Read Masana YEREMIYAS 47 Bible Online

YEREMIYAS 47 - Masana bible

YEREMIYAS 47

¹Ma-Vatɗina di yoboyna valamu tam Yeremiyas ma jobta, kay sa Filistina, jew a Farawn sli Gaza.

²Ki kayn nala Ma-Vatɗin di'e: Humgiya, niyn ka pat kulo'o hay gal ma gaana, namu ki niy-lumna ma subur goyna nala, nam ti nagata hiɗi sle ma haya'na, hoyok-ziyna hiɗi sum sa hayamna. Sumun ka ciriya, sum sa hay nagat kaf ka yor tuwsiya.

³Kuɗ sem kulumay ma donona ma ci gaa rim-rimna, kuɗ suwana vi keke-ma-duura hiɗi sem keke-ma-duura, sumayna muɗ irsi kir guronɗi, ɓisi muɗi maŋay ŋolo.

⁴Kay mige buura ma sum sa Filistin kaf ma cim goyna ka co'o. buura ma nisi sa tuni vok sum sa Tirus hiɗi Sidonna; kay Ma-Vatɗina min ci sa Filistin goyo, nam min ci sum sa hin kuɗ jokota vi Kaftor.

⁵Gaza ya' welay goy cutut', Askalon vuna' zani helmes', galla vi fulda visi ma hinna kaw, nigi ma jir tuwgi goy nala ta-ta lancitige?

⁶Hih! Kewta vi Ma-Vatɗina, nak ma tun sukag lancitige? Kalag kulo hay faara vagu, cal loɗi, musag kiliŋ.

⁷Nak as tun sukag ir nanige? Ma-Vatɗina vul dita valamu, kewta nam muɗa' ira' kayni hay galla vi Askalon hiɗi deŋella vi niy-lum ŋolla.