Read Masana YEREMIYAS 44 Bible Online

YEREMIYAS 44 - Masana bible

YEREMIYAS 44

¹Ma-Vatɗina ka di yoboyn tam Yeremiyas kay sa Yudiyan kaf sa ka lakay hay nagat Egipte, hay Migdol, hay Takpanes, hay Nof hiɗi Patros, nam ka disi ala:

²Humgi dita vi Ma-Vatɗina vi vok-ma-duura Lawna vi Israyel: Joota ta nan hina' ma kay sum sa hay Yerusalem hiɗi sum sa hay Yuda nigi wa'awa kafe, ɗuwgi tige, wulini nam ɓulakay goy kafe, sum say hayam loɗi,

³kuɗ joota ta nisi li'e kay ɓulakan dikanu, kay tuɗ li ɗifin ma no'osna hiɗi sun lawayn hegen ma nisi wumɗi, nigi wumɗi, sumaygi wumɗi kaw.

⁴Sa sunda vanu sa jobta nan cuksi ays katgi kaf, nan cuksi ays katgi hay graw culumta pa, kay di tigi ala: Slen ma liwisna ma nan kaam gawna kayni nigi ma lumɗi.

⁵May nisi min humɗi, nisi min jak humsiɗi, nisi min hot bugolsi tam joota visiɗi, ɗifin-ma-no'osna ma lum tam laway hegena nisi min hinimɗi.

⁶Nala ɦiyda hiɗi purcakka vanu yamawa goyo, na' ŋal hoyok-ziyna vi Yudawa goyo, hagana vi Yerusalem ɓulakay goyo, muɗi mi liyn ma wiŋŋa, ki nigi ka wi vaydi nala.

⁷Wulin kayni, Ma-Vatɗina Lawna vi vok-ma-duura, Lawna vi Israyel ka di ala: Wulin kayni nigi li joota ta ŋol ki kayn nala mi tuwgiya kay mige? Jar jafna vi Yuda nigi min vat sum sa jufayn goyo, vat boyn goyo, vat gurosgurayn hiɗi guro sa vuɗi wulin goyo ta-ta a cawsi hin noŋɗi kayn kay mige?

⁸Nigi ɓulakan dikan hiɗi lopna vi ɓigiya, hay li ma nigi li ɗifin-ma-no'osna tam laway hegena sa hay nagat Egipte ta nigi co kay lak haya'ta, kay vat tuwgi goyo, kay beɗ tuwgi goyo, kay muɗ tuwgi zulo'o jar jaf-sum sa kay nagat kafe kaw kayn kay mige?

⁹Ci-matta vi sumaygiya, ci-matta vi muliyana vi Yuda, ci-matta vi boyna visiya, ci-matta vigi nigiya ta nigi la' hay nagata vi Yuda hiɗi nagat Yerusalemta yisi joka'awa su?

¹⁰Nisi min hot yisi gaa noŋɗi ta-ta vaydi, nisi min li nar noŋɗi, gatta vanu hiɗi vun-ma-gatna vanu ma nan lakam voksiya hiɗi vok sumaysiya nisi min li kuɗumɗi.

¹¹Kay na'ta Ma-Vatɗina vi vok-ma-duura Lawna vi Israyel ka di ala: Humgiya, nan muɗ iran goy kigiya kay ligi joo'o, kay vat jafna vi Yuda goy kafe.

¹²Nan ma yaw caw sumuna vi Yuda sa muɗ irsiyawa kay tuɗ hay nagat Egipte, kay lak ɗawni, nisi kaf ma ŋalis goyo, nisi ma mit goyo hay nagata Egipte; kew-gaferaŋa hiɗi mayta ma loɗsi goyo, tun caw tam sa gurayn pa ta-ta tam sa ŋulona, kew-gaferaŋa hiɗi mayta ma vatsi goyo, nisi ma fi ŋulda, fi ɦuyumda, fi be'da hiɗi zulota kaw.

¹³Nan ma wat nisi sa lak hay nagat Egipte, ki nan wat Yerusalem hiɗi kew-gaferaŋa hiɗi mayta hiɗi moyna nala.

¹⁴Sa as pir goyɗi, sa as hulot goyɗi kaw jar caw jafna vi Yuda sa co tani kay lak hay nagat Egipte hiɗi varta kay hot hay nagata vi Yuda, ta nisi ka hiɗi varta kay hot lak haya'a lo; nisi hayɗin as hotɗi, hot ɗawni si sa hulot goy kep kepna.

¹⁵Sumun kaf ka wi ala boyna visi li ɗifin ma no'osna tam lawayn mara'a, boyn kaf sa ay tokay hay liy namna ŋolla, hiɗi sumun kaf sa ka lakay hay nagat Egipte hay Patros, hot dit tam Yeremiyas ala:

¹⁶Numa as hum kuɗaŋu hay va ma naŋ dum tuma' hay semda vi Ma-Vatɗina noŋɗi.

¹⁷May numa min li ki vunma di nala, li ɗifin-ma-no'osna tam ca-mulda ta dukalawna, li ɗifin ma yam niyn goyna, ki numa li jew nala, numa'a hiɗi sumayma'a, muliyana vuma'a hiɗi sa ŋulona vuma'a, hay hoyok-ziyna vi Yuda hiɗi hagana vi Yerusalem. Hay na'ta numa ay hiɗi tin ma as hobma'a, numa ay lakay hay sle'ta, numa may ŋaf dig joot noŋɗi.

¹⁸Tun caw tam liy ma numa hin ɗifin ma no'osna hiɗi niy ma yamam goy tam ca-mulda vi dukalawna pa, slen kiɗa goy kuma kafe, mayta hiɗi kew-gaferaŋa vatmaawa goyo.

¹⁹Nala kaw, hay li ma numa li ɗifin ma no'osna tam ca-mulda vi dukalawna, numa yam niyn goy kaw kayni bay minda vi jufayna su? Numa ka kota' hambulla kay sla' ya' kulo'o, numa yam niyn goy kaw kayni hiɗi minda visiya.

²⁰Yeremiyas di tam sumun kaf: jufayna, boyna hiɗi sa hotom dit na'ta, nam di tisi ala:

²¹Ma-Vatɗina humam may gumɗi su? Humam gumu kay ɗifin ma no'osna ma nigi ŋalam hay hoyok-ziyna vi Yuda hiɗi hagana vi Yerusalem, nigiya hiɗi sumaygiya, muliyana vigiya hiɗi sa ŋulona vigiya, hiɗi sum sa hay nagata kaw.

²²Ma-Vatɗina may mini kay ziy kayni ta-taɗi, kuɗ joota vi lopna vigiya, kuɗ liwista ta nigi la'ta; kuɗ kayni nagata vigi ɓulakay goyo, muɗi mi fulu, beɗi goyo kaw, ki nay ka wi vaydi nala.

²³Kay mige nigi ŋal ɗifin-ma-no'osna, nigi li sulukawa tam Ma-Vatɗina, kay mige nigi min hum vun Ma-Vatɗinɗi, kay mige gatta, dita hiɗi sle ma colina valamu nigi min ŋomomɗi, kuɗ na'ta joot kayni coowa kigiya, ki nay ka wi vaydi nala.

²⁴Lo Yeremiyas hot di tam sumun kaf hiɗi boyn kaf kaw ala: Humgi yoboyna vi Ma-Vatɗina, nigi jafna vi Yuda kaf sa ka hay nagat Egipte!

²⁵Ki kayn nala Ma-Vatɗina vi vok-ma-duura, Lawna vi Israyel ka di ala: Nigi li ditawa hiɗi vungiya, nigi hiɗi boyna vigiya, la'awa hiɗi ɓigiya kaw, kay nigi di ala: Numa min hob vun va ma numa yum kuma'na, numa min li ɗifin ma no'osna tam ca-mulda vi dukalawna, yama' niyn goy ta'a kaw. Wulin kayni nigi hob vun va ma nigi yum kiginawa, hob vun deŋga vigiyawa,

²⁶humgi yoboyna vi Ma-Vatɗina, nigi jafna vi Yuda kaf sa ka lak hay nagata Egipte, humgiya, nan yi va kanu hiɗi semda van ta ŋolda, Din mi Ma-Vatɗina, sa ma hay jafna vi Yuda as yi semda van hay vunam loɗi, hay nagata vi Egipte kaf kayni, sa as di ala hay semda vi Bum-Sumuna Ma-Vatɗina loɗi.

²⁷Humgiya, nan ma mus jiger kisiya kay li joota, may ŋaat loɗi; sum sa hay jafna vi Yuda sa ka hay Egipte kaf kew-gaferaŋa hiɗi mayta ma cimsiya, ta-ta nisi ma vat goy kirap'.

²⁸Sa hin kiɗayna, sa hulot goy vun kew-gaferaŋa ma yawis hay Egipte pa hot hay nagat Yuda. May caw jafna vi Yuda ma hin kafna, nisi kaf ma co hay nagat Egipte kay lak haya'a, ma wi ala hob ɗawn mi vun yoboyna van lebo fisina su.

²⁹Ma-Vatɗina di'e: Kayni ti ɗekka ta nigi ma wi ala nan ma ka kitat hay liyn tani, kay nigi ma wi ala vun yoboyna vanu ma hob katgiya kay ligi joo'o.

³⁰Ki kayn nala Ma-Vatɗin di'e: Farawn Hofra mulla vi Egipte nan ma vulum goy hay ɓam sa gaw kalamna, hay ɓam sa min irita valamna, ki nan vul Sedekiyas mulla vi Yuda hay ɓam Nebukadnesar ma gaw kalamna, ma min irita valamna nala.