Read Masana YEREMIYAS 3 Bible Online

YEREMIYAS 3 - Masana bible

YEREMIYAS 3

¹Dit di ala: Hay li ma san gi cata valam goyo, la cat na'ta hinimawa muɗ goy cata vi sa mara'a, san kayni as hot kat cat na'ta lo su? La nala nagat noŋ kaw ma muɗ liwisɗi su? May nigiya, nigi muɗ tuwgiyawa viyuwu hiɗi sum sa cilena ŋolo, nala nigi hotay katan ɗawn hottige? Din mi Ma-Vatɗina.

²Cukgi irgi gal kulo'o ɗuwgi tige, nigi may muɗ tuwgi viyuwɗi su? Nigi lak hay hagata, ki sa Arabna hay fulda nala, nigi muɗ nagatawa liwisi hiɗi viyuwta vigiya hiɗi joota vigiya.

³Niyna teli kulo'o; niy ma menda min siɗi, may nigi min li tuwgi dok-dok ki boy sa viyuwna nala, nigi min li zuloɗi.

⁴Wulin kayni nigi ka siwel tan ala «bunu» ɗisu? Nigi ay si boniyonna hay joriyota vigi pa.

⁵Nam ma ŋom ɦiyda valam dok-dok su? Nam ma ŋoma'a ta-ta hay vatɗita su? Humgiya nigi ka di ala: nigi li sle ma ci-matna, nigi dab yam ɦiyda vigiya.

⁶Ma-Vatɗina di tanu, hay liyna vi mulla Yosiyas: Slen ma sum sa Israyel sa bay-vina ka lumna nigi wumawa su? Nisi tuɗi kulo kay hiɗiy ma ɗiŋiriŋŋa kaf, nisi tuɗi gaa kuɗ gu ma goɗin kaf, ɗawni nisi muɗ tuwsi viyuwu.

⁷Nan di'e: Bugol nisi li slen kaynawa lina, nisi ma hotay katanu. May nisi may hotayɗi. Ɓosiyosina, sa wi gatɗina hay jafna vi Yuda wi kayni hiɗi irsi kafe.

⁸Kuɗ digiɗ ma nan digiɗ Israyel sa bay-vin goyo, kuɗ zlata-bulota visi pete, kuɗ ta nan vulsi ɗerwel ma ɓuraw jar cata hiɗi jufna, nan wi ala ɓosiyosina sa hay jafna vi Yuda sa wi gatɗina tuwsi min li narɗi, nisi kali muɗ tuwsi liwis nala kaw.

⁹Kuɗ liwista visi ta siwel goy kisita, sum sa Israyel muɗ nagatawa liwisi, nisi li zlata-bulotawa hiɗi hiɗiyna, hiɗi guna kaw.

¹⁰hiɗi kayni kafe, ɓosiyosina sa hay jafna vi Yuda sa min gatɗina min hotay hiɗi diksi kafɗi, nisi li kayni hiɗi sinda, din mi Ma-Vatɗina.

¹¹Ma-Vatɗina di tanu: Israyella sa bay-vina ɗuw ir ɗigere, hay li ma ŋrasi hiɗi jafna vi Yuda sa hum gatɗina.

¹²Tuɗaŋu, siwelaŋ yoboyn kayni hay gal ma gaana, naŋ ma di ala: Hotgiyaya, Israyella sa bay-vina, din mi Ma-Vatɗina, nan ma cuk iran kigi hiɗi ɦiy loɗi, kay nan mi sa ma slugo'o, din mi Ma-Vatɗina. Nan may ŋom ɦiyda vanu kay dok-dokɗi.

¹³Nigi ma wi jiw-zlata vigiya tuta, nigi ma wi ala nigi ay si sum sa bay vi kuɗ Lawna, Ma-Vatɗina vigiya, wigi ala nigi tun segi hay liyn kaf kat laway ma pulla, gaa kuɗ gu ma ŋulomna kafe, nigi min human vunanɗi, din mi Ma-Vatɗina.

¹⁴Hotgiyaya, guro sa ŋel-gatta, din mi Ma-Vatɗina, kay nanu mi mulla vigiya, nan ma yawgi ay goy kep kep hay hoyok-ziy ma kepna, ma' ma' kuɗ jaf ma kepna, nan ma nargi hay Siyon.

¹⁵Nan ma vulgi sa ŋomda sa kuɗ minda vanna, nisi ma ŋomgiya hiɗi yamda-wida hiɗi hagata ŋaata.

¹⁶Hay li ma nigi biyawa ŋol dak-daki hay nagata, hay buur namna ɗawni, sa as law kay timgilla vi bonota vi Ma-Vatɗin loɗi; sa as var kay kayn loɗi, sa as di va kalam loɗi, la nam ka'a lebo mayɗi kaw, hum sa as gum kay kayn noŋɗi, sa as kot timgil mara loɗi, din mi Ma-Vatɗina.

¹⁷Hay buur namna ɗawni, Yerusalem nisi ma ya' ala zlamda-mulda vi Ma-Vatɗina; jaf-sumun kaf ma tok tuwsi hay Yerusalem, hay semda vi Ma-Vatɗina, nisi ma tap kuɗ varta joota vi diksi loɗi.

¹⁸Hay buur namna ɗawni, jafna vi Yuda ma poy kuɗ tuwsi hiɗi jafna vi Israyel; nisi ma may kuɗ tuwsi pa hay nagata ta gal gaata, hay nagata ta nan vula' voco'o mi sumaygiya.

¹⁹Nan di'e: Nan lakgi jar gurona van ɗawn laktige? Nan ma vulgi nagata ta yulumta, nan ma vulgi ganna ma ŋaa'a suw fi jaf-sum segen kaf ɗawn vultige? Nan di'e: Nigi ma yan ala «buma'a», nigi ma cal goy hiɗi nan loɗi.

²⁰May ki cata ɗut cilena va' nala, nigi kaw min vi kuɗanɗi, jafna vi Israyel, din mi Ma-Vatɗina.

²¹Della ka siwel hay liy ma ɗiŋiriŋŋa; kayni mi tiyna, mi giɗel-della vi gurona vi Israyel; kay nisi slugut hagata visiyawa, yisi jok Ma-Vatɗina Lawna visiyawa.

²²Hotgiyaya, guro sa ŋel-gatta, nan ma vul gida kay bay-vida vigiya. Numa lakŋi, numa tuɗ taŋu, kay naŋu mi Ma-Vatɗina, Lawna vuma'a.

²³Awa, suwana ma may kulo kay ɗiŋiriŋŋa hiɗi hiɗiyn pa kayn mi sini; Awa, su'da vi Israyel may goy vi Ma-Vatɗina Lawna vay pa.

²⁴Lawayn ma waana nam vat vuɗna vi lopna vi sumiyaya hay joriyota vay pa, fok-dimina visiya hiɗi luwayna visiya, guro-jufayna hiɗi guro-boyna visiya.

²⁵Va ma buura vuma' mi zulota, va ma bar kuma'na ti zulota ŋolda; kay numa li sulukawa kat Ma-Vatɗina Lawna vuma'a, numa'a hiɗi sumayma'a, hay joriyota vuma pa ta-ta vaydi, numa min hum del Ma-Vatɗina Lawna vuma'ɗi.