Read Masana YEREMIYAS 39 Bible Online

YEREMIYAS 39 - Masana bible

YEREMIYAS 39

¹Hay til ma doogona vi busata zleeŋeta vi Sedekiyas mulla vi Yuda, mulla Nebukadnesar co hiɗi sojena valam kaf vok Yerusalem, nisi ŋuya'a;

²hay buurta zleeŋeta vi til ma fiɗina kuɗ busata doogo yam kepta vi Sedekiyas, nisi co baŋan kir gulmunna vi hoyok-ziyna.

³Sa ŋulona vi mulla vi Babilon kaf cuk kulo hay hoyok-ziyna, nisi lak hay vun-galana ma jaara. Nisi kayni: Nergal-Saretser, Samgar-Nebu, Sarsekim, ma ŋolla vi sa patayna, Nergal-Saretser ma ŋolla vi sa li gul-yalda, hiɗi sa ŋulo segena vi Babilon kafe.

⁴Hay li ma Sedekiyas mulla vi Yuda hiɗi sum sa li duura kaf irsi cuk kisiya, nisi muni jaŋi, nisi kal goy hay ziyna hay henjeta, nisi jik hay hagata vi jardeŋŋa vi mulla, hay hagata ta jar gulmun ma ma'na, nisi sli hagata ta hay beɗna.

⁵May sojena vi sa Kaldeena jaŋ kuɗsiya, nisi fi Sedekiyas hay liy ma beɗna vi Yeriko. Nisi vumu, maram kat Nebukadnesar mulla vi Babilon, hay Ribla, hay nagata vi Hamat; Nebukadnesar ka kitat kalamu.

⁶Mulla vi Babilon ŋat gurona vi Sedekiyas goyo, nam ŋatsi gaa vok ir busiya hay Ribla; mulla vi Babilon ŋat sum sa ŋulona vi Yuda kaf kaw.

⁷Bugolda nam co ir Sedekiyas, junum hiɗi jaɓ ma kawayna kay naram hay Babilon.

⁸Sum sa Kaldeena ŋal ziyna vi mulla hiɗi sumun goy hiɗi kuta, gulmunna vi Yerusalem nisi ɦom gaa'a.

⁹Nebuzaradan, ma ŋolla vi sa ŋomda, yaw sum sa hin hay hoyok-ziyn kafe, hiɗi sum sa vul tuwsi hay ɓalamna kaf, hiɗi caw sumun ma hinna kaf, nam kalsi gorvo'o hay Babilon.

¹⁰May Nebuzaradan, ma ŋolla vi sa ŋomda hin sum sa haw co'-co'na hiɗi sa va may hay ɓisiɗina hay nagata; nam vulsi gulda-gulda'a, vulsi sine'e kaw.

¹¹Nebukadnesar mulla vi Babilon vul hagata tam Nebuzaradan ma ŋolla vi sa ŋomda kay Yeremiyas ala:

¹²Yeremiyas zawni naŋ ma vumu, ŋomomu; li va ma joo talamɗi, may naŋ ma li talamu ki nam di taŋ nala.

¹³Nebuzaradan ma ŋolla vi sa ŋomda, Nebusazban ma ŋolla vi sa patayna, Nergal-Saretser ma ŋolla vi sa li gul-yalda, hiɗi sa ŋulona vi mulla vi Babilon kaf,

¹⁴nisi gi sunda kay Yeremiyas hay wur-daŋŋa vi daŋgayna, nisi vulum hay ɓam Gedaliya goora vi Ahikam, goora vi Safan, kay nam naram vo valamu. Nam mus jar sumuna.

¹⁵Hay li ma Yeremiyas ka giy daŋgaya hay wur-daŋŋa vi daŋgayna, Ma-Vatɗina ka di yoboyn talam ala:

¹⁶Tuɗaŋu, lawaŋ tam Ebed-Melek ma Etiopiyana ala: Ma-Vatɗina vi vok-ma-duura, Lawna vi Israyel ka di'e: Humaŋu, nan min hin slen ma joona ma nan dum kay hoyok-ziyn tani co kalamu, may mi slen ma ŋaanɗi; sle namna naŋ ma wumu hay buur ma vokayna.

¹⁷May hay buur namna ɗawni, nan ma butaŋ goyo, Din mi Ma-Vatɗina, sa tuwaŋ li nar kisina naŋ ma vulis goy hay ɓisiɗi.

¹⁸Nan ma suɗaŋ goyo, kew-gaferaŋa ma caŋ goyɗi; irita vaŋu ma li ŋomiya, kay naŋ tun ŋalda vaŋ kanu, Din mi Ma-Vatɗina.