Read Masana YEREMIYAS 36 Bible Online

YEREMIYAS 36 - Masana bible

YEREMIYAS 36

¹Hay busata fiɗita vi Yoyakim goora vi Yosiyas mulla vi Yuda, Ma-Vatɗina ka di yoboyn tam Yeremiyas ala:

²Slaŋ bak ma ɗutin[9] kep, naŋ ma ɗo hayamu yoboy ma nan daŋgi kay Israyel hiɗi Yudana, hiɗi ma nan daŋgi kay jaf-sumun kafna, tun caw hay buur ma nan law taŋu, hay liyna vi Yosiyas pa ta-ta vaydi.

³Hay li ma jafna vi Yuda hum labarawa kay joota ta nan var kay la' tisi kafta, la li ŋalɗi nisi kaf ma hotay bugolsi tam hagata joota visiya; nala nan ma vul gida kay sulukŋa visiya hiɗi jiw-zlata visiya.

⁴Yeremiyas yi Baruk goora vi Neriya, Baruk ɗo slen ma Yeremiyas dumtin kaf hay ɗerwelda ɗutita, yoboyna ma Ma-Vatɗin dum mi Yeremiyasna kafe.

⁵Bugolda Yeremiyas vul dita tam Baruk ala: Nan teliya, nan as kal hay ziyda vi Ma-Vatɗinɗi.

⁶Naŋ kay tuwaŋ ma tuɗa, yoboyna vi Ma-Vatɗina ma nan daŋgina, ma naŋ ɗom gaana, naŋ ma jaŋam hay hum sumuna hay ziyda vi Ma-Vatɗina, hay buura vi laata; naŋ ma jaŋam kaw hay hum sum sa hay Yudan kaf sa co'ay hay hoyok-ziyna visi pana.

⁷La li ŋalɗi, Ma-Vatɗina ma hum siɗawta visi klasige, gigekaw ma hotay bugolomu tam hagata valam ta joota, kay ɦiyda hiɗi purcakka vi Ma-Vatɗin ta nam law sumun kayni hiɗi na'ta ka ŋolo.

⁸Baruk goora vi Neriya li kuɗ va ma Yeremiyas ma jobta dumti kafna, yoboyna vi Ma-Vatɗina ma ka hay ɗerwelda nam jaŋam kalaf hay ziyda vi Ma-Vatɗina.

⁹Hay til ma zleeŋena vi busata vaslta vi Yosiyas mulla vi Yuda, nisi tun caw li laata kay sum sa hay Yerusalem kaf, hiɗi sum sa hay hoyok-ziyna vi Yuda kaf sa coy hay Yerusalem.

¹⁰Baruk jaŋ yoboyna vi Yeremiyas hay ɗerwelda hay hum sumun kaf, hay ziyda vi Ma-Vatɗina, hay ziyda-kalafta vi Gedaliya, goora vi Safan, ma ɗo slena, hay wur-daŋ ma ŋolla, hay vun-ziyda wulita vi ziyda vi Ma-Vatɗina.

¹¹Mikka goora vi Gemariya, goora vi Safan hum yoboyna vi Ma-Vatɗina ma ka diy hay ɗerwelda kayni kafe.

¹²Nam kali hay ziyna vi mulla, hay ziyda-kalafta vi sa ma ɗo slena, sa ŋulona ay lakay gaa lak': Elisama ma ɗo slena, Delaya goora vi Semayeya, Elnatan goora vi Akbor, Gemariya goora vi Safan, Sedekiyas goora vi Hananiya, hiɗi sa ŋulo segen kafe.

¹³Mikka vulsi labara kay sle ma nam humumna kafe, sle ma Baruk jaŋam hay ɗerwella hay hum sumuna.

¹⁴Ki kayn nala sum sa ŋulon kaf gi sa tam Yehudi. Nisi gi Yehudi goora vi Netaniya, goora vi Selemiya, goora vi Kusi, nam ka di Baruk ala: Ɗerwel ma naŋ jaŋam hay hum sumuna naŋ ma slum ay kaŋu, naŋay tani. Baruk goora vi Neriya sli ɗerwella hay ɓalamu, kali katsiya.

¹⁵Nisi ka dum ala: Musaŋ gaa'a jaŋaŋ ɗerwel namna hay humma'a. Baruk jaŋam hay humsiya may.

¹⁶Hay li ma nisi hum yoboyn kaf humna, nisi tun caw sar ir tuwsi hiɗi narta, ka di tam Baruk ala: Yoboyn kayn kaf numa ma naram mi mulla.

¹⁷Lo nisi ka job Baruk ala: Nam daŋ sle namna a naŋ ɗom kaf kayn ir ditige?

¹⁸Baruk hotsi dita: Nam dan sle namna kaf hiɗi vunamu, nan ɗom hay ɗerwelda kayni hiɗi niy-ɗota.

¹⁹Sa ŋulona di tam Baruk: Tuɗaŋ ŋayaŋ tuwaŋu, naŋ hiɗi Yeremiyas kaw, kay a sa wi liyn ma nigi hayamnaɗi.

²⁰Bugolda nisi kali kat mulla hay wur-daŋŋa, ɗerwella nisi hinimis kalaf hay goor-ziyda vi Elisama ma ɗo slena. Yoboy ma hayamna nisi dum mi mulla.

²¹Mulla gi Yehudi kay sli ɗerwella aya, Yehudi sli ɗerwel ay kalaf hay goor-ziyda vi Elisama ma ɗo slena, nam jaŋam hay hum mulla hiɗi sa ŋulona sa ka tokay talam kafna.

²²Mulla ka musi hay ziyda valam ta cayda, kayni hay til ma zleeŋena, ganun ka vokom ŋal ta may.

²³Hay li ma Yehudi jaŋ galla hiɗi lebo fiɗi nala kayni, mulla ka ɗerwella goy hiɗi kewta vi sa ma ɗo slena, cukum hay kuta vi ganuna, ɗerwel namna ŋalis goy kafe.

²⁴Mulla hiɗi sa sunda valam kaf, hay li ma nisi hum yoboyn kayn kaf humna, tuwsi may cuk nar noŋɗi, nisi min jet sligara visi goy noŋɗi kaw.

²⁵Elnatan, Delaya hiɗi Gemariya law tam mulla dono'o kay nam ma ŋal ɗerwella kayni goyɗi; may nam may humsi noŋɗi.

²⁶Mulla vul hagat tam Yerahmeel, goora vi mulla, tam Seraya goora vi Azriyel hiɗi Selemiya goora vi Abdeel kay nisi ma vi Baruk ma ɗo slena, vi Yeremiyas ma jobta kaw. May Ma-Vatɗin ŋaysi goyo.

²⁷Bugol liy ma mulla ŋal ɗerwelda ta Baruk ɗo dita vi Yeremiyas haya'a goy ŋalla, Ma-Vatɗina ka di tam Yeremiyas sem mara lo ala:

²⁸Slaŋ bak ma ɗutin tara lo, naŋ ma hot ɗo hayamu yoboyn kaf ma ay ɗoy hay ɗerwel ta jewta ta Yoyakim mulla vi Yuda ŋala goyta.

²⁹Naŋ ma di kay Yoyakim mulla vi Yuda ala: Ma-Vatɗina di'e: Naŋ ŋal ɗerwelda kaynawa goyo, naŋ di ala nan ɗo slen hayam kay mige kuma! Wulin kayni mulla vi Babilon ma co'o gasi, nam ma ɦo nagat tani gaa'a, sumuna hiɗi farayna ma haya'na kaf nam ma vatsi goyo.

³⁰Kayni mi va ma Ma-Vatɗina dum kay Yoyakim mulla vi Yuda: Sa hay jafna valam kep kaw as mus kay zlamda-mulda vi Davidɗi, tuwna valam ma mitina ma buris goy hay zalla hay falayta, ma buris goy kir sleɗna kaw hay henjeta.

³¹Nan ma ka kitat kalamu, namu, jafna valamu, sa sunda valamu kaw, kuɗ jiw-zlata visiya. Joota ta nan di ala nan hina' co kisiya la nisi humanɗita, nan ma hina' ma kisiya, kay sum sa hay Yerusalemna, hiɗi sum sa hay Yuda kafe.

³²Yeremiyas sli ɗerwel mara'a, nam vulum mi Baruk goora vi Neriya ma ɗo slena. Yoboy ma hay ɗerwel ma Yoyakim mulla vi Yuda ŋalam goy kafna, Yeremiyas hot dum mi Baruk, nam ɗom gaa'a. Nam cuk yoboy mara'a ma sli ma jewn nala ŋolo talamu.