Read Masana YEREMIYAS 40 Bible Online

YEREMIYAS 40 - Masana bible

YEREMIYAS 40

¹Ma-Vatɗina ka di yoboyna valam tam Yeremiyas, kayni bugol liy ma Nebuzaradan ma ŋolla vi sa ŋomda gum iram goy hay Rama gina. Hay li ma nam tuɗ garam kayni, Yeremiyas ay juni hiɗi jaɓna jar sa gorvona vi Yuda hiɗi Yerusalem kaf sa nisi min narsi hay Babilon.

²Ma ŋolla vi sa ŋomda gi sunda kay gar Yeremiyas aya, ka dum ala: Ma-Vatɗina Lawna vaŋu di kay slen ma joona ma li kat liyn tani;

³slen ma Ma-Vatɗin di kalamna nam hinimawa co'o, nam hobom vunamawa kaw, slen kayni co kigiya kay nigi li sulukawa kat Ma-Vatɗina, ma nigi min humum delemɗina.

⁴Wulin kayn humaŋu, nan but jaɓ ma hay ɓaŋŋa goy vaydi, la naŋ min co hiɗi nanu hay Babilon, naŋaya, nan ma kotaŋ tuwaŋu; la dikaŋ may firi kay co hiɗi nanɗi, musaŋu; ɗuwaŋu, nagat kaf ka vokaŋ hiriŋ-hiriŋ', tuɗaŋ hay liy ma kiraŋ ŋaana.

⁵Kay nam min hot dit gosoyɗi, nam hot dum ala: hotaŋ kat Gedaliya, goora vi Ahikam, goora vi Safan, ma mulla vi Babilon tunum kay hoyok-ziyna vi Yuda, musaŋ hiɗi namu jar sumuna, lebo naŋ as tuɗ hay liyn ma kiraŋ ŋaa'a kay naŋ as tuɗ haya. Ma ŋolla vi sa ŋomda vulum sle ma ti kalamu, vulum sle mara'a kaw, gum iramu.

⁶Yeremiyas kali kat Gedaliya goora vi Ahikam hay Mispa, nam mus hiɗi namu jar sum sa hin hay nagatna.

⁷Hay li ma sa ŋulona vi vokŋa vi sojena sa ay meray goy hay fulda hiɗi sum sa kuɗsina kaf hum ala, mulla vi Babilon tun Gedaliya goora vi Ahikamawa mulu, sum jufayna, boyna, gurosgurayna, hiɗi sa hawna sa hin hay nagata sa kalsi hay Babilonɗina, mulla vul ŋomda visiyawa hay ɓam Gedaliya,

⁸nisi kali kat Gedaliya hay Mispa, kayni si Ismayel, goora vi Netaniya, Yohanan hiɗi Yonatan gurona vi Kareyak, Seraya, goora vi Tanhumet, gurona vi Efay ma Netofana, hiɗi Yeezaniya, gurona vi sa ma Maakana, hiɗi sumuna visiya.

⁹Gedaliya goora vi Ahikam goora vi Safan yi va kalam voksiya, nisiya hiɗi sumuna visi kaw, nam ka disi ala: Ligi nari kay sum sa Kaldeenɗi, lakgi ziy hay nagata, sungi mulla vi Babilon, nala nigi ma lak ŋaa'a.

¹⁰Humgiya, nan min mus hay Mispa, vok ir sa Kaldeena sa min co kataya, nigi hayɗini, jagi gulda-guldana, vuɗna vi sle ma vuɗ caydna, hiɗi mula, cukum hay dowayna vigiya, lakgi hay hoyok-ziyna vigi ma nigi hayamna.

¹¹Sum sa Yudiyan kaf sa ay hay nagata vi Mowab, goy vi sa Amonna, hay nagata vi Edom, hiɗi sa hay nagat kafna, labara co tisi ala mulla vi Babilon hin dir sum sara'a hay Yuda, Gedaliya goora vi Ahikam, goora vi Safan nam vulsitawa ki guverner nala kaw.

¹²Sum sa Yudiyan kaf hot ay hay liyn ma nisi ay meray goy hayamna pa, nisi kali hay nagata vi Yuda kat Gedaliya hay Mispa, nisi ja gulda-guldan ŋolo, hiɗi vuɗna vi sle ma vuɗ menda kaw.

¹³Yohanan goora vi Kareyak, hiɗi sa ŋulona vi vokŋa sa ay meray goy fulu co kat Gedaliya hay Mispa,

¹⁴nisi dumu: Baalis mulla vi sa Amonna gi Ismayel goora vi Netaniya aya kay caŋ goyo, naŋ wi kayni su? May Gedaliya goora vi Ahikam min vi dita visi noŋɗi.

¹⁵Bugolda Yohanan goora vi Kareyak di goy ŋayay mi Gedaliya hay Mispa ala: Naŋ vulan hagata kay nan tuɗ ci Ismayel goora vi Netaniya goyo, sa as kay wi kayni noŋ ne'ɗi. Nam caŋ goy kayn kay mige? A jafna vi Yuda kaf sa tokay kataŋŋa mer goyo, dir jafna vi Yuda ma hinina mit goyo kayn kay mige?

¹⁶Gedaliya goora vi Ahikam hot dit tam Yohanan goora Kareyak ala: Naŋ ma li van kaynɗi, kay slen ma naŋ ka dum kay Ismayel zawni mi sinna.