Read Masana YEREMIYAS 29 Bible Online

YEREMIYAS 29 - Masana bible

YEREMIYAS 29

¹Tan kayni mi slen ma ɗoy hay letreta ta Yeremiyas ma jobta ɗo'ays hay Yerusalem pa, ga' tam dir sumuna sa goy gorvona, muliyan-sa-ɗifinna, sa jobta, sumun kaf sa Nebukadnesar yawsi gorvo hay Yerusalem pa, kalsi hay Babilon.

²Kayni bugol liy ma mulla Yekoniya, ca-mulda, sa patayna, sa ŋulona vi Yuda hiɗi Yerusalem, sa har guna hiɗi sa zla kawayna kaf cukis goy Yerusalem pa cukŋa.

³Nam vula' hay ɓam Eliyasa goora vi Safan, hiɗi Gemariya goora vi Hilkiya, sa Sedekiyas mulla vi Yuda cuksi hay Babilon kat Nebukadnesar mulla vi Babilon. Slen ɗoy haya' ki kayn nala:

⁴Ma-Vatɗina vi vok-ma-duura Lawna vi Israyel ka di'e: tam sa gorvon kaf sa nan yawsi ay hay Yerusalem kalsi hay Babilon.

⁵Ingi ziyna, lakgi hayamu, pigi jardeŋŋa, tigi vuɗna valamu.

⁶Yawgi boyna, vuɗgi guro-jufayna hiɗi guro-boyna; yawgi boyna mi gurona vigiya, vulgi guro-boyna vigi goy mi jufayna, kay nisi vuɗ guro'o; biyagi ŋolo hay liyn ma nigi ka lakay hayamna, kiɗagi goyɗi.

⁷Gargi kay li ŋaat tam hoyok-ziyna ma nan kalgi hayamna, siɗawgi Ma-Vatɗina kay hoyok-ziy namna, kay nigi fi sle'ta ɗawn kuɗ hoyok-ziy namna.

⁸Kay Ma-Vatɗina vi vok-ma-duura Lawna vi Israyel ka di ala: Nigi ma hin tuwgi ɗut goyo kuɗ sum sa jobta vigi sa ka jarginɗi, kuɗ sa gireyta vigiɗi, sa di duwayta vigiya sa nigi zutsi hay duwayta nigi ma humsiɗi kaw.

⁹Kay vun-jobta ta nisi da' tigi hay semda van kayni ti sinda. Nan may cuksiyays noŋɗi, Din mi Ma-Vatɗina.

¹⁰May kayni ti dita vi Ma-Vatɗina: Hay li ma busata dok-siɗiyata vuna' hobawa kay Babilon, human ma gan kigiya, yoboyna van ma ŋaana nan ma hobom vunam kigiya, nan ma hotgiyay hay liyn tani.

¹¹Ma-Vatɗina di'e: Nan wi slen ma nan var kay lum tigina, nan var kay li sle'ta tigiya, may jootaɗi, kay vulgi ŋaat hay vokka, vulgi cubta-sle'ta kaw.

¹²Nigi ma yi semda vanu, nigi ma kola, nigi ma siɗawanu, nan ma humgiya.

¹³Nigi ma garanu, nigi ma fanu, la nigi garan hiɗi dikgi kafe.

¹⁴Nan ma hin tuwan a nigi ma fanu, Din mi Ma-Vatɗina, sa gorvona vigiya nan ma hotsiyaya, nan ma tokgi yigi ay hay nagata hiɗi liyn ma nan digiɗgi hayam kafna pa, Din mi Ma-Vatɗina, nan ma hotgiyay hay liyn ma nan yawgi goy hayam gorvo pana.

¹⁵May nigi di ala: Lawn fok sum sa jobta kulo'o jarma'a hay Babilon.

¹⁶Kayni ti dita vi Ma-Vatɗina ta nam da' kay mulla ma musi kay zlamda-mulda vi David, kay sumun kaf sa li ziy hay hoyok-ziyn tani, kay ɓosiyogina sa may kal hiɗi nigi gorvoɗina;

¹⁷Ma-Vatɗina vi vok-ma-duura ka di ala: Nan min gi kew-gaferaŋa jarsiya, mayta hiɗi moyna, nan ma muɗsi ŋray ca ki vuɗna vi gu-gumna ma buwiya ma sa as mutumɗi kuɗ joota valamu nala.

¹⁸Nan ma digiɗsi kuɗsi hiɗi kew-gaferaŋa, hiɗi mayta, hiɗi moyna; nan ma muɗsi si sum sa mar narta kay muliyana gaa kay nagata, sum sa mar be'da, mar ɓulak-goyta, mar burahta hiɗi zulota jar jaf-sumun kaf sa nan min digiɗsi goy jarsiya.

¹⁹Ma-Vatɗina di'e: Kay mige nisi min hum yoboyna vanɗi, nisiya sa nan cuk sa sunda vanu sa jobta jarsiya, sa nan cuk sa jobta jarsi hay graw culum culum, may nisi min humɗi, Din mi Ma-Vatɗina.

²⁰May nigiya, humgi yoboyna vi Ma-Vatɗina, nigi kaf sa gorvona, sa nan cukgi ays hay Yerusalem pa, kalgi hay Babilon.

²¹Kayni mi va ma Ma-Vatɗina vi vok-ma-duura, Lawna vi Israyel dum kay Akab goora vi Kolaya hiɗi Sedekiyas goora vi Maaseya sa digi sinda hay semda vanu, humgiya nan min vulsi hay ɓam Nebukadnesar mulla vi Babilon; nam ma cisi goyo vok irgiya.

²²Sumun ma beɗ hiɗi semda visiya, jar sum sa gorvona vi Yuda sa ka hay Babilon kaf sumun ma di ala: Ma-Vatɗina ma lasaŋu ki Sedekiyas hiɗi Akab sa mulla vi Babilon ŋalsi hay kuta nala.

²³Van kayni ma co tisiya kuɗ sle ma liwisna ma nisi lum hay Israyel, nisi kal tuwsi hay zlata-bulota hiɗi boyna vi sugolaysina, kay nisi di sle ma sinna hay semda vanu, hay li ma nan may vulsi hagatɗi. Nan wi'e, nan as li di-goyta, Din mi Ma-Vatɗina.

²⁴Naŋ ma di tam Semayeya ma Nehelamna ala:

²⁵Ma-Vatɗina vi vok-ma-duura Lawna vi Israyel ka di ala: Hay semda vaŋu naŋ gi ɗerwelda aya tam sumuna vi Yerusalem kaf, tam Sefoniya, goora vi Maaseya, mul-ma-ɗifinna, tam muliyan-sa-ɗifinna kaf, ɗerwel na'ta ɗoy haya' ala:

²⁶Ma-Vatɗina tunaŋawa mul-ma-ɗifinna hay baŋal Yehoyada, mul-ma-ɗifinna, kay sum sa ŋom liyna ma li hay ziyna vi Ma-Vatɗina kay ŋom san gigekaw ma ɦoy tuwam goyo, ma muɗ tuwam sa ma jobo, kay naŋ ma gum daŋgaya, junum hiɗi kawayna.

²⁷Wulin kayni, Yeremiyas ma Anatotna ma ka di vun-jobta jargina, naŋ min gatam vunamɗi kay mige?

²⁸Nam gi sunda katma'a hay Babilon kay duma ala: Gorvota vigi ma mus ŋolo, ingi ziyna, lakgi haya, pigi jardeŋŋa, tigi vuɗna valamu kaw.

²⁹Sefoniya mul-ma-ɗifinna jaŋ ɗerwel na'ta goy vok Yeremiyas ma jobta.

³⁰Ma-Vatɗina ka di yoboyna valam tam Yeremiyas ala:

³¹Naŋ ma di tam sa gorvona kaf ala: Ma-Vatɗina ka law kay Semayeya ma Nehelamna ala: Kay mige Semayeya ka di vun-jobta katgiya, bay nan gumisa, nam ka kal vida ta sinda hay dikgiya.

³²Kayni mi va ma Ma-Vatɗin di'e: Nan ma wat Semayeya ma Nehelamna, hiɗi jafna valamu, sa valam as li ziy jar sumun tanɗi, ŋaata ta nan min la' tam sumuna vanu nam ma wa' hiɗi iramɗi, din mi Ma-Vatɗina, kay yoboyna valam kayni fok sumun kulo'o kat Ma-Vatɗina.