Read Masana YEREMIYAS 28 Bible Online

YEREMIYAS 28 - Masana bible

YEREMIYAS 28

¹Hay busat na'ta, hay tun-cawta vi mulda vi Sedekiyas mulla vi Yuda, hay til ma vaslna vi busata fiɗita, Hananiya, goora vi Azzur, sa ma jobta hay Gabawon, ka law tanu hay ziyda vi Ma-Vatɗina, vok ir muliyan-sa-ɗifinna hiɗi sumun kafe ala:

²Ma-Vatɗina vi vok-ma-duura Lawna vi Israyel ka di ala: Juk ma kel mulla vi Babilon nan kusum goyo.

³Hini busat ma' ɦawa, jakŋa ma hay ziyna vi Ma-Vatɗina kaf ma Nebukadnesar yawamis goy hay liyn tan pa kalam hay Babilonna, nan ma hotomay hay liyn tani.

⁴Yekoniya goora vi Yoyakim mulla vi Yuda hiɗi sa gorvona vi Yuda kaf, sa kalis goy Babilonna, nan ma hotsiyay hay liyn tani; kay nan ma kus jukŋa ma kel mulla vi Babilon, Din mi Ma-Vatɗina.

⁵Yeremiyas ma jobta hot dit tam Hananiya ma jobta, vok ir muliyan-sa-ɗifinna hiɗi sumun kaf sa ka dakay hay ziyna vi Ma-Vatɗina.

⁶Yeremiyas ma jobta di ala: Amen! Hin Ma-Vatɗin li ki kayn nala, hin Ma-Vatɗin hob vun-jobta ta naŋ da'ta, jak ma hay ziyda vi Ma-Vatɗina hiɗi sum sa kali gorvo hay Babilon kaf nam ma hotomay hay liyn tan hotge!

⁷May humaŋ yoboyn kayni ma nan min dumu kay naŋu hiɗi sum sa tokay tanna kaf ma humumu:

⁸Sum sa jobta sa co jewan nanu hiɗi sa co jewaŋ naŋu kaw hay liyn ma ɓa-ɓana, nisi di vun-jobta kay duura, lasta hiɗi moyna kat naga ma donona hiɗi mulda ŋulota;

⁹may la sa ma jobta di vun-jobta kay sle'ta, wum ala gumi mi Lawn gasiya kayn hay li ma vun-jobta valam hob kulo'o.

¹⁰Ki kay nala Hananiya ma jobta sli jukŋa goy kel Yeremiyas ma jobta, nam kusum goyo.

¹¹Hananiya ka di vok ir sumun kaf ala: Ma-Vatɗin ka di'e: Hini busat ma', juk ma Nebukadnesar mulla vi Babilon gum kel sumuna nan ma kusum goyo. Nala Yeremiyas ma jobta kali malamu.

¹²Bugol liy ma Hananiya ma jobta kus jukŋ goy kel Yeremiyas ma jobta kusn kayni, Ma-Vatɗina ka di yoboyna valam tam Yeremiyas ala:

¹³Tuɗaŋu, daŋ tam Hananiya ala: Ma-Vatɗin ka di ala: Naŋ kusum goy kayn mi juk ma guwa, may naŋ ma fum baŋalam ɗawn mi juk ma kawaya.

¹⁴Kay Ma-Vatɗina vi vok-ma-duura Lawna vi Israyel ka di ala: Nan min gi juk ma kawaya hay del sum nisin kayni kaf, kay nisi ma li gorvo kuɗ Nebukadnesar mulla vi Babilon, kay nisi ma sunumu, nan vulum faray ma hay voora kaw.

¹⁵Yeremiyas ma jobta di tam Hananiya ma jobta: Humaŋu Hananiya, Ma-Vatɗin may gaŋay noŋɗi, naŋ min kayn ala sumun tani ma vi kuɗ sinda.

¹⁶Kay na'ta Ma-Vatɗin di ala: Humaŋu, nan min digiɗaŋ goy hay nagata, naŋ ma mit cukudayni, kay yoboyna vaŋu fok sumun kulo'o kat Ma-Vatɗina.

¹⁷Hananiya ma jobta mit hay busat na'ta, hay til ma siɗiyana.