Read Masana YEREMIYAS 46 Bible Online

YEREMIYAS 46 - Masana bible

YEREMIYAS 46

¹Yoboyna vi Ma-Vatɗina ma nam dum tam Yeremiyas ma jobta, kay jaf-sumuna.

²Dita ta nam da' kay Egipte. Kay sojena vi Farawn Neko, mulla vi Egipte, ma ka goboy hiɗi niy-lumna Eufrata, hay Karkemis, ma Nebukadnesar mulla vi Babilon kol kalamu hay busata fiɗita vi Yoyakim, goora vi Yosiyas mulla vi Yuda.

³Kotgi kuroŋ ma goora hiɗi ma ŋolla, tuɗgi vun duura,

⁴Gangi kulumayna, ɓegi kay kulumayna, cukgi goyo hiɗi ŋalayta duura vigiya, ligaɗgi siy kawayna vigiya, cukgi ŋoŋŋa.

⁵Nan ka wum mi mige? Nisi muɗi nari, nisi hot bugolsiya; sumuna visi sa donon ciya; nisi jaŋa bay hot bugolsiya. ɦuyumda ka hay liyn kaf, Din mi Ma-Vatɗina.

⁶Hin sa hefteŋŋa fi su da kuɗ pirta visiɗi, hin sa donona pir jaŋɗi. Hay gal gaa'a, kel niy-lumna Eufrata, nisi ka tupa'a, nisi ka puk gaa'a.

⁷Nam ka de kulo ki niy-lumna Nil nala kayn mi gige? Nam ma ka gi pesle ki niy-lumna nala kayni mi gige?

⁸Kayni ti Egipte. Na' ka tuɗ voka'a ki niy-lumna vi Nil nala, niyna va' ka gi pesle ki niy-lumna nala. Egipte di'e: Nan ma kala, nan ma kuluɓ yam nagata, hoyok-ziyna hiɗi sum sa hayamna nan ma ɦom gaa'a.

⁹Tuɗgiya, kulumayna, ligi koloyo, keke-ma-duura, hin sum sa jufayna ɗek tuwsi goyo, nisi sa hay Etiopiya hiɗi sa hay Lud sa ziy marayta, nisi sa hay Lud sa nir ɓarawt goyna.

¹⁰Buur namna mi buura vi Bum-Sumuna, Ma-Vatɗina vi vok-ma-duura; mi buura ma job yamna, buur ma nam job yalam tam sa gaw kalamna. Kew-gaferaŋa vunam ka ti'e, nam ka hoba, nam ɦoyay hiɗi busuwna visiya. Kay Bum-Sumuna Ma-Vatɗina vi vok-ma-duura ka li ɗifinna valamu hay nagata ta gal gaata, kel niy-lumna Eufrata.

¹¹Tuɗag hay Galaad, garag gurgununa, goor-wayata, goot-cata vi Egipte. Nak mak tuwag gar gurgunun kayn ɦawa'a, nak as fi yerta-goytaɗi.

¹²Jaf-sumuna hum labara kay zulota vagu, ciriyna vagu ka hob yam nagata, kay sa duura ka tupa kulo kay tuwsiya, nisi ka yak gaa'a kuɗ tuwsiya.

¹³Yoboyna vi Ma-Vatɗina ma nam dum tam Yeremiyas ma jobta, kay cota vi Nebukadnesar mulla vi Babilon, nam min sli nagat Egipte.

¹⁴Vigi labara hay Egipte, siwelgi labara hay Migdol, siwelgi labara hay Nof hiɗi Takpanes, digi ala: Fokag kulo'o, kotag tuwagu, kay kew-gaferaŋa ka cal goy galagu.

¹⁵Sumuna vag sa donona yawiya kay mige? Nisi as lak kuloɗi, kay Ma-Vatɗin puksiyawa gaa'a.

¹⁶Nam geɗ sumunawa ŋolo; nisi ka puk gaa kay tuwsiya, nisi di ala: Tuɗaya, hotay kat sumuna vaya, hay nagata ta nay vuɗ haya'ta, gine hiɗi kew-gaferaŋ ma cim sumuna.

¹⁷Ɗawni, nisi ka siwel ala: Farawn mulla vi Egipte, kayni mi winek ɦawa'a; nam hin liynawa capa.

¹⁸Nan ka iriya, din mi mulla, ma semda valam ala Ma-Vatɗina vi vok-ma-duura. Ki Tabor jar hiɗiyna nala, ki Karmel tuɗ voka' hay niy-lumna nala, nam ma ma'a.

¹⁹Junag jakŋa vagu kay kal gorvo'o, naku goot-cata ta ziyna vag hay Egipte. Kay Nof ma muɗ goy fulu, nisi ma ŋala'a, ziy as lak haya' loɗi.

²⁰Egipte kayni ti goor-put gunay ta jifiyta, sa ma ɓulak liyna ka co'ay hay gal gaa pa, nam ka co'o.

²¹Sa gar gurjuta va'a ka kulo'o haya'a ki guro-luway ma ɗoromna nala, nisi kaw, nisi ka muɗ ŋorsiya, nisi kaf mun jaŋi bay col vun lawta, kay buura ma joot co kisina coowa, liyn ma kitata coowa kisiya.

²²Dela' ka di'e ki del guyn nala; kay nisi ka tuɗ voksiya hiɗi sojena, nisi ka tuɗay dura'a hiɗi ceɗna, ki sum sa ka guna nala.

²³Juruta va'a siy ɦizik, sa jik kuɗa'ɗi, may hiɗi kayni pet nisi ka para' gaa'a. kay nisi ka ŋol hini hini ki baara nala, sa as ŋaɓsiɗi. Din mi Ma-Vatɗina.

²⁴Goot-cata vi Egipte muɗi zulo'o, na' vuli goy hay ɓam sum sa gal gaa pana.

²⁵Ma-Vatɗina vi vok-ma-duura, Lawna vi Israyel di'e: Humgiya, nan min ka kitat kay Amon hay No, Farawn, Egipte, lawayna visiya hiɗi muliyana visiya, Farawn hiɗi nisi sa tun vida visi kalamu.

²⁶Nan ma vulsi goy hay ɓam nisi sa min irita visiya, hay ɓam Nebukadnesar mulla vi Babilon, hay ɓam sa sunda valamu kaw; bugol kayni, sumun ma li ziy hay Egipte ki hay buur ma jewn nala. Din mi Ma-Vatɗina.

²⁷May nigiya, sa sunda vanu Yakub, jafna vi Yakub, ligi narɗi; tuwgi ma wirgiɗi, Israyel, kay nan ma butgi goy vun nagata ta gineta, nan ma but jafna vigi goy vun nagata ta nigi ka haya' gorvota; Jafna vi Yakub ma hotiya, nisi ma lak hay sle'ta hiɗi tun-sukka, sa as kay ɦiwirsi loɗi.

²⁸Nigiya sa sunda vanu, jafna vi Yakub, ligi narɗi, Din mi Ma-Vatɗina; kay nan ka hiɗi nigiya, jaf-sumun kaf sa nan mergi goy jarsina nan ma vatsi goyo, may nigiya, nan ma vatgi goyɗi; nan ma ka kita kigi hay hagata va'a, nan as hingi bay ka kitat kigiɗi.