Read Masana YEREMIYAS 26 Bible Online

YEREMIYAS 26 - Masana bible

YEREMIYAS 26

¹Hay tun cawta vi mulda vi Yehoyakim goora vi Yosiyas, mulla vi Yuda, Yeremiyas ka di yoboyna vi Ma-Vatɗin tam sumun ala:

²Naŋ ma col hay wur-daŋŋa vi ziyda vi Ma-Vatɗina, sumun sa hay hoyok-ziyna vi Yuda kaf sa ka co girif gaa'a hay ziyna vi Ma-Vatɗina, yoboyn ma nan daŋgin kaf naŋ ma disita, naŋ ma ka mara goy kuɗum kep noŋɗi.

³La li ŋalɗi nisi ma huma, gigekaw ma hotay bugolomu tam hagata joota valamu, nala nan ma hot bugolanu tam joota ta nan var kay li tisiya, kuɗ lopna visi ma joona.

⁴Naŋ ma disi ala: Ma-Vatɗina ka di'e: La nigi humanɗi hay li ma nan vulgi hagata kay li kuɗ gatta ta nan tuna' vokgiya,

⁵kay hum yoboyna vi sa sunda vanu, sa jobta, sa nan cuksi katgiya, sa nan cuksi katgi hay graw culum pa, may nigi min humsiɗi,

⁶nala nan ma ɓulak hoyok-ziyn tani goyo ki Silo nala, nan ma beɗ hoyok-ziyn tani goyo vok ir jaf-sumuna hay nagat kafe.

⁷Muliyan-sa-ɗifinna, sa jobta hiɗi sumun kaf humsi hum Yeremiyas ka di yoboyn kayni kalaf hay ziyda vi Ma-Vatɗin zaw.

⁸Hay li ma Yeremiyas vunam vat kay di yoboyn ma Ma-Vatɗin tunum vunamna kay dum tam sumun kaf vatna, muliyan-sa-ɗifinna, sa jobta hiɗi sumun kaf vumu, nisi ka dum ala: Naŋ mitawa, naŋ mitawa.

⁹Naŋ di vun-jobta hay sem Ma-Vatɗina ala: ziyd zawni ma muɗ ki Silo nala, hoyok-ziyn tani ma ɦo gaa'a, sa hin hayam loɗi, naŋ di nala kay mige? Sumun kaf ŋuy tam Yeremiyas cusl' kalaf hay ziyda vi Ma-Vatɗina.

¹⁰Hay li ma sum sa ŋulona vi Yuda hum slen kayni, nisi yaway goy hay ziyna vi mulla pa, kal hay ziyna vi Ma-Vatɗina, nisi lak hay vun-gala ma wulina vi ziyda vi Ma-Vatɗina.

¹¹Nala muliyan-sa-ɗifinna hiɗi sa jobta di tam sa ŋulona hiɗi sumun kaf ala: San kayni cum goyo, kay nam di vun-jobta kat hoyok-ziyn kayni, ki nigi hum hiɗi humgi nala.

¹²Yeremiyas di tam sa ŋulona hiɗi sumun kaf ala: Ma-Vatɗin gan ay kayni kay di vun-jobta kat ziyd zawni, kay di slen ma nigi humum kaf lakŋi kat hoyok-ziyn tani.

¹³Wulin kayni, muɗgi zlana vigiya, muɗgi varta vigiya, humgi del Ma-Vatɗina, Lawna vigiya, nala Ma-Vatɗina ma ham kay joota ta nam var kay la' tigiya.

¹⁴Nan hayɗini, nan zaw hay ɓigi ni, nigi as li va tanu ki nigi min nala.

¹⁵May wigi goy ala, la nigi can goyo, nigiya, hoyok-ziyn tani hiɗi sum sa hayamna kaw, nigi ma tunum kigi ɗawni mi busuwna vi sa ma ɗigera; kay gan ay katgi kayni mi Ma-Vatɗin gasiya, kay nan ma di slen kayni kaf hay humgiya.

¹⁶Sa ŋulona vi sumun kaf di tam muliyan-sa-ɗifinna hiɗi sa jobta ala: San kayni may nagay kay mitta loɗi, kay nam law katay kayni hay semda vi Ma-Vatɗina Lawna vaya.

¹⁷Segena jar sa maariyana vi nagata yaway kulo'o, nisi di tam tokŋa vi sumun kaf ala:

¹⁸Mikka ma Moresetna ka di vun-jobta hay liyna vi Ezekiyas mulla vi Yuda, nam di tam sumuna vi Yuda kaf ala: Ma-Vatɗina vi vok-ma-duura ka di ala: Siyon ma zumis goy kelɗe' ki sinen nala, Yerusalem ma muɗ goy goorhoyo'o, hiɗiyta ta ziyda hayta ma muɗ goy mi juru ma hiziki.

¹⁹Ezekiyas mulla vi Yuda hiɗi sum sa hay Yuda kaf cum goy mat ci su? Ezekiyas may li nar kuɗ Ma-Vatɗin ɗisu? Nam tiy vok ir Ma-Vatɗina, kuɗ na'ta kayni Ma-Vatɗina ham kay joota ta nam var kay la' tisiya. Nala nay segena tun mat ma ŋol ki kayn nala kay mige?

²⁰Sa mara ay kep lo, ma ay di vun-jobta hay semda vi Ma-Vatɗina, mi Uriyas goora vi Semayeya, ma hay Kiryat-Yeyarimna. Nam di vun-jobta ŋray ca ki Yeremiyas nala kaw kat hoyok-ziyn tani hiɗi nagat kafe.

²¹Mulla Yoyakim, sum sa donon kaf hiɗi sa ŋulona visi kaf hum yoboyna valamu, nala mulla gar kay cum goyo. Hay li ma Uriyas hum kayni, tuwam cuk nari, nam pira, kal hay Egipte.

²²Mulla Yoyakim cuk sumun hay Egipte: Elnatan goora vi Akbor hiɗi sum sara kuɗumu.

²³Nisi vi Uriyas ay goy hay Egipte pa maram tam mulla Yoyakim, mulla cum goy hiɗi kew-gaferaŋa, gum tuwam kulo kay yam usta ta pi sumun kaf haya'ta.

²⁴May Ahikam goora vi Safan gut kuɗ Yeremiyas, nam tel sumuna kay nisi ma vumu a tuɗ cum goyɗi.