Read Masana YEREMIYAS 33 Bible Online

YEREMIYAS 33 - Masana bible

YEREMIYAS 33

¹Ma-Vatɗin ka di yoboyn tam Yeremiyas sem ma ma'na lo, kayn hay li ma nam ay duki kalafi hay wur-daŋŋa vi ziy ma daŋgayna. Nam dum ala:

²Kayni ti dita vi Ma-Vatɗina, ma li slen namna, Ma-Vatɗina ma kot slena, lakam gaa hay liyna valamu, namu ma yum ala Yaweh.

³Yaŋ semda vanu, nala nan ma hotaŋ dita; nan ma daŋ sle ma ŋulona, sle ma ŋayayna, ma naŋ may wumɗina.

⁴Kay Ma-Vatɗina Lawna vi Israyel ka law kay ziy ma hay hoyok-ziyn tani, hiɗi ziyna vi mulla vi Yuda ma gi dam talamu kay tom gaa'a, hiɗi kew-gaferaŋa ma tom gaa'a.

⁵Hay li ma nisi kalawa kay dur sa Kaldeena, hay li ma ziyna visi hobawa hiɗi tuwna vi sa mitina sa nan min calsiya hay ɦiyda hiɗi purcakka vanu, nan ma ŋay iran kay sum sa hay hoyok-ziyn tani kuɗ joota valamu.

⁶Humgiya, nan ma yersi goyo, nan ma gaŋsiya, nan ma vulsi sle'ta hiɗi ŋaata ŋolo.

⁷Sa gorvona vi Yuda hiɗi sa gorvona vi Israyel nan ma hotsiyaya, nan ma hot tunsi hay liyna visiya ki jew nala.

⁸Nan ma porsi goyo kay jiw-zlata kaf ta nisi la' katanu, nan ma vulsi gida kay jiw-zlata kaf ta nisi la' katanu, nan ma vulsi gida kay yaw ma nisi yaw kulo katanu.

⁹Hoyok-ziyn tani ma muɗ mi va ma firiyan dikanu, vulan suburta, vulan gajijita kaw, jar jaf-sum sa hay nagat kaf, sa min hat ŋaata kaf ta nan li tisiya, nisi ma li ɦuyum', suksi ma yaw kelsiya, kuɗ ŋaata hiɗi farayn kaf ma nan min vul tisiya.

¹⁰Ki kayn nala Ma-Vatɗina ka di'e: Liyn tani ma nigi ka di kalam ala: nam hini goy ful wiŋ', sa may hayam loɗi, muur may hayam loɗi, hoyok-ziyna vi Yuda hiɗi hagana vi Yerusalem hini goy ɦawa hiweŋ', sa may hayam loɗi, ziy may hayam loɗi, muur may hayam loɗi, may sumun ma hum,

¹¹ciriyna vi firita hiɗi firita-ŋolda, nulla vi dabayna, della vi nisi sa di ala: Suburgi Ma-Vatɗina vi vok-ma-duura, kay Ma-Vatɗina nam ŋaa'a, kay ŋaata valam ka ta-ta hay vatɗita. Della vi nisi sa li ɗifinna vi lop ma slugona hay ziyna vi Ma-Vatɗina. Kay sa gorvona vi nagata nan ma hotsiyaya, nan ma hot tunsi hay liyna visi ki jew nala. Din mi Ma-Vatɗina.

¹²Ki kayn nala Ma-Vatɗina vi vok-ma-duura ka di'e: liyn namna ma hini goy ful hiweŋ' tani, ma sa hayamɗi lay muur hayamɗi lay, hiɗi hoyok-ziyna valam kaf tani, sa ŋom fok-dimina ma in ziyna visi hayam lo, nisi ma vul tun-sukka mi farayna visi hayamu.

¹³Hay hoyok-ziy ma kay hiɗiyna, hay hoyok-ziy ma hay beɗna, hay hoyok-ziy ma gal kayamna, hay nagata vi Benyamin hiɗi ziy ma gal Yerusalemna, hay hoyok-ziyna vi Yuda, fok-dimina ma jik vok sa ma ŋaɓam goyna lo, Din mi Ma-Vatɗina.

¹⁴Ma-Vatɗin di'e: Buur ka tuɗay ɗaw, mi buura ma nan ma hob vun yoboy ma ŋaana ma nan dum kay jafna vi Israyel hiɗi jafna vi Yuda.

¹⁵Hay buur namna hiɗi liy namna ɗawni, nan ma vuɗ jafna ma ɗigera mi David, nam ma li ɗigerta hiɗi gasita hay nagata.

¹⁶Hay buur namna ɗawni, jafna vi Yuda ma suɗ goyo, Yerusalem ma fi sle'ta hay musta va'a; nisi ma ya' ala: Ma-Vatɗina ma ɗigera vuma'a.

¹⁷Kay Ma-Vatɗina ka di ala: mulda vi David sa as vurna ka' dok-doko, nam ma mus kay zlamda-mulda vi jafna vi Israyel.

¹⁸Muliyan-sa-ɗifinna sa Levitna as kiɗa vok iran noŋɗi, nisi ma vurna tuwsiya kay li ɗifin ma ŋal-goyna, ŋal no'osna hiɗi sle ma vulda, li ɗifini hay buurta kafe.

¹⁹Ma-Vatɗina ka di yoboyn tam Yeremiyas ala:

²⁰Humgi dita vi Ma-Vatɗina: nigi asay a kus bonota ta nan juna' jaran hiɗi falayta hiɗi henjetɗi, falayta hiɗi henjeta hin hay liyamna dok-doko.

²¹Nala kaw bonota ta jaran hiɗi David sa ma sunda vanu as kusɗi, sa as hin baŋalam hay mulda dok-dok nala kaw, bonota ta jaran hiɗi sa Levitna, muliyan-sa-ɗifinna sa ka sunanna as kusɗi.

²²Ki mislek ma dukalawna sa as ŋamɗi nala, ki san as ŋa ŋesl ma goloŋ kel niynɗi nala, nan kaw ma biya jafna vi David sa ma sunda vanu ki kayn nala, hiɗi sa Levitna sa ka sunanu kaw.

²³Ma-Vatɗina ka di yoboyn tam Yeremiyas ala:

²⁴Va ma sumun ka dumna naŋ may humumɗi su? Nisi ka di ala jaf ma ma'na ma Ma-Vatɗin vilekemna, nam noyomawa goyo. Ki kayn nala nisi ka pan sumuna vanu, sumuna vanu may kirsi si sum noŋɗi.

²⁵Ki kayn nala Ma-Vatɗin ka di'e: Lali nan jun bonota van juni hiɗi falayta hiɗi henjetɗi, lali nan tun gatta vi dukalawna hiɗi nagat tuniɗi,

²⁶jafna vi Yakub hiɗi jafna vi David ma sunda van kaw nan ɗawn ma noyom goyo, sum sa ti mulda kay jafna vi Abraham, Isaak hiɗi Yakub ɗawni, nan ma vileksi jar jaf mara'a. Kay nan ma hot sa gorvona visi aya, nan ma li slugot kisiya.