Read Masana YEREMIYAS 34 Bible Online

YEREMIYAS 34 - Masana bible

YEREMIYAS 34

¹Yoboyna vi Ma-Vatɗina ma nam dum tam Yeremiyas, hay li ma Nebukadnesar mulla vi Babilon, hiɗi sojena valam kafe, hiɗi muliyana vi nagata kafe sa gaa kuɗ gaŋeraŋa valamu, hiɗi sumun kaf ka li duura hiɗi sa Israyella hiɗi hoyok-ziy ma kuɗsina: Ma-Vatɗina ka dum ala:

²Ma-Vatɗina Lawna vi Israyel ka di'e: Tuɗaŋu daŋ tam Sedekiyas mulla vi Yuda ala: hoyok-ziyn tani nan min vulum hay ɓam mulla vi Babilon, nam ma ŋalam goy hiɗi kuta.

³Naŋ kaw, naŋ as hulot goy vun ɓalamɗi, naŋ ma vulis goy hay ɓalamu, iraŋ ma wi mulla vi Babilon, nigi ma law vun tuwgiya, naŋ ma kal hay Babilon.

⁴May Sedekiyas mulla vi Yuda, humaŋ yoboyna vi Ma-Vatɗina: Ma-Vatɗin ka di kaŋ ala: Nisi ma caŋ goy hiɗi kew-gaferaŋa noŋɗi.

⁵Naŋ ma mit hay sle'ta; ki nisi ŋal urdin kay sumiyaŋu muliyan sa jewaŋ naŋŋa nala, naŋ kaw nisi ma ŋal urdin kaŋu, nisi ma tiyaŋ ala: Yayyo! Mulla. Kay vunan di dit kaynawa, din mi Ma-Vatɗina.

⁶Yeremiyas ma jobta di slen kayni kaf tam Sedekiyas mulla vi Yuda, hay Yerusalem.

⁷Hay na'ta sojena vi mulla vi Babilon ka dur Yerusalem hiɗi hoyok-ziy hegena vi Yuda kafe, Lakis hiɗi Azeka kaw, kay nam cani mi hoyok-ziy ma donona ma hin kuɗ hoyok-ziyna vi Yuda tuta.

⁸Ma-Vatɗina di yoboyna valam tam Yeremiyas, kayni bugol liyn ma Ezekiyas ŋra vunam hiɗi sum sa hay Yerusalem kaf, kay siwel butta-goyta,

⁹kay a gigekaw ma but sa jufna valam ma gorvona lebo cata valam ta gorvot goyo, sa ma Hebrena hiɗi cata vi sa ma Hebrena, a san gigekaw ma ŋom ɓasulum ma yudiyan gorvoɗi.

¹⁰Sum sa ŋulona hiɗi sumun kaf sa ŋra vunsina yi va kisiya kay cuk gorvona visi sa jufayna hiɗi sa boyna, kay ŋomsi gorvo loɗi; nisi huma, nisi cuksiya.

¹¹May bugolda nisi muɗ varta visiya, gorvona sa jufayna hiɗi sa boyna sa nisi cuksi goyna nisi hot yawsi lo, nisi lisi dono'o kay hotsi hay gorvota.

¹²Ki kayn nala Ma-Vatɗina ka di yoboyna valam tam Yeremiyas ala:

¹³Ma-Vatɗina Lawna vi Israyel ka di ala: Nan jun bonot hiɗi sumaygiya, hay buur ma nan kalsiyay goy hay Egipte pa, hay nagata ta nisi ay gorvo'o; nan di tisi ala:

¹⁴Hay li ma busat asawa siɗiya, san gigekaw, ɓasulum ma Hebrena ma gus tuwam goy kalamna nam ma butum goyo; nam ma sumun ir busat karkiya, bugolda nam ma hinim goy butiya. May sumaygi min human noŋɗi, nisi min jak humsiɗi.

¹⁵May vaydi nigi kay tuwgi varawa, nigi li sle ma ɗigerawa vok iranu, hay li ma nigi lak hay ziyda ta semda van tuni ta'ta, nigi ma ŋra vungiya kay gigekaw but sugolom ma gorvon goyo goyo.

¹⁶Wulin lo nigi hotiyawa bugolgiya, nigi muɗ semda vanawa liwisi lo; kay gorvona sa jufayna hiɗi sa boyna sa nigi butsi goyna nigi hot yawsiyawa lo, nisi goy butiya may nigi lisiyawa dono'o a nisi hotay goy gorvo'o lo.

¹⁷Kay na'ta Ma-Vatɗin ka di ala: Nigi min hum kuɗanɗi, kay gige gige jargiya min hin sugolomna hiɗi ɓasulumna goy butiɗi, ki kayn nala, nan min but kew-gaferaŋa, moyna hiɗi mayta goy katgiya, nan ma muɗ sum sa hay nagat kaf huyum kuɗgiya.

¹⁸Sum sa kus bonota vanna, sa min li kuɗ va ma nisi ŋra vunsi kalam vokannaɗi, nisi ka goor-putn goy ma' jik jaramu, sum nisina nan ma vulsi goyo,

¹⁹muliyana vi Yuda hiɗi muliyana vi Yerusalem nan ma vulsi goyo, sa patayna, muliyan-sa-ɗifinna, hiɗi sum sa hay nagat kafe sa jik jar goor-putna ma iram kaay goy ma'na.

²⁰Nan ma vulsi goyo hay ɓam sa gawt kisina, hay ɓam sum sa min ba irita visiya, tuwna visiya ma muɗ mi tina vi layayn ma dukalawna hiɗi muur ma kay nagata.

²¹Sedekiyas mulla vi Yuda hiɗi sa ŋulona valamu nan ma vulsi goy hay ɓam sa gawt kisina, hay ɓam nisi sa min ba irita visiya, hay ɓam sojena mulla vi Babilon, nam ma kalsi goy gine'e hiɗi nigiya.

²²Ki kayn nala nan ma vulum hagata, nan ma hotomi kat hoyok-ziyn tani; nisi ma ŋuyumu, nisi ma slumu, ma ŋalam goy hiɗi kuta. Hoyok-ziyna vi Yuda nan ma muɗum goy mi ful ma hiweŋŋa ma ziy may hayamɗina, Din mi Ma-Vatɗina.