Read Masana YEREMIYAS 27 Bible Online

YEREMIYAS 27 - Masana bible

YEREMIYAS 27

¹Hay tun-cawta vi mulda vi Yoyakim goora vi Yosiyas mulla vi Yuda, Yeremiyas ka di yoboyna vi Ma-Vatɗina tam sumun ala:

²Ma-Vatɗina ka di tan ala: Kotaŋ zigewna hiɗi jukŋa, naŋ ma junum keleŋ ɦimak' waŋ.

³Bugolda naŋ gum tam mulla vi Edom, mulla vi Mowab, tam mulla vi gurona vi Amon, tam mulla vi Tirus hiɗi mulla vi Sidon, vulum hay ɓam sum sa sunda sa co hay Yerusalem kat Sedekiyas, mulla vi Yuda,

⁴naŋ ma di sunda van hay vunsi tam muliyana visi ala: Ma-Vatɗina Lawna vi vok-ma-duura, Lawna vi Israyel ka digi ala:

⁵Nanu mi ma kot nagata, sumuna hiɗi muuriyana ma ka gaa kay nagata, nan kotsi hiɗi donota van ta ŋolda, hiɗi ɓan goy meɗiya, nan vul nagat mi gige ma nan mina kaw.

⁶Wulin kayni nan min vul nagat kayni kaf hay ɓam Nebukadnesar, mulla vi Babilon, sa ma sunda vanu; nan min vulum faray ma hay voora kaw, kay nam ma mus mul kalamu.

⁷Jaf-sum sa hay nagat kaf ma hot yisi gaa kuɗumu, kuɗum namu, kuɗ goora valamu, kuɗ gurona vi goora valamu, ta-ta hay buur ma liyna vi nagata valam ma asa, ta-ta jaf-sum sa dono'o hiɗi muliyan sa ŋulo'o kol kalamu.

⁸La jaf-sumun lebo mul tarige kaw min hum kuɗ Nebukadnesar mulla vi Babilonɗi, la vul delem tam juk ma mulla vi Babilon min tunum kelemnaɗi, jaf-sum nisina nan ma watsi hiɗi kew-gaferaŋa, hiɗi mayta hiɗi moyna, ta-ta nan vat jaf-sum nisin goy hiɗi ɓalam namu, Din mi Ma-Vatɗina.

⁹May nigiya, sa jobta vigiya, sa tun gireyta vigiya, sa duwayt disina vigiya, sa ɗuw mislekŋa vigiya, sa ɗuw gul-yalda vigiya, hiɗi nisi kaf sa ka di ala mulla vi Babilon as yawgi gorvoɗina, nigi ma hum dita visiɗi.

¹⁰Kay vun-jobta ta nisi da' tigi kayni ti sinda, kay jargi ma ja goy gine'e hiɗi nagata vigiya, kay nan ma digiɗgi goyo a nigi ma ba goyo.

¹¹May sum sa hot yisiyawa gaa kuɗ jukŋa vi mulla vi Babilon, sa lakawa gaa kuɗ gaŋeraŋa valamuna, nan ma hinsi lak hay nagata visiya, kay nisi ma zum naga na'ta, kay nisi ma li ziy haya kaw. Din mi Ma-Vatɗina.

¹²Nan di slen ŋray ca ki kayn nala tam Sedekiyas, mulla vi Yuda kaw, hotaŋ yaŋ gaa kuɗ jukŋa vi mulla vi Babilon, musaŋ gaa kuɗ gaŋeraŋa valamu, kuɗ sumuna valamu kaw, nala naŋ ma mus iriya.

¹³Naŋu hiɗi sumuna vaŋu, nigi mit goy vun kew-gaferaŋa, vun mayta, vun moyna kaw, ki Ma-Vatɗina di vun-jobta kay sum sa hum kuɗ mulla vi Babilonɗina mit ɗawn nala kaw kay mige?

¹⁴Sa jobta sa di tigi ala nigi as li gorvo hay ɓam mulla vi Babilonɗina, nigi ma hum kuɗsiɗi. Kay nisi digit kayn ti sinda.

¹⁵Nan may cuksiyays noŋɗi, Din mi Ma-Vatɗina, may nisi ka di vun-jobta ta sinda hay semda vanu, kay nan ma digiɗgi goyo, a nigi ma ba goyo, nigiya hiɗi sa jobta sa ka di vun-jobta tigiya.

¹⁶Nan di tam muliyan-sa-ɗifinna hiɗi sumun kaf ala: Ma-Vatɗin ka di'e: Sa jobta vigi sa ka di vun-jobta tigi ala: «jakŋa ma hay ziyda vi Ma-Vatɗina ma hotomay goy hay Babilon pa ɗawni, hini mus ŋolɗi», humgi dita visi na'taɗi, kay nisi da' kayni ti vun-jobta ta sinda.

¹⁷Nigi ma hum kuɗsiɗi, hotgi yigi gaa kuɗ mulla vi Babilon, nala nigi ma mus iriya. Hoyok-ziyn tani ma ɦoys gaa'a kay mige?

¹⁸La nisi si sa jobta, la yoboyna vi Lawna ka hay vunsiya, hinsi siɗaw tam Ma-Vatɗina vi vok-ma-duura, kay jakŋa ma hini hay ziyna mi Ma-Vatɗina, hay ziyna vi mulla vi Yuda hiɗi Yerusalem ma yawis goy hay Babilonɗi tige.

¹⁹Kay kayni mi slen ma Ma-Vatɗina vi vok-ma-duura dumu kay dolla, kay ŋarak ŋolla, kay diram ma ini gaana, hiɗi jak hena ma hini hay hoyok-ziyn tani,

²⁰ma Nebukadnesar mulla vi Babilon may yawamɗi, hay li ma nam yaw Yekoniya goora vi Yoyakim mulla vi Yuda; hiɗi sa ŋulona vi Yuda hiɗi Yerusalem, hay li ma nam yawsiyays Yerusalem pa, kalsi gorvo hay babilon.

²¹Kayni mi va ma Ma-Vatɗina vi vok-ma-duura, Lawna vi Israyel dumu kay jakŋa ma hini hay ziyna vi Ma-Vatɗina, hay ziyna vi mulla vi Yuda hiɗi Yerusalem.

²²Nisi ma kalam hay Babilon, nam ma lak ɗawni, ta-ta hay buur ma nan ma garamu, ta-ta hay buur ma nan ma yawamiya, hotomay Yerusalem.