuna vanu, nisi ɗawni ma hotsiyay bugolsi tam hagata visi ta joota, tam lopna visi ma joona kaw.

²³Ma-Vatɗina di'e: Nanu mi Lawn ma goboynɗi su? Nanu mi Lawn ma ginena kaw ɗisu?

²⁴Ma-Vatɗin di'e: San as col hay liy ma ŋayayna bay nan wum su? Nanu, nan as hob dukalawna hiɗi nagata ɗisu? Din mi Ma-Vatɗina.

²⁵Nan humi dita vi sa jobta sa ka di vun-jobta ta sinda hay semda vanu, nisi sa ka di ala: Duwayt danu! Duwayt danu!

²⁶Sa jobta nisina min di vun-jobta ki kayn nala ta-ta lancitige? Nisi min di ɗutta vi diksi ki kayn nala ta-ta lancitige?

²⁷Nisi var kay viy semda van goy kir sumuna vanu, hiɗi duwayta ta gigekaw da' tam sugolomna, ki sumaysiya yisi jok semda vanu kuɗ Baal nala.

²⁸Hin sa ma jobta ma duwayt dumna da' goy ti caw duway na'ta, hin sa ma jobta ma hum yoboyna vanna di yoboyna van goy hay liyamu. Nigi rigas usna hiɗi alkamarena kay mige? Din mi Ma-Vatɗina.

²⁹Yoboyna vanu may ki kut naɗi su? Yoboyna vanu ki marto ma to hiɗiyn naɗi su? Din mi Ma-Vatɗina.

³⁰Kuɗ kayni Ma-Vatɗin di'e: Fuma tuwmaawa hiɗi sa jobta sa kul yoboyna van jar tuwsiya.

³¹Humgi dita vi Ma-Vatɗina: Fuma tuwmaawa hiɗi jobta sa sli dita visi ta kay tuwsita muɗa' goy ala ti dita vanu.

³²Humgi dita vi Ma-Vatɗina: Fuma tuwmaawa hiɗi sa jobta sa di duwayta ta sinda, sa di duwayta kay viy sumuna van goyo hiɗi sinda visiya, hiɗi ŋileŋga visiya kaw; nan may cuksiyays noŋɗi, nan may vulsi ditis noŋɗi, nisi may ŋaa'a kay sumun kayn noŋɗi, Din mi Ma-Vatɗina.

³³La sum nisina, la sa ma jobta lebo mul-ma-ɗifini jobaŋ ala: Vun-jobta vi Lawn na'ta ti tarige ni, naŋ ma disi ala vun-jobta na'ta ti tarige su, nan ma cukgi goyo. Din mi Ma-Vatɗina.

³⁴La sumu'u, la sa ma jobo, la mul-ma-ɗifini kaw daawa ala vun-jobta vi Ma-Vatɗina, nan ma watamu, namu hiɗi ziyna valamu.

³⁵Nigi ma di ala: Gigekaw tam sugolomna, gigekaw tam ɓasulumna, Ma-Vatɗin hot dit anige? Ma-Vatɗin di ala nige?

³⁶May nigi ma di ala vun-jobta vi Lawna loɗi, kay dita vi sana ma li ti dita valam kay tuwamu, nigi gun dita vi Lawn ma irina, nigi gun dita vi Ma-Vatɗina vi vok-ma-duura Lawna vaya.

³⁷Naŋ ma di tam sa ma jobta ala: Ma-Vatɗina hotaŋ dit anige? Ma-Vatɗin di anige?

³⁸La nigi di lo ala: Vun-jobta vi Ma-Vatɗina, nala Ma-Vatɗin ka di ala: kay dit ta ala vun-jobta vi Ma-Vatɗina nigi ka da'a, kay nan cuk sumun katgiya a nigi ma di ala: vun-jobta vi Ma-Vatɗinɗi,

³⁹humgiya, kuɗ na'ta kayni yan ma jokgiya, nan ma noygi goyo, nigiya hiɗi hoyok-ziy ma nan vulum migi nigiya hiɗi sumaygiya, nan ma digiɗgi goy gine vok iranu.

⁴⁰Nan ma tun panta ta vatɗit tigiya, nan ma tun zulota ta vatɗit tigiya, yam sa ma jok kayni may loɗi.