Read Masana YEREMIYAS 35 Bible Online

YEREMIYAS 35 - Masana bible

YEREMIYAS 35

¹Yoboyna vi Ma-Vatɗina ma nam dum tam Yeremiyas, hay liyna vi Yoyakim, goora vi Yosiyas, mulla vi Yuda. Ma-Vatɗin ka dum ala:

²Tuɗaŋ hay ziyna vi sum sa Rekabitna, lawaŋ tisiya; naŋ ma narsi hay ziyda vi Ma-Vatɗina, kalaf hay goor-ziy tara kepe, naŋ ma vulsi vinna kay nisi ma cumu.

³Nan vi Yaazaniya, goora vi Yeremiyas, goora vi Habatsiniya, ɓosiyomna, gurona valam kafe, sum sa hay jafna vi Rekabitna kafe kaw.

⁴Nan tuɗsi hay ziyda vi Ma-Vatɗina, hay ziyda-kalafta vi gurona vi Hanan, goora vi Yigdeliya, sana vi Lawna, goboy hiɗi ziyda-kalafta vi sa ŋulona, kulo kay ziyda-kalafta vi Maaseya, goora vi Sallum ma ŋom vun-ziyda.

⁵Nan yaw tasan hobay hiɗi vinna, hiɗi ŋalayna, nan lakam vok sum sa Rekabitna, nan ka disi ala «cigi vinna».

⁶May nisi hot dit ala: Numa as ci vinɗi; kay Yonadab goora vi Rekab ma buma'na vulma ditis ala numa lay gurona vuma lay, hagat may kuma kay ci vin noŋɗi.[8]

⁷Ala hagat may kuma kay in ziyɗi, hagat may kuma kay cuk jaf gaaɗi, numa as pi gulda-guldaɗi, ŋomom ir vumaɗi kaw; hay buura vi irita vuma kaf, kay numa ma li ziyna vuma hay guɗukŋa, kay numa ma lak ta-ta hay nagat ta numa ka haya' wulin pulta.

⁸Numa li kuɗ slen ma Yonadab goora vi Rekab ma buma'na dumat kafna, hay buura vi irita vuma kaf numa may ci vinɗi, numaɗi, boyna vumaɗi, gurona vuma sa jufayna hiɗi sa boynɗi kaw;

⁹numa as in ziy kay lak hayamɗi, numa as pi gulda-guldaɗi, numa as gar sineɗi, numa as cuk jaf gaaɗi kaw;

¹⁰numa bur kayn hay guɗuku, slen ma buma Yonadab duma'ta kafna numa li kayn kuɗumu.

¹¹Hay li ma Nebukadnesar mulla vi Babilon co dur nagat tani, numa di'e: Tuɗaygiya, ŋayaygi tuway goy hay Yerusalem, gine'e hiɗi sojena vi sa Kaldeena hiɗi sojena vi sa Siriyana. Kuɗ na'ta kayni numa ka li ziy hay Yerusalem.

¹²Ki kayn nala Ma-Vatɗina ka di yoboyn tam Yeremiyas ala:

¹³Ma-Vatɗina Lawna vi vok-ma-duura ka di ala: Tuɗaŋu, daŋ tam sumuna vi Yuda hiɗi sum sa hay Yerusalemna ala: Nigi hayɗin may hat yalɗi su? Nigi may hum kuɗ yoboyna vanɗi may su? Din mi Ma-Vatɗina.

¹⁴Yonadab goora vi Rekab vul hagata tam gurona valamu kay nisi ma ci vunɗi, nisi ŋom dita valamu, nisi min ci vinɗi ta-ta vaydi, kay nisi hum kuɗ dita vi busiya, may nanu, nan law tigiyawa hay graw culumta pa, may nigi min humanɗi.

¹⁵Sa sunda vanu sa jobta nan cuksi ay katgi kaf, nan cuksi ay katgi hay graw culumta pa, kay di tigi ala: Hotgiyay bugolgi tam hagata joota vigi pa, muɗgi zlana vigiya, tuɗgi kuɗ lawayn mara'a kay sumunɗi, nala nigi ma lak hay nagata ta nan vula' migi nigiya hiɗi sumaygiya, may nigi min tun humgi noŋɗi, nigi min hum kuɗan noŋɗi kaw.

¹⁶Awa, gurona vi Yonadab, goora vi Rekab li kuɗ dita ta busi da' tisita, may sumun kayni min hum kuɗanɗi.

¹⁷Kuɗ kayni, Ma-Vatɗina Lawna vi Israyel, Lawna vi vok-ma-duura ka di ala: Humgiya, joota ta nan di kay na' ma co kay jafna vi Yuda hiɗi sum sa hay Yerusalemna nan min hina' co kisiya, kay nan law tisiyawa may nisi min hum kuɗan noŋɗi, kay nan yisiyawa may nisi min human noŋɗi.

¹⁸Ki kayn nala Yeremiyas di tam jafna vi sa Rekabitna: Ma-Vatɗina vi vok-ma-duura Lawna vi Israyel ka di ala: Kay nigi hum dita vi Yonadab bugiya, kay nigi li kuɗ gatta valam kaf, nigi li kuɗ sle ma nam di tigin kafe,

¹⁹kuɗ slen kayni Ma-Vatɗina vi vok-ma-duura Lawna vi Israyel ka di ala: Jafna vi Yonadab goora vi Rekab ma kiɗa goyɗi, nisi ma lak vok iran dok-doko.