Read Masana YEREMIYAS 5 Bible Online

YEREMIYAS 5 - Masana bible

YEREMIYAS 5

¹Ŋuygi hagana vi Yerusalem kafe, ɗuwgiya, vigi labar tige, sargi hay liy ma lakŋ tige, la nigi fi sa kepe ma li kuɗ ɗigerta haya, la nigi fi sa ma gar gasitawa kepe haya, nan ma vul gida mi sum sa hay Yerusalemna.

²La nisi yi va kisi ala Ma-Vatɗin ka iriya kaw, nisi yi va kisi kayn goy ɦawa'a.

³Ma-Vatɗina, iraŋ may wa' ti gasitɗi su? Naŋ watsiyawa, may nisi may ci lasta; naŋ loɗsiyawa goyo, nisi min hum gattaɗi. Nisi muɗ irsiyawa kulo diɓilik kiŋtiriŋ' suw hiɗiyna. Nisi noy hamdawa goyo.

⁴Nan di'e: Kayni si sum sa maŋay ɦawa, nisi ka li slen hay ɦoyta, kay nisi wi hagata vi Lawnɗi, nisi wi gatta vi Lawna visiɗi.

⁵Nan min tuɗ man kat sa ŋulona, nan ma law tisiya; kay nisiya, nisi wi hagata vi Ma-Vatɗina, nisi wi gatta vi Lawna visiya. May nisi kaw, tapay kaf nisi kus jukŋawa, nisi ja jaɓnawa.

⁶Kuɗ na'ta zlon ma jar jurut cisiya, keŋ ma fulla jetsi goyo, zinilla ka bari voksi hay hoyok-ziyna; nisi kaf sa hulot goyo ma jetis goyo, kay ŋel-vunda visiya suwi ŋolo, bay-vida visiya jorawa voka' ŋolo.

⁷Kuɗ na'ta kayni nan min vulsi gida su? Gurona vigi noyanawa goyo, nisi yi va kisiya hiɗi va ma may mi Lawnɗina, nan hobsiyawa, may nisi li zlata-bulota, nisi mol vo hay ziyna vi cata viyuwta.

⁸Nisi kayni ki kulum ma fulla ma hobay ŋaan nala, hena tiy kuɗ cata vi niramna.

⁹Nala nan as fok kulo kuɗ slen kaynɗi su? Nan min job yan tam jaf-sum sa ki kayn nalanɗi su? Dita vi Ma-Vatɗina.

¹⁰Jikgi kulo kay gulmunna visiya, ɦom gaa'a, may nigi ma ɓulakam goy kafɗi, ɓalam ma may ir vi Ma-Vatɗinɗina patgit goyo.

¹¹Kay jafna vi Israyel hiɗi jafna vi Yuda ɗutanawa gasi, dita vi Ma-Vatɗina.

¹²Nisi li ɗutta tam Ma-Vatɗina. Nisi di'e: Nam mayɗi, joot as co kayɗi, nay as wi kew-gaferaŋaɗi, nay as wi maytɗi kaw.

¹³Sa jobta yawn mi simeɗ ɦawa, sa ma di law hay vunsi mayɗi, va ma nisi dumna ma muɗ kisiya.

¹⁴Kuɗ kayni Ma-Vatɗina Lawna vi vok-ma-duura di'e: kay nigi di yoboyn kayni, fay tuwayawa! Nan min tun yoboyna vanu hay vunaŋu ki kuta nala, sum nisina ma lin mi guna ma kut na'ta ma ŋalamna.

¹⁵Fay tuwayawa, nan min mar jaf-sum sara ay goy gine pa kay durgiya, Nigi jafna vi Israyel, nisi si jaf-sum sa dono'o, si jaf-sum sa ka jew dok-doko, si jaf-sum sa nigi wi vunna visiɗi, si sum sa nigi hum slen ma nisi dumnaɗi.

¹⁶Ŋuloŋ ma cuk ɓarawna visiya ki zul ma pi sumuna, ma vunam goy malin nala, nisi kaf si sum sa dono'o.

¹⁷Sinena vigiya hiɗi funa vigiya nisi ma tum ɓuraŋi, guro-jufayna vigiya hiɗi guro-boyna vigiya nisi ma tisi ɓuraŋi, farayna vigi ma ŋulona hiɗi ma gurayna, nisi ma tum ɓuraŋi. gulda-guldana vigiya hiɗi gu-gumna vigiya nisi ma tum ɓuraŋi, ziyna vigi ma gulmun talamu ma nigi vi hayamna, nisi ma tom gaa'a hiɗi kew-gaferaŋa.

¹⁸May hay buur namna ɗawni, nan ma vatgi goy kafɗi, din mi Ma-Vatɗina.

¹⁹La nisi daawa ala: Kay mige Ma-Vatɗina Lawna vuma' li slen kayni kaf tuma'a, naŋ ma hotsi dit ala: kay nigi noyan goyo, nigi sun laway sa pulla hay nagata vigiya, ki kayn nala nigi ma sun sum sa pulla hay nagata ta tay ti nagata vigiɗi.

²⁰Digi labar kayni tam jafna vi Yakub, digi labar kayni goy jar jafna vi Yuda, nigi ma di ala:

²¹Humgi slen kayni, sum sa ɦay-ɦayna sa bay varta, nisi ka hiɗi ira may nisi wiɗi, nisi ka hiɗi humda may nisi humɗi,

²²Nigi may li nar kanɗi su? Din Ma-Vatɗina, tuwgi may wirgi vokanɗi su? Nanu ma lak ŋeslna hay vun niy-lum ma ŋolla, jar-liyna ma vatɗina ma niy-lumna as jik goy bugolomɗi! Billa valamu gi pesle, may nam maŋaya, niy-lumna as suwa'a, may nam jik goy bugol ŋeslnɗi.

²³Sum nisina diksi ɗeŋe, nisi ŋel gatta, nisi vi tuwsi goyo, nisi kala may.

²⁴Kay di ala: Lay nar kuɗ Ma-Vatɗina, Lawna vaya, ma vul niyna hay liyna valamu, ma vul niy ma si jewna hiɗi niy ma si bugolla, ma vul buura vi lumuna ma li feɗn hayna, nigi may di hay diksi naɗi.

²⁵Ɓulak slen kaf kayn ti jiw-zlata vigiya, hingi a fi slen namnaɗi kayn mi sulukŋa vigiya.

²⁶Kay sum sa joon ka jar sumuna vanu, nisi ka guɗofi gaa'a ki sa ma gan jawta nala, nisi gan jawta kay vi sumun haya'a.

²⁷Ki ŋiriŋŋa hobay hiɗi layayna nala, ziyna visi kaw hobay hiɗi ɗutta; ki kayn nala nisi muɗ dono'o, muɗ faray kaw.

²⁸Nisi ɗoray ŋulo'o, tuwsi wile'e, joota visi ɓa' suwiya, nisi may gut kuɗ saɗi, gut kuɗ sum sa kuyunɗi, nisi muɗ faray voksi suwa, nisi may gut kuɗ sa hawnɗi.

²⁹Nan as fok kulo'o kay slen kaynɗi su? Din mi Ma-Vatɗina, nan as job yan tam sum sa ki kayn nalanɗi su?

³⁰Ɓulak-goyta ka'a, slen ma liwisna ka hay nagata.

³¹Sa jobta da' ti sinda, muliyan-sa-ɗifinna ŋomsi gaa kuɗ gaŋeraŋa visiya, sumuna van min ala slen ma li ki kayn nala, may nigi ma lum hay vokka vi nagata ɗawn mi mige?