Read Masana YEREMIYAS 37 Bible Online

YEREMIYAS 37 - Masana bible

YEREMIYAS 37

¹Sedekiyas goora vi Yosiyas ti mulda hay baŋal Yekoniya, goora vi Yoyakim. Nebukadnesar mulla vi Babilon tunum mulu hay nagat Yuda.

²Yoboy ma Ma-Vatɗin dum hay vun Yeremiyas ma jobta nam min humumɗi, sa sunda valamu min humumɗi, sum sa hay nagat kaf min humumɗi kaw.

³Mulla Sedekiyas gi Yukal goora vi Selemiya hiɗi Sofoniya goora vi Maaseya mul-ma-ɗifinna kat Yeremiyas ma jobta, ka dum ala: Siɗawaŋ Ma-Vatɗina Lawna vay kuma'a.

⁴Hay na'ta nisi bay gi Yeremiyas hay daŋgayn tuwa, nam ka poy jar sumuna.

⁵Sojena vi Farawn kali goy hay Egipte pa; hay na'ta Yerusalem ŋuyi kay sa Kaldeena, hay li ma sa Kaldeen hum labara vi sa Egiptena, nisi vi tuwsi goy tam Yerusalem.

⁶Ki kayn nala Ma-Vatɗin ka di yoboyn tam Yeremiyas ma jobta-Lawna ala:

⁷Ma-Vatɗina Lawna vi Israyel ka di ala: Nigi ma di tam mulla vi Yuda ma cukgi ay katanu kay jobanu: Humgiya, sojena vi Farawn, sa cukay goy hay hagata kay gut kuɗgina, nisi hotawa vo hay nagata visiya hay Egipte;

⁸Sum sa Kaldeen ma hotay lo, nisi ma dur hoyok-ziyn tani, nisi ma slumu, ma ŋalam goy hiɗi kuta.

⁹Kay na'ta Ma-Vatɗin di'e: Tiwingi tuwgiɗi, digi ala sum sa Kaldeena ma kal goy gine hiɗi nigiyaɗi, nisi hayɗin as kalɗi.

¹⁰Sojena vi sa Kaldeena sa ka durgina la nigi cisi kaf, la hin kuɗsi si sum sa tuwsi kaay goy milla ɦawa kaw, nisi ma yaw kulo hay guɗukŋa visi pa, hoyok-ziyn tani nisi ma ŋalam goy hiɗi kuta.

¹¹Hay li ma sojena vi sa Kaldeena vi tuwsi goy kat Yerusalem kuɗ sojena vi sa Egiptena,

¹²Yeremiyas gar kay kal hay Yerusalem pa, kay tuɗ hay nagata vi Benyamin jar sumuna kay fi galla valamu.[10]

¹³Hay li ma nam co hay vun-galana vi Benyamin, ma ŋolla vi sa ŋomda yum Yireya, goora vi Selemiya, goora vi Hananiya ka hay liy namna zaw, nam vi Yeremiyas ma jobta kit', ka dum ala: Naŋ min kal kuɗ sa Kaldeena.

¹⁴Yeremiyas hotom dita: Kayn sinda, nan may kal kuɗ sa Kaldeenɗi. May Yireya min hum Yeremiyas noŋɗi, nam vi Yeremiyas, tuɗum vok sa ŋulona.

¹⁵Sa ŋulon diksi muɗ ɦiya, nisi to Yeremiyas, gum daŋgay kalaf hay ziyda vi Yonatan, sa ma ɗo slena, kay ziy na'ta nisi muɗa' ziy ma daŋgaya.

¹⁶Ki kayn nala Yeremiyas kal hay ziy ma daŋgayna, hay liy ma ŋayayna, nam musi ɗawn ta-ta.

¹⁷Mulla Sedekiyas gi sunda kalam kay garamiya. Nam jobom goy kalaf hay ziyda valam ŋayaya ala: Va ma Ma-Vatɗin dum ka su? Yeremiyas hot dita ala awa ka'a. Naŋ ma vulis goy hay ɓam mulla v Babilon.

¹⁸Yeremiyas hot dit tam mulla Sedekiyas ala: Nigi gan daŋgay kayni, suluk ma nan lum kataŋ naŋ lay kat sa sunda vaŋ lay, kat sumun kaf layna mi suluk mige?

¹⁹Wulini sa jobta vaŋu sa ka di vun-jobta ala mulla vi Babilon as co duraŋɗi lay, dur nagata vaŋɗi layna, nisi ka arige?

²⁰Wulin kayni, humaŋu, nan siɗawaŋu mulla, mulla vanu, humaŋ tiyta van humge, hotan kalaf hay ziyda vi Yonatan ma ɗo slena loɗige, kay ɗawni nan ma mita.

²¹Mulla vul hagata kay nisi ma ŋom Yeremiyas hay wur-daŋŋa vi ziy ma daŋgayna, mulla vul hagata kay nisi ma vulum fun kep kep hay buurta kafe, fun ma koti kay sa kot funa, ta-ta hay li ma tin ma hay hoyok-ziyna vat goy kaf tuwa. Ki kayn nala Yeremiyas mus hay wur-daŋŋa vi ziy ma daŋgayna.