Read Masana YEREMIYAS 30 Bible Online

YEREMIYAS 30 - Masana bible

YEREMIYAS 30

¹Ma-Vatɗina ka di yoboyna valam tam Yeremiyas ala:

²Ma-Vatɗina Lawna vi Israyel ka di ala: Yoboyn ma nan daŋgi kafna naŋ ma ɗom hay ɗerwele.

³Humaŋu, buura ka co'o, Din mi Ma-Vatɗina, mi buura ma nan ma hot sa gorvona vi sumuna van sa Israyella hiɗi Yuda ay vo'o, Din mi Ma-Vatɗina; nan ma hotsi hay nagata ta nan vula' mi sumaysiya, naga na'ta ma muɗ ir visiya.

⁴Kayni mi yoboyna ma Ma-Vatɗina dum kay Israyel hiɗi Yuda.

⁵Ma-Vatɗin ka di ala: Numa ka hum ciriyna vi narta; kayni ti narta, may ti toytaɗi.

⁶Jobgi labara, ɗuwgi tige, sa jufna as vuɗ goor su? Sum sa jufayna nan ka ɗuwsi hiɗi ɓisi tuni fursi kaf ki cat ka vuɗ nala kay mige? Sum sa jufayn kaf irsi kermeti kulo'o kay mige?

⁷Joota! Kay buura kayni ŋolo; buur mara ma ki kayn nala mayɗi, kayni mi liyn ma yorta kay jafna vi Yakub; may nam ma but goyo.

⁸Ma-Vatɗina vi vok-ma-duura di'e: Hay buur namna ɗawni, juk ma kelgina nan ma kusum goyo, nan ma ja jaɓ ma nigi juni hiɗi namna goyo, sum sa pulla ma ligi gorvo loɗi.

⁹Nisi ma sun Ma-Vatɗina Lawna visiya, hiɗi David mulla visiya, ma nan min fokom kulo'o jarsiya.

¹⁰May nigiya, jafna vi Yakub, sa sunda vanu, ligi narɗi, Din mi Ma-Vatɗina, tuwgi wirgiɗi, nigi Israyella. Kay nan ma butgi goyo kay nagata gineta, nan ma but jafna vigi goyo hay ɓam nagata ta nigi ka haya' gorvota; jafna vi Yakub ma hotiya, nisi ma fi tun-sukka hiɗi lakka kiliŋga, sa as ɦiwirsi loɗi.

¹¹Kay nan ka hiɗi nigiya kay butgi goyo, sum sa nan mergi goy jarsina nan ma cisi goy kafe, may nigiya, nan ma vatgi goyɗi, nan ma watgiya hiɗi ɗigere, nan as hingi bay ka kitat kigiɗi, Din mi Ma-Vatɗina.

¹²Ki kayn nala Ma-Vatɗin ka di ala: tuwag kay goy mil ŋolo, mil namna ɓas ŋolo.

¹³Sa ma gut kagu mayɗi, sa ma gar gurgunu ma ŋaana, kay kom vun milla vag mayɗi.

¹⁴Nisi kaf sa ay minagu yisi jokagawa, sa ma jak humam kag mayɗi; kay nan cag ki san ci sa ma gawta nala, nan watag hiɗi dono'o, kuɗ jiw-zlata vagu ta ŋolda, kuɗ sulukŋa vag ma ŋolla.

¹⁵Nak yor tuwag kay tuwag ma kaay goy milla lo kay mige? Yor tuwag kay milla ma ɓasag lo kay mige? Kuɗ joota vag ta dak-dakka, kuɗ sulukŋa vag ma suwina, nan hin lasta kayni co kagu.

¹⁶May, nisi kaf sa min jetag goyo ma jetis goyo, sa gaw kagŋa kaf ma kal goy daŋgaya; nisi sa vurumagu sumun ma vurumsiya, nisi sa tag ɓuraŋi nan ma hinsi vun ɓuraŋŋa.

¹⁷May nan ma yerag goyo, nan ma jun vun-milla vagu, Din mi Ma-Vatɗina. Kay nisi yag ala ta noyay goyta, Siyon na'ta ta sa var ka' loɗita.

¹⁸Ma-Vatɗina ka di ala: Humgiya, sa gorvona hay guɗukŋa vi Yakub nan min hotsiyaya, nan min li slugota kay ziyna visiya; ziyna ma hot in kulo hay baŋalam ma ɦoy gaana, ziyna ma mulda hot in ɗawni ki nam ays jew nala.

¹⁹Lop ma slugona ma fok kulo jarsi pa, ciriyna vi firita kaw; nan ma biyasi ŋolo, nisi ma hot bugolsi loɗi; nan ma slisi yisi kulo'o, sa ma cen kuɗsi loɗi.

²⁰Gurona visiya ma hot ki jew nala, jafna visiya ma lak iri vok iranu, sum sa curoɗsin kaf nan ma watsiya.

²¹Mulla visiya ma may goy jarsi pa, sa ma ti mul kisina ma kali goy haysi pa, nan ma maram goboyo, nam ma co katanu; kay sa ma min co tanu kay tuwam valamu nam gige? Di mi Ma-Vatɗina.

²²Nigi ma muɗ si sumuna vanu, nan ma muɗ mi Lawna vigiya may.

²³Biira vi Ma-Vatɗin ka tuɗ aya, nam muɗi ɦiy ŋolo, niy ma sin ka tuɗaya, nam min ko gaa kay sum sa joona.

²⁴ɦiyda ŋolda vi Ma-Vatɗina as tun gaaɗi, ta-ta nam hob vun varta vi dikam tuwa. Nigi ma hum caw slen kayni hay liyn ma vokŋa.