Read Masana YEREMIYAS 25 Bible Online

YEREMIYAS 25 - Masana bible

YEREMIYAS 25

¹Yoboyna ma diy tam Yeremiyas kay sumuna vi Yuda kafe, hay busata fiɗita vi Yoyakim, goora vi Yosiyas, mulla vi Yuda. Kayni ti busata jewta vi Nebukadnesar mulla vi Babilon.

²Yoboyna ma Yeremiyas dum vok sumuna vi Yuda kaf hiɗi sum sa hay Yerusalemna. Nam disi ala:

³Tun caw tam busata doogo yam ɦidita vi Yosiyas, goora vi Amon, mulla vi Yuda pa, ta-ta vaydi, busat wulin dok-ma' yam ɦidi, Ma-Vatɗina di yoboyna valam tanu; nan lawam tigiya, nan law tigiya hay graw culumta pa, nan ka digit lo, may nigi min humɗi.

⁴Ma-Vatɗina cuk sa sunda valam ay katgi kafe, sa jobta, nam cuksi ay katgi hay graw culumta pa; may nigi min humsiɗi, nigi min tun humgi kay humsiɗi.

⁵Nisi di'e: Gigekaw ma hotay bugolomu tam hagata joota valam pa, hotgi ay bugolgiya hay lopna vigi ma joona, nala nigi ma lak hay nagata ta nan vula' migi nigiya hiɗi sumaygiya hay vatɗita vatɗita;

⁶nigi ma tuɗ kuɗ lawayn hegena kay sunumɗi, kay girif gaa vokomɗi kaw, ɓulakan dikan hiɗi lopna vi ɓigiɗi. Nala nan ma ligi va ma joo'o noŋɗi.

⁷May nigi min humanɗi, Din mi Ma-Vatɗina. Nigi ɓulakan dikanu hiɗi lopna vi ɓigiya, kay mar joo kigiya.

⁸Kuɗ kayni Ma-Vatɗina vi vok-ma-duura ka di ala: Kay nigi min hum yoboyna van noŋɗi,

⁹kay na'ta nan ma gi sunda kay tuɗ gar sum sa hay gal gaan kafe, nan ma gi sunda kay Nebukadnesar, mulla vi Babilon, sa ma sunda vanu, nan ma maram dur nagat tani hiɗi sum sa haya'na kaf, hiɗi jaf-sum sa ŋuyi tisin kayn kaf, kay cisi goy kafe, kay hin nagata visi goy hawa hiweŋ', muɗa' a sumun cen kuɗa'a, ɓulakay goy dok-doko, Din mi Ma-Vatɗina.

¹⁰Nul ma firita hiɗi nul ma firit ŋolla, nul ma dabayna, suwana vi hiɗiy ma lutna hiɗi haraŋa vi fitilla nan ma zanam lemdeh'.

¹¹Nagat waŋŋi kaf ma ɓulak goyo, ma muɗ goy fulu, jaf-sumun kayni ma li gorvo'o hay ɓam mulla vi Babilon ir busat dok-siɗiya.

¹²May hay li ma busat dok-siɗiya lakŋi vuna' hobawa, nan ma ka kitat kay mulla vi Babilon hiɗi jaf-sum nisina, kuɗ jiw-zlata visiya; nan ma ka kitata kay nagata vi sa Kaldeena, nan ma mar ɓulakka ta vatɗita, Din mi Ma-Vatɗina.

¹³Slen ma nan dum kay nagat kayni kaf nan ma maram ka'a, slen kaf ma ka ɗoy hay ɗerwelda kayni, vun-jobta ta Yeremiyas da' kay jaf-sumun kafta.

¹⁴Kay jaf-sum sa donona hiɗi muliya sa ŋulona ma lisi gorvo'o, nisi kaw, nan ma wuraksiya kuɗ lopna visiya hiɗi sle ma ɓisi lumna.

¹⁵Kay Ma-Vatɗina Lawna vi Israyel ka di tan ala: kaway-ma-cina ma hobay hiɗi vinna vi ɦiyda van kayni, naŋ ma vum hay ɓaŋu, naŋ ma vulum a ci'e mi jaf-sumun kaf sa nan min gaŋ katsiya.

¹⁶Nisi ma ci'e, nisi ma sliwira, nisi ma muɗ ki sa ma ɦoyayna nala, hay li ma irsi ma cuk kay kew-gaferaŋa ma nan min gum jarsiya.

¹⁷Nan sli kaway-ma-cina hay ɓam Ma-Vatɗina, nan vulum a ci'e mi jaf-sumun kaf sa Ma-Vatɗin gan katsina:

¹⁸Tam Yerusalem hiɗi hoyok-ziyna vi Yuda, tam muliyana hiɗi sa ŋulona, kay ɓulak nagata visi goyo, kay hina' goy ɦawa hiweŋ', kay sumun cen kuɗa'a, beɗa'a kaw. Ki nay ka wi vaydi nala;

¹⁹tam Farawn mulla vi Egipte, tam sa sunda valamu, tam sa ŋulona valamu hiɗi sumuna valam kafe;

²⁰tam Arabiya kafe, tam muliyana vi Us kafe, tam muliyana vi nagata vi Filistin kafe, tam Askalon, tam Gaza, tam Ekron, tam caw Asdod ma hinna,

²¹tam Edom, tam Mowab, tam gurona vi Amon kaw;

²²tam muliyana vi Tirus kafe, Tam muliyana vi Sidon kafe, tam muliyana vi jokona ma ka goy bugol niy-lum ma ŋolla;

²³tam Dedan, tam Tema, tam Buz, tam nisi kaf sa wel jiwersi goyna;

²⁴tam muliyana vi Arabiya kafe, tam muliyana vi sa Arabna sa li ziy hay fulda;

²⁵tam muliyana vi Zimri kafe, tam muliyana vi Elam kafe, tam muliyana vi Mediya kafe;

²⁶tam muliyana vi gal ma gaana kafe, goboyo hiɗi gine'e, segena hiɗi segen kafe, tam muliyana vi sum sa kay nagat kuɗulu. Mulla vi Sesak ma ciys goy bugolsi kafe may.

²⁷Naŋ ma di tisiya: Ma-Vatɗina vi vok-ma-duura Lawna vi Israyel ka di ala: cigiya, ɦoygiya, vingi goyo, pukgi gaa'a bay fok kulo'o, hay li ma irgi ma cuk kay kew-gaferaŋa ma nan min gum jargiya.

²⁸La nisi min sli kaway-ma-cina hay ɓaŋu kay cumɗi, naŋ ma di tisiya: Ma-Vatɗina Lawna vi vok-ma-duura ka di ala: Nigi ma cumu.

²⁹Kay hoyok-ziyn ma semda van ka tuni talamna tani kaw, nan tun caw lum joo'o; may nigiya, nigi hin bat fi kitat ɗawn hintige? Nigi hin bay fi kitatɗi, kay nan ma yi kew-gaferaŋa aya kay sum sa hay nagat kafe, Din mi Ma-Vatɗina vi vok-ma-duura.

³⁰May naŋu, naŋ ma disi vun-jobta kay slen kayni kaf, naŋ ma disi ala: Ma-Vatɗina ma muɗ ɦiya kulo hay wuralawn pa; hay ziyna valam ma peldetna pa nam ma di delemu; nam ma muɗ ɦiya kat liyna valam ma musta, nam ma ci lulu'u, ki sum sa kesl gulda-guldan gaa sesina nala, nam ma ci lulu kat sum sa hay nagata.

³¹Winekŋa co ta-ta tam dabaŋ-gu'ta vi nagata, kay Ma-Vatɗina ka ci way hiɗi jaf-sumuna, nam ka kitat jaram hiɗi sumun kafe, nam vul sa joon goy mi kew-gaferaŋa, Din mi Ma-Vatɗina.

³²Kay na'ta Ma-Vatɗina vi vok-ma-duura di'e: ɗuwgi tige, joot ka tuɗ voka'a tam jaf-sumuna sumuna, ɦiwliŋ ma ŋolla ka fokay kulo'o hay vun-nagata pa.

³³Sum sa Ma-Vatɗin cisi hay buur namna ɗawni, ma baris gaa kay yam nagat noŋ kuɗulu, sa as tiysi loɗi, sa as yawsi kuloɗi, sa as pisi gaaɗi, nisi ma molis kulo kay yam nagata ki zigidikŋa nala.

³⁴Yorgi tuwgiya, sa ŋomda, tiygiya, ligatgi gaa hay butuw-kuna, nigi ma ŋom fok-dimina. Kay buur coowa a nigi ma ŋatis goyo, nan ma togi goyo, nigi ma yak' gaa'a ki doway ma gusta valam lop ŋolla nala.

³⁵Liyn ma sa ŋomda ŋay hayam may loɗi, liyn ma sa tun vok fok-dimina ŋay haya may loɗi.

³⁶Sum sa ŋomda ka ci lulu'u, sa tuni vok fok-dimina ka tiya, kay Ma-Vatɗina ka ŋal hatna visi goyo.

³⁷Ziy ma lakay hay sle'ta ɦoy gaa'a, kay ɦiyda ŋolda vi Ma-Vatɗina.

³⁸Nam hin ziyna valamawa goyo, ki zlon hin ziyna valam goy nala; kay nagat muɗi goy fulu kuɗ ɦiyda vi sa ma ɓulaka'na, hiɗi purcakka valam ta ŋolda.