Read Masana YEREMIYAS 32 Bible Online

YEREMIYAS 32 - Masana bible

YEREMIYAS 32

¹Kayni mi yoboyna ma Ma-Vatɗina dum tam Yeremiyas, hay busata doogota vi mulda vi Sedekiyas, mulla vi Yuda, kayni ti busata doogo yam glafandita vi mulda vi Nebukadnesar.

²Hay na'ta, Yerusalem ay ŋuyi kay mulla vi Babilon, Yeremiyas ma jobta ka duki kalafi hay wur-daŋŋa vi ziy ma daŋgayna, ma ka hay ziyna vi mulla vi Yuda.

³Sedekiyas mulla vi Yuda gum daŋgaya, kay mige nam ka di vun-jobta ala: Ma-Vatɗin ka di ala nam ka vul hoyok-ziyn tani goy hay ɓam mulla vi Babilon, mulla vi Babilon ma sla'a, nam di nala kayn kay mige?

⁴Kay nam ka di lo ala Sedekiyas mulla vi Yuda ma hulot goy vun ɓam sa Kaldeenɗi, may nam ma vulis goy hay ɓam mulla vi Babilon, nisi ma law vun tuwsiya, irsi ma wi tuwamu;

⁵ala mulla vi Babilon ma nar Sedekiyas hay Babilon, nam ma mus ɗawni ta-ta human ma gan kalamu, Din mi Ma-Vatɗina, la nigi dur sum sa Kaldeena, donogi ma tisiɗi.

⁶Yeremiyas di ala: Ma-Vatɗina di yoboyna valam tan ala:

⁷Humaŋu, Hananeel, goora vi nasum Sallum ka co kataŋu kay daŋ ala; gusaŋ sinena vanu ma ka hay Anatot, kay sa ma as gus sine namna jewna mi naŋu.

⁸Hananeel goora vi nasun co katanu hay wur-daŋŋa vi daŋgayna, kuɗ dita vi Ma-Vatɗina, nam di tan ala: gusaŋ sinena vanu ma ka hay Anatot, hay nagata vi Benyamin, kay sa ma yaw vocot jewe, gus sinen namna jewe kaw mi naŋu, gusaŋga. Nala nan wi ala kayn ti dit ta may vi Lawna.

⁹Sine ma ka hay Anatotna, sinena vi Hanameel goora vi nasunu, nan gusumu, nan ŋa gurjut kalamu ir sikel* doogo yam siɗiya.

¹⁰Nan ɗo ɗerwelda, nan tun tampoŋ ka'a, nan yaw sum sa di-goyn jarma'a, nan ŋa gurjuta hay va ma ŋa nekka.

¹¹Bugolda nan sli ɗerwelda ta gusta vi sinen ɗoy haya'ta, ɗerwel ta tampoŋ tuni ka'ta, kuɗ gatta ta sumun ka li lop hiɗi na'ta, hiɗi ɗerwelda heta ta vuna' goy malita;

¹²nan vul ɗerwelda ta gusta vi sinen ɗoy haya'ta tam Baruk goora vi Neriya, goora vi Maaseya, vok ir Hanameel, goora vi nasunu, vok ir sa di-goyna sa ɓir ɓisi gaa kuɗ ɗerwelda vi gusta vok ir Yudiyan kaf sa ka dakay hay wur-daŋŋa vi ziy ma daŋgayna.

¹³Nan vul dit kayni vok irsi kaf tam Baruk ala:

¹⁴Ma-Vatɗina vi vok-ma-duura, Lawna vi Israyel di'e: Yawaŋ ɗerwel lakŋi, ɗerwel ma gusta vi sinen ɗoy hayamna lakŋi, ma tampoŋ tuni hayamna hiɗi ma vunam goy malina, naŋ ma lakam hay doway nagana kay nam ma li ŋomay ta-ta.

¹⁵Kay Ma-Vatɗina vi vok-ma-duura, Lawna vi Israyel ka di ala: sumuna ma gus ziy mara lo, gus sine mara'a hiɗi gulda-gulda mara lo hay nagat tani.

¹⁶Bugol nan vul ɗerwelda vi gusta vi sinena tam Baruk goora vi Neriya vulla, nan ka siɗaw tam Ma-Vatɗin ala:

¹⁷Hih! Bum-Sumuna Ma-Vatɗina, naŋu ma li wuralawna hiɗi nagata hiɗi donota vaŋ ta ŋolda, hiɗi ɓaŋ goy meɗiya kaw, kay va ma suwaŋ naŋ mayɗi.

¹⁸Naŋ li slugota ta-ta tam jafsi voksi birimi. Jiw-zlata vi sumayna naŋ tuna' kay gurona visi sa bugolsina. Naŋu mi Lawn ma ŋolla, ma donona, semda vaŋu ala Ma-Vatɗina vi vok-ma-duura.

¹⁹Naŋ ŋolo hay gatta, dono'o hay lopna; iraŋ ka mali goyo kay gurona vi sumun kafe, kay vul mi gigekaw kuɗ lopna valamu valamu, kuɗ vuɗna vi lopna valamu valamu.

²⁰Naŋ ka li ɗekka hiɗi gul-yalda hay nagat Egipte ta-ta vaydi, hay Israyel jar sumuna kaw, naŋ ɗek semda vaŋawa goyo ki na' ka vaydi nala.

²¹Sumuna vaŋu sa Israyella naŋ kalsi ayawa goy hay nagat Egipte pa, hiɗi ɗekka hiɗi gul-yalda, hiɗi ɓan ma donona, hiɗi gilaŋaŋ kulo meɗiya kaw, hay li ma naŋ kal narta ŋolda hay sumuna.

²²Naŋ vulsi nagat kaynawa, nagata ta naŋ yi va kaŋu kay vula' mi sumaysiya, nagata ta miira hiɗi yumda ka riŋ goy haya.

²³Nisi cooya, nisi lakawa hay nagat na'ta, may nisi min hum kuɗ dita vaŋɗi, nisi min hum kuɗ gatta vaŋ noŋɗi, slen kaf ma naŋ vulsi hagat kay nisi ma lumu, nisi min lumɗi. kuɗ na'ta naŋ hin lasta na'ta nig gaa kisiya.

²⁴Humgiya, nisi ka gi damna tam hoyok-ziyn kayni kay slumu, hoyok-ziyna ma vulis goyo hay ɓam sa Kaldeena sa ka ŋuyumu, kew-gaferaŋa, mayta hiɗi moyna kolawa kisiya, va ma naŋ di kalamna coowa, naŋ ka wum hiɗi iraŋu.

²⁵May Bum-Sumuna Ma-Vatɗina, naŋ danawa ala: gusaŋ sinen hiɗi gurju'u, yawaŋ sum sa di-goyna. nala hoyok-ziyn vuli goyo hay ɓam sa Kaldeena.

²⁶Ma-Vatɗina ka di yoboyn tam Yeremiyas ala:

²⁷Humgiya, nanu mi Ma-Vatɗina, Lawna vi sumun kafe. Va mara ma suwan ka su?

²⁸Kay na'ta Ma-Vatɗina ka di ala: Humgiya, nan vul hoyok-ziyn kayni hay ɓam sa Kaldeena, hay ɓam Nebukadnesar mulla vi Babilon, nam ma slumu.

²⁹Sum sa Kaldeena sa ŋuy hoyok-ziyn kayni ma cuk kulo hayamu, nisi ma tun kut kuɗ hoyok-ziyna, ma ŋalam goyo, ziyna ma nisi li ɗifin ma no'osna tam Baal kulo kalamna, ziyn ma nisi yam urdin kulo talamu tam lawayn ma waana kay muɗan ɦiya.

³⁰Kay gurona vi Israyel hiɗi gurona vi Yuda lum mi sle ma joona vok iranu hay joriyota visi pa, gurona vi Israyel ɓulakan dikanawa hiɗi lopna vi ɓisiya, Din mi Ma-Vatɗina.

³¹Kay sum sa hay hoyok-ziyn kayni muɗan ɦiy ŋolo, ɓulakan dikanu hay buur ma inimna pa ta-ta vaydi, nala kaw nan min yawam goy vok iranu,

³²kuɗ joota ta gurona vi Israyel hiɗi gurona vi Yuda li'e kaf kay ɓulakan dikanu, nisiya, muliyana visiya, sa ŋulona visiya, muliyan-sa-ɗifinna hiɗi sa jobta visiya, sumuna vi Yuda hiɗi sum sa hay Yerusalemna.

³³Nisi muɗan ŋorsiyawa, nisi may ɗuwanɗi; sumun vulsi hattawa, vulsi hattawa hay graw culumta pa, may nisi min huma kay vi hattaɗi.

³⁴Nisi lak liwisna visiyawa hay ziyna ma semda van ka yiy talamna, kay muɗ ziyn liwisi.

³⁵Nisi in liyn ma ɗiŋiriŋŋawa tam Baal hay lokŋa vi Ben-Hinnom, kay vul guro sa jufayna hiɗi guro sa boyna visiya goy tam Molok, va ma nan may vulsi hagat kalamɗina; nan may varay noŋ ne'ɗi ala nisi ma li suluk ma ki kayn nala, kay kal jafna vi Yuda hay sulukŋa.

³⁶Wulin kayni, humgi dita vi Ma-Vatɗina, Lawna vi Israyel: Hoyok-ziyn tani ma nigi ka di kalam ala: nam ma vulis goy hay ɓam mulla vi Babilon, sumun kolawa kalamu, hiɗi kew-gaferaŋa, mayta hiɗi moyna;

³⁷humgiya, nan ma toksiyay hay nagata ta nan digiɗsi goy haya'ta pa, hay ɦiyda vanu, hay dikan ma ɓulakay ŋolla, hay purcakka vanu; nan ma hotsi hay liyn tani, nan ma hinsi lak hayam hiɗi sle'ta.

³⁸Nisi ma lak si sumuna vanu, nan ma mus mi Lawna visiya may.

³⁹Nan ma vulsi dikga kepta hiɗi hagata kepta, kay nisi ma li nar kan dok-doko, kay nisi ma fi ŋaata, gurona visi sa bugolsin nala kaw.

⁴⁰Nan ma jun bonota ta vatɗit hiɗi nisiya, nan ma hinsi goy noŋɗi, nan ma lisi ŋaata. Nan ma tun narta vanu hay diksiya, kay nisi ma cal goy hiɗi nanɗi.

⁴¹Nan ma vara kay lisi ŋaa'a, nan ma pisi gaa hay nagat tan gasiya, hiɗi dikan kaf, hiɗi ciwta van kafe kaw.

⁴²Kay Ma-Vatɗina ka di ala: ki nan hin joota ŋolda co kay sum nisin kayni nala, nala nan kaw ŋaata ŋolda ta nan var kay li tisiya, nan ma la' tisiya.

⁴³Nagat tani ta nigi ka di ka' ala: kayni mi fulu, sa may haya'ɗi, sine may haya'ɗi kaw, na' ma vulis goy hay ɓam sa Kaldeena, may naga na'ta sumun ma hot gus sinen haya' lo,

⁴⁴sumun ma hot gus sinen haya' hiɗi gurjuta, sumun ma ɗo ɗerwel ma gus sinena, sumun ma tun tampoŋ kalamu, sumun ma yaw sa di-goyna lo hay nagata vi Benyamin hiɗi gal vi Yerusalem, hay hoyok-ziyna vi Yuda, hay hoyok-ziy ma kulo kay hiɗiyna, hay hoyok-ziy ma beɗna hiɗi hoyok-ziy ma gal kayamna; kay nan ma hot sa gorvona visi aya, Din mi Ma-Vatɗina.