Read Masana YEREMIYAS 43 Bible Online

YEREMIYAS 43 - Masana bible

YEREMIYAS 43

¹Hay li ma Yeremiyas vunam vat kay di yoboyna vi Ma-Vatɗina Lawna visiya dum kaf vatna, yoboyn kaf ma Ma-Vatɗina Lawna visiya vulum talamu kay nam dum tisiya,

²bugolda Azariya, goora vi Henok, Yohanan goora vi Kareyak, hiɗi sum sa suburta hay diksin kaf di tam Yeremiyas ala: Naŋ da' kayn ti sinda; Ma-Vatɗina Lawna vuma'a may vul va taŋu kay naŋ dum tuma ala numa tuɗ lak goy Egipteɗi noŋɗi.

³May zutaŋ diraŋ kulo katma kayni mi Baruk, goora vi Neriya, kay numa ma vulis goy hay ɓam sa Kaldeena, kay nisi cuma goyo lebo narma goy gorvo'o hay Babilon.

⁴Yohanan goora vi Kareyak, sa ŋulona vi vokŋa kaf, hiɗi sumun kaf min hum kuɗ della vi Ma-Vatɗin noŋɗi, namu ma vulsi hagata kay nisi ma lak hay nagata vi Yuda.

⁵Nala Yohanan goora vi Kareyak, hiɗi sa ŋulona vi vokŋa vi sojen kaf, nisi yaw dir sumuna vi jafna vi Yuda kaf, sum sa hotay hay nagata vi Yuda bugol mer ma nisi mer goy jar jaf-sumuna,

⁶jufayna, boyna, gurosgurayna, guro-boyna vi mulla, hiɗi sumun kaf sa Nebuzaradan ma ŋolla vi sa ŋomda hinsi ays tam Gedaliya goora vi Ahikam, goora vi Safan, hiɗi Yeremiyas ma jobta, hiɗi Baruk goora vi Neriya kaw.

⁷Nisi kali hay nagat Egipte, kay nisi min hum kuɗ della vi Ma-Vatɗinɗi, nisi co hay Takpanes.

⁸Hay Takpanes Ma-Vatɗina ka di yoboyna valam tam Yeremiyas ala:

⁹Yawaŋ hiɗiy ma ŋulon hay ɓaŋu, vok ir sa Yudiyan kaf naŋ ma ŋayam gaa'a jar naga dirginna vi fuur ma gi direŋgella ma ka vun ziyda vi Farawn hay Takpanes.

¹⁰Nŋ ma di tam sa Yudiyan ala: Humgi dita vi Ma-Vatɗina vi vok-ma-duura, Lawna vi Israyel: Nam di'e: Humgiya, nan min gi sunda kay gar Nebukadnesar mulla vi Babilon sa ma sunda van aya, nan ma tun zlamda-mulda valamu kulo kay hiɗiy ma nan ŋayam gaa tanna, nam ma bar tapina valam kulo kalamu.

¹¹Nam ma co'o, nam ma ci sum sa hay Egiptena, sum sa nagay kay mitta ma fi mitta, sum sa nagay kay gorvota ma kal gorvo'o, sum sa nagay kay kew-gaferaŋa kew-gaferaŋa ma calsiya.

¹²Nan ma tun kut kuɗ ziyna vi lawayna vi sa Egiptena, Nebukadnesar ma ŋalam goyo, lawayna nam ma yawam gorvo'o, nam ma kusuɓ tuwamu hiɗi nagata vi Egipte ki sa ma ŋom farayna kusuɓ tuwam hiɗi sligara valam nala, nam ma kal goy hiɗi sle'ta kaw.

¹³hiɗiy ma ini hay Bet-Semes hay nagat Egipte nam ma tom gaa'a, ziyna vi lawayna vi Egipte nam ma tom gaa'a.