Read Masana YEREMIYAS 31 Bible Online

YEREMIYAS 31 - Masana bible

YEREMIYAS 31

¹Ma-Vatɗina di'e: Hay liy namna ɗawni, nan ma muɗ mi Lawna vi jafna vi sum sa Israyella kafe, nisi ma muɗ si sumuna vanu.

²Ma-Vatɗina ka di ala: hay fulda nan ɗek slugota vanu goyo tam caw sum sa hin goy vun kew-gaferaŋa, sum sa Israyella ka tuɗ tam liyna visi ma tun-sukka.

³Goy gine pa Ma-Vatɗin ɗek tuwam goy tanu: nan minaŋu hiɗi minda vatɗita; kuɗ na'ta nan ŋom ŋaata-ŋolda van kaŋu.

⁴Nan ma hot tunag gaa lo, nak ma tun gaa'a, nak goor-wayata vi Israyel. Nak ma gan hiɗi gilereŋŋa, nak ma kal goy jar nul ma piira hiɗi firita.

⁵Nak ma pi gulda-guldana kulo kay hiɗiyta vi Samariya lo, sum sa zumna ma pi gulda-guldana, nisi ma jam vuɗamu may.

⁶Kay buura ka co'o, mi buur ma sum sa ŋomda ma siwel kulo kay hiɗiyta vi Efrayim ala: Yawgi kulo'o, tuɗay hay Siyon, kat Ma-Vatɗina Lawna vaya.

⁷Kay Ma-Vatɗina ka di ala: Patgi ciriy ma firina kay jafna vi Yakub, ligi firi ŋolo kay jaf-sumuna. Hin sumun humgiya, Vulum suburta, digi kaw ala: Ma-vatɗina, suɗaŋ caw sumuna vaŋu sa Israyella goyo.

⁸Humgiya, nan min yawsi ay hay nagat ta gal gaata pa, nan ma toksiyay hay sin-nagat pa; jarsiya sa ma dukina hiɗi sa ma dirlayna ka'a, cata ta hayta hiɗi cata ta min puka; kayni mi vok ma ŋol ɦini-ɦinina ma min hotay tani.

⁹Nisi ma co hiɗi zimiyna, nan ma tun voksiya hiɗi giɗel-delta; nan tuɗsi kat niy-ma-riŋŋa, hay hagata ta tapay kepta ta nisi as ge'ɗi; kay nanu mi Bum sum sa Israyella, Efrayim kayni mi goora van ma vuɗi jewna.

¹⁰Jaf-sumuna, humgi yoboyna vi Ma-Vatɗina, nigi ma siwelem goy hay joko ma ginena, nigi ma di ala: namu ma mer sa Israyel goyna ma hot toksiya lo, nam ma ŋomsiya ki sa ma ŋomda ŋom farayna valam nala.

¹¹Kay Ma-Vatɗina but jafna vi Yakub goyo, nam butsi goy hay ɓam sa ma dono suwsi nisiya.

¹²Nisi ma co'o, nisi ma pat siwel ma firina kulo kay hiɗiyta vi Siyon; nisi ma jaŋ kuɗ farayna vi Ma-Vatɗina, alkamarena, vin ma jibetna, mula, fok-dimina hiɗi luwayna; ciwta visiya ma muɗ ki jardeŋŋa ma niyn yamay kalamna nala, nisi ma kal hay lasta loɗi.

¹³Ki kayn nala guro-boyna ma li firiya kuɗ nul ma piira, guro-joriyona hiɗi sum sa maariyana ma li firi kaw, nan ma muɗ do'olla visi goy firita ŋolda, nan ma teŋsi irsiya; nan ma vulsi firita bugol yorta visiya,

¹⁴Nan ma hob hay muliyan-sa-ɗifinna visiya hiɗi mul-sliwna, sumuna vanu haysi ma hob hiɗi sle ma ŋaana vanu, Din mi Ma-Vatɗina.

¹⁵Ki kayn nala Ma-Vatɗin ka di'e: Sumun ka hum winekŋa hay Rama, tiyna hiɗi yorta ŋolo, Rakel ka tiy kay gurona va'a; na' may min ala sa teŋa' ira' noŋɗi, kay nisi say loɗi.[6]

¹⁶Kay na'ta Ma-Vatɗin ka di ala: Zanagu, sletag zimiy ma kiragŋa goyo; kay nak ma fi wurakŋa kuɗ lopna vagu, Din mi Ma-Vatɗina; nisi ma hotay goy hay nagata vi sa ma gawta pa.

¹⁷Hay vokka nak ma fi cubta-sle'ta, Din mi Ma-Vatɗina, gurona vagu ma hot hay nagata visiya.

¹⁸Nan hum jafna vi Efrayim ka yor tuwsi ala: Naŋ watanawa, nan fi wattawa ki goor-putna ma sa may ɗelemɗina nala; naŋ hotanay taŋu, nala nan ma hotay taŋu, kay naŋu mi Ma-Vatɗina Lawna vanu.

¹⁹Bugol nan cal goy calla, nan gar hamda yo; bugol nan wi joota van witna, nan to ɓan gaa ɓalanu, nan muɗi zulo'o, caway kaw, kay nan ka ziy zulota vi joriyota vanu.

²⁰Efrayim kayni mi goora van ma wiina, goor ma sleɗan hayanna su? Kay hay li ma nan law kalam suwa, human gan kalam suwa kaw; gulan van bat-bat' kalamu: Nan ma li slugot kalamu, Din mi Ma-Vatɗina.

²¹Pag gu ma ɗek goyn kulo'o, inag nagan kulo'o, lag ŋali hiɗi hagata ta nak sli haya'ta. Hotagiya, goor-wayata vi Israyel, hotagay hay hoyok-ziyna vag lakŋi.

²²Nak ma tulur goy ki kayn nala ta-ta lancitige? Goot-cata ta viy goyta? Kay Ma-Vatɗina kot va ma wuliyawa gaa kay nagata. Cata ma gar sa jufna.

²³Ma-Vatɗina vi vok-ma-duura, Lawna vi Israyel ka di ki kayn nala: Kayni lo mi slen ma nisi ma dum hay nagata vi Yuda hiɗi hoyok-ziyna visiya: Hay li ma nan hot sa gorvona visi ayawa, hin Ma-Vatɗina gag bolo, musag hay ɗigerta, hiɗiyta ta peldetta.

²⁴Ɗawni jafna vi Yuda hiɗi hoyok-ziyna visi kaf ma lak haya, sa zumna hiɗi sa ŋom farayna.

²⁵Kay sa laat lisina nan ma vat laata visiya, sum sa sutaysi toyna nan ma hobsi haysiya.

²⁶Bugol kayni nan zliy kulo'o, nan wi ala senda ta nan kala'ta na' kiran ŋaa'a ŋolo.

²⁷Ma-Vatɗina di'e: Humgiya, buura ka ma'a, mi buura ma nan ma biya jafna vi Israyel hiɗi jafna vi Yuda, nan ma biyasi hiɗi jaf-sumuna hiɗi jaf-muura.

²⁸Ki nan ŋomsiya kay nisi ma pat slen kulo'o, kay kus slen gaa'a, kay ɦo slen goyo, kay ɓulak slen goyo, kay li joo'o kaw, nala nan min ŋomsi lo kay in slen kulo'o, kay pi slen gaa'a, Din mi Ma-Vatɗina.

²⁹Hay buur namna ɗawni, dit ta ala: «sumayna mut vuɗ gulda-gulda ma bay-niina, may guron gaŋsi zlayaya», dit na'ta sa as da' loɗi.

³⁰May gigekaw mit ɗawni kuɗ joota valam kay tuwamu; la san gigekaw mut vuɗ gulda-gulda ma bay-niynawa, ma zlay ɗawni mi siyam namu.[7]

³¹Ma-Vatɗina di'e: Humgiya buura ka co'o, mi buura ma nan jun bonota wulita hiɗi jafna vi Israyel hiɗi jafna vi Yuda,

³²may ki bonota ta nan juna' hiɗi sumaysita naɗi, hay buura ma nan moksi hiɗi ɓanu, kay kalsiyay goy hay nagat Egipte, bonota ta nisi kusa'ta, hiɗi ta nan mi busiyata pet, Din mi Ma-Vatɗina.

³³May kayni ti bonota ta nan min juna' hiɗi jafna vi Israyel, bugol buur namna ɗawni, nan ma tun gatta vanu kalaf hay diksiya; Nan ma ɗo kalaf hay diksiya, nan ma muɗ mi Lawna visiya, nisi ma muɗ si sumuna vanu may. Din mi Ma-Vatɗina.

³⁴Sa hen tani ma hat sugolomnaɗi, sa hen ɗawni ma hat ɓasulumnaɗi kaw, sa as di ala gargi Lawna loɗi. Kay nisi kaf ma wanu, tun caw tam ma goora pa ta-ta tam ma ŋolla, Din mi Ma-Vatɗina. Kay nan ma vul gida kay jiw-zlata visiya, human ma gan kay sulukŋa visi loɗi.

³⁵Kayni ti dita vi Ma-Vatɗina ma kot fatta kay fo liyn goyo hay falayta, ma kot tilla hiɗi mislekŋa kay fo liyn goyo hay henjeta, namu ma poŋ niy-lum ma ŋolla kulo'o, ma gi niy-lumna pesle, namu ma semda valam ala Ma-Vatɗina vi vok-ma-duura:

³⁶La gatta cani vat goy vok iranu, jafna vi Israyel kaw ma vat goy vok iranu kay dok-doko. Din mi Ma-Vatɗina.

³⁷Ki kayn nala Ma-Vatɗin di'e: la dukalawn waŋ kuloni sa as ŋaɓamu, la sem ma tuni gaan kayni sa as ŋaɓamu, ki kayn nala nan ma noy jafna vi Israyel kaf goyo, kuɗ slen kaf ma nisi lumna, Din mi Ma-Vatɗina.

³⁸Ma-Vatɗina di'e: Buura ka tuɗay ɗaw, mi buura ma hoyok-ziyna ma inis hay sem Ma-Vatɗina, tun caway hay simdira vi Hananeel pa, ta-ta tam vun-galana vi gefna.

³⁹Zigewna ma junis kulo kiram mara ɗiger lo, ta-ta tam hiɗiyta vi Gareb, nam ma ŋuy hay galla vi Gowat.

⁴⁰Lokŋa vi tuw ma mitina kaf hiɗi butuw-kuna, sinen kaf ta-ta tam lokŋa vi Sedron, ta-ta tam gefna vi vun-ziyna vi kulumayna hay gal kuɗuwu, ma vulis goy kaf mi Ma-Vatɗina, nam as ɦo gaa loɗi, as ɓulak goy loɗi kaw.