Read Masana YEREMIYAS 38 Bible Online

YEREMIYAS 38 - Masana bible

YEREMIYAS 38

¹Sefatiya, goora vi Mattan, Gedaliya goora vi Paskur, Yukal goora vi Selemiya, hiɗi Paskur goora vi Malkiya, hay li ma nisi hum yoboy ma Yeremiyas dum tam sumun kafna ala:

²Ma-Vatɗin ka di ala: Sa ma hin kulo hay hoyok-ziyn tan ɗawni, kew-gaferaŋa, mayta hiɗi moyna ma cum goyo; may sa ma kalawa goyo, hin tuwamawa hay ɓam sa Kaldeena, nam ma suɗ goyo, nam ma ŋom irita valamu, nam ma mus iriya.

³Ma-Vatɗina ka di ala: Hoyok-ziyn tani ma vulis goy hay ɓam sojena vi mulla vi Babilon, nisi ma slumu.

⁴Sa ŋulona di tam mulla: San kayni cum ciy goyo, kay nam to sutay sum sa duura sa hini hay hoyok-ziyn tani hiɗi sumun kaf, hay li ma nam ka ɓaksi ki kayn nala; san kayni may gar ŋaat kay sumun kaynɗi, nam gara' kisi kayn ti joota.

⁵Mulla Sedekiyas hot dita, nam hay ɓigi kay', va ma nan lum katgi mayɗi.

⁶Ki kayn nala nisi vi Yeremiyas, nisi gum hay kaata vi Malkiya goora vi mulla, kaata ta ka hay wur-daŋŋa vi daŋgayna; nisi sir Yeremiyas gaa hiɗi zigewna. Niy may hay kaata noŋ ne'ɗi, may torɓokŋ ka haya'a. Yeremiyas ɓal gaa hay torɓokŋ ɦadiyak'.

⁷Ebed-Melek sa ma Etiopiya, sa ma patayna ma ka vo hay ziyna vi mulla, hum labara ala nisi gi Yeremiyas hay kaata. Mulla ka musi hay vun-galana vi Benyamin.

⁸Ebed-Melek kali goy hay ziyna vi mulla pa, nam ka di tam mulla ala:

⁹Hih! Mulla, mulanna, sumun kayni li joo tam Yeremiyas ma jobta, kay nisi gum gaa hay kaata; mayt ma cum mat hay kaata, kay fun may hay hoyok-ziyn loɗi.

¹⁰Mulla vul hagata tam Ebed-Melek ma Etiopiyan ala: Yawaŋ sumun kuɗaŋ tan dok-ɦidi, Yeremiyas ma jobta naŋ ma slum ay kulo'o, jew a nam ma mita.

¹¹Ebed-Melek yaw sum sa dok-ɦidin kuɗumu, nam kali hay ziyna vi mulla, gaa kuɗ timgilla nam yaw sligar jireɓina hiɗi sligar tekkejena, nam sirim gaa mi Yeremiyas hay kaata hiɗi zigewna.

¹²Ebed-Melek ma Etiopiyana di tam Yeremiyas: Sligar jireɓina hiɗi sligar tekkejena yawni naŋ tosom kuɗ slawaŋu, cukaŋ zigewn gaa kuɗumu may. Yeremiyas li ki kayn nala.

¹³Nisi nir Yeremiyas ay kulo hiɗi zigewna, vumay goy hay kaata. Yeremiyas mus hay wur-daŋŋa vi daŋgayna.

¹⁴Mulla Sedekiyas gi sunda kay gar Yeremiyas ma jobta aya, nisi maram talamu kalaf hay vun-ziy ma ɦidina vi ziyda vi Ma-Vatɗina. Mulla di tam Yeremiyas: Nan min jobaŋ va kep, naŋ ŋayan vaɗi.

¹⁵Yeremiyas hot dit tam Sedekiyas: La nan daŋawa goyo, naŋ as can goyɗi su? La nan vulaŋ gat kaw, naŋ as humanɗi.

¹⁶Mulla Sedekiyas yi va kalam ŋayaya vok Yeremiyas ala: Hay semda vi Ma-Vatɗina, nam ma vulay irita, nan as caŋ goy matɗi, nan as kay vulaŋ goy hay ɓam sa min caŋ goynɗi.

¹⁷Yeremiyas hot di mi Sedekiyas ala: Ma-Vatɗina Lawna vi vok-ma-duura, Lawna vi Israyel ka di ala: La naŋ min hin tuwaŋ hay ɓam sa ŋulona vi mulla vi Babilon, naŋ ma mitɗi, hoyok-ziyn tani kaw kut ma ŋalam goyɗi; naŋ ma mus iriya, naŋu hiɗi ziyna vaŋu.

¹⁸May la naŋ min hin tuwaŋ hay ɓam sa ŋulona vi Babilonɗi, hoyok-ziyn tani ma vulis goyo hay ɓam sa Kaldeena, nisi ma ŋalam goy hiɗi kuta, may naŋu, naŋ as hulot goy hay ɓisiɗi.

¹⁹Mulla Sedekiyas di tam Yeremiyas: Nan li nari kay Yudiyana sa siy goy kuɗ sa Kaldeena; nan li nar ala nisi ɗawni ma vulan goy hay ɓisiya kay nisi ŋulanu.

²⁰Yeremiyas hot dita: Nisi as vulaŋ goy hay ɓisiɗi, humaŋ della vi Ma-Vatɗina hay va ma nan daŋu; nala naŋ ma fi ŋaata, naŋ ma suɗ goyo kaw.

²¹May la naŋ min kal goyɗi, kayni mi va ma Ma-Vatɗina di tanu:

²²Boyn kaf sa hini hay ziyna vi mulla vi Yuda, nisi ma narsi tam sa ŋulona vi mulla vi Babilon, boy nisina ma di ala: Sum sa daŋ ala naŋ ma fi sle'tana, nisi ɗutaŋ ɗutiya, nisi ginawaŋ ginawiya; wulini seŋ cukawa hay torɓokŋa ni, nisi vi tuwsiyawa goyo.

²³Boyna vaŋu hiɗi gurona vi gurona vaŋ kaf nisi ma narsi mi sum sa Kaldeena, naŋ kaw, naŋ ma hulot goy hay ɓisiɗi, mulla vi Babilon ma vaŋ hiɗi ɓalam noŋo, hoyok-ziyn tani kut ma ŋalam goyo.

²⁴Sedekiyas di tam Yeremiyas: Hin sa mara hum ɓakŋa vay loɗi, naŋ as mitɗi.

²⁵La sa ŋulona humawa ala nan ɓak hiɗi naŋu, la nisi daŋawa ala naŋ disi va ma nay ɓakam jar-tuwayna, la nisi daŋawa ala naŋ ŋaysi vaɗi, nisi min caŋ goyɗi ni,

²⁶naŋ ma hotsi dit ala: Nan giɗelem mi del mulla kay nam hotan hay ziyda vi Yonatanɗi, kay ɗawni nan ma mita.

²⁷Sum sa ŋulon kaf co kat Yeremiyas, nisi jobom vunamu. Nam hotsi dit ŋray ca ki mulla dum nala. Nisi ba vunsiya, vi tuwsi goyo may, kay labar kayni bay biya goyo.

²⁸Yeremiyas mus hay wur-daŋŋa vi daŋgayna dam' ta-ta hay buur ma nisi sli Yerusalem.