Read Masana YEREMIYAS 51 Bible Online

YEREMIYAS 51 - Masana bible

YEREMIYAS 51

¹Ki kayn nala Ma-Vatɗina di'e: Humgiya, nan min fok simeɗ ma to liyna kulo'o kat sum sa hay Babilon hiɗi sum sa hay Kaldee.

²Nan ma cuk sum sa siira kat Babilon kay sira' goyo, nisi ma ti nagat ɓuraŋi; nisi ma mot nagata hay gala' kafe, hay buur ma joona.

³Hinsi tir diŋ-diŋ ɓarawta kat sa ma tir ɓarawta valamu, kat nam ma firiya hay marayta valamu. Sa joriyona visiya nigi ma hinsi goyɗi, cigi sojena visi goy kafe.

⁴Hinsi cuk gaa mitiya hay nagata vi sa Kaldeena, cuki gaa hay hagana vi Babilon hiɗi tuwsi kaay goyo.

⁵Kay sum sa Israyella hiɗi Yuda, Lawna visiya Ma-Vatɗina vi vok-ma-duura may noysi goy noŋɗi. Nagata vi sa Kaldeena hobay hiɗi ci-matta kat ma peldetna vi Israyel.

⁶Pirgi goy hay Babilon, hin gigekaw suɗ irita vamu, kay a nigi ma mit jar ɓulakka va'ɗi. Kay kayni mi liyn ma Ma-Vatɗin job yalamu; nam min vul mi gigekaw kuɗ lopna valamu.

⁷Babilon ay hay ɓam Ma-Vatɗina ki tasa ta kawayta nala, na' ɦoy nagat kaf goyo; jaf-sumuna ci vinna va'awa: Kuɗ na'ta kayni jaf-sumuna muɗi ki nisi ka tuwura nala.

⁸Wulini wulini Babilon nig gaa'a, na' toy goyo, tiygi ka'a, gargi gurgununa kay milla va'a, la li ŋalɗi na' ma yer goy klasige.

⁹Nay min kay yer Babilon goyo, may na' may yer goyɗi, nala nay ma noya' goyo, gigekaw ma tuɗ hay nagata valamu valamu; kay kitata va'a coowa ta-ta kulo dukalawna, coowa ta-ta tam ɗugulla.

¹⁰Ma-Vatɗina ɗek ɗigerta vayawa goyo; nigiyaya, ɗekay lopna vi Ma-Vatɗina Lawna vaya goy hay Siyon.

¹¹Lutgi siy ɓarawna, yawgi marayna, muliyana vi Mediya Ma-Vatɗin kaasiyawa ɦiya, kay nam min to Babilon gaa'a, kay kayni mi job-yamna vi Ma-Vatɗina, job-yamna vi Tempella valamu.

¹²Vigi drapon kulo'o kat gulmunna vi Babilon, zlargi sumun dono'o, lakgi sa ŋom vun-galana, bargi sum sa cigeɗna goyo kaw. Kay Ma-Vatɗina col lawta valamawa, slen ma nam dum kat sum sa hay Babilon nam hobom vunamawa.

¹³Naku ta li ziy goboy hiɗi niy ma ŋulona, ta ka hiɗi farayn ŋolo, dabta vagu coowa goboyo, haramna vagu yalam dabawa.

¹⁴Ma-Vatɗina vi vok-ma-duura yi va kalamawa ala: Awa, nan ma hobag hiɗi sumun ki baara nala, nisi ma ci ɗuwulta vi duura katagu.

¹⁵Nam kot nagata hiɗi gaŋeraŋa valamu, nam tun sem nagat gaa'a hiɗi yalda valamu, nam meɗ dukalawn kulo'o hiɗi yamda-wida valamu.

¹⁶Hay li ma delem tiyawa, niyn tok yam tuwamu hay dukalawna; nam mar ɗugulla ay goy hay sin-nagat pa, nam mar wileta hiɗi niyna, nam mar simeɗnay goy hay timgilla valam pa.

¹⁷San gigekaw muɗ to'ofaya vok wida valamu, sa ma yor ora muɗ zulo'o kay va ma sli tuw sana ma nam yoromna; kay lawayn ma waana valamu mi sinda, kay mige suk may hayamɗi.

¹⁸Kay namu mi sle ma waa'a, mi lop ma ɗutta; nam ma ba goyo, hay li ma kitat coowa.

¹⁹Nam ma yum ala «ir galla vi Yakub» nam may ki kayn naɗi; kay namu mi ma kot slen kafna, Israyel kayni mi jaf ma vocota valamu. Semda valamu ala Ma-Vatɗina vi vok-ma-duura.

²⁰Jewe nak ay ki martona van nala, kaway-ma-duura. Nan vat jaf-sumun goyo hiɗi naku, nan ɓulak mulda goy ŋolo hiɗi naku.

²¹hiɗi naku nan ci kulumna hiɗi sa ma ɓe kalamna, hiɗi naku nan to keke-ma-duur goyo, ci sa ma musi hayamna kaw.

²²hiɗi naku nan ci sa-jufna hiɗi cata goyo, hiɗi naku nan ci sa ma maara hiɗi goot-cat goyo, hiɗi naku nan ci sa joriyona hiɗi goot-cata goyo.

²³hiɗi naku nan ci sa ma ŋom farayna hiɗi farayna valam goyo; hiɗi naku nan ci sa ma zumna hiɗi luwayna valam goyo. hiɗi naku nan ci sa guvernera hiɗi sa ŋulon goyo.

²⁴Joota ta sum sa hay Babilon hiɗi sum sa Kaldeena la' tam Siyon vok irgi kafta, nan ma hot la' tisiya, Din mi Bum-Sumuna Ma-Vatɗina.

²⁵Humagu, fay tuwayawa! Nak hiɗiyta ta to slen gaata, Din mi Ma-Vatɗina. Naku ta ay to nagat kaf gaata, nan ma meɗ ɓan goy kagu. Nan ma zutag ay kulo kay hiɗiyn pa, nan ma muɗag mi hiɗiy ma doy kuwa.

²⁶Sa as gar hiɗiy ma gef-ziy katag noŋɗi, hiɗiy ma tun sem ziyɗi kaw; kay nak ma hin dok-dok goy ɓulakiya, Din mi Ma-Vatɗina.

²⁷Meɗgi drapot kulo'o hay nagata, buwgi togolomna jar jaf-sumuna, kotgi jaf-sumuna kay dura'a, yigi mulda vi Ararat, mulda vi Mini hiɗi hiɗi Askenaz, kay nisi ma co dura'a. Tungi sa ŋulon ka'a, nargi kulumayn kulo kata'a ki ɓok-ɓokon nala.

²⁸Kotgi jaf-sumun kay dura'a, muliyana vi Mediya, sa guvernera va'a hiɗi sa ŋulona va' kaf, hiɗi naga ma gaa kuɗ gaŋeraŋa visin kaf.

²⁹Nagat ka geɗa, na' ka wira, kay Ma-Vatɗina hob vun va ma nam lum kat Babilon. Kay nagata vi Babilon nam min muɗa' goy ful ma ziy hayamɗi.

³⁰Sa duura vi Babilon hin duurawa, nisi lak kulo hay hoyok-ziy ma donona, donota visi vatay goyo, nisi muɗi ki boyn nala. Nisi tun kut kuɗ ziyna, nisi kus vun-ziyn goyo.

³¹Sum sa jaŋŋa fi tuwsiya, sa di sunda ŋaf tuwsiya, kay di tam mulla ala hoyok-ziyn yaway hay galam kafe,

³²ala liy ma jik hayna yawiya, goloŋŋa ŋalay kay kuta. Sum sa duura donota visi vatiya.

³³Kay Ma-Vatɗina vi vok-ma-duura, Lawna vi Israyel ka di ala: Goot-cata vi Babilon ŋray ca ki muɗakŋa ma liyna valam ma to wan cona nala, liyna vi feɗna coowa ka'a.

³⁴Nebukadnesar mulla vi Babilon mutanawa goyo, nam ɓulakanawa goyo, nam muɗanawa ki doway-firina ma va may hayamɗin nala, ki guy ma giɗera nala, nam liganawa goyo, nam hob hayamawa hiɗi sle ma ŋaana vanu; nam digiɗanawa goyo.

³⁵Hin ɦawlata ta nisi la' katanu hiɗi sliwan ma jetay goyna nig kay Babilon, di kayni ti na'a ta ziy hay Siyon, hin busuwan tun kay sum sa hay Kaldeena, di kayni ti Yerusalem.

³⁶Kay na'ta Ma-Vatɗina ka di'e: Humagu, nan ma gut kuɗagu, nan ma jobag yagu. Nan ma so niy-lumna ma ŋolla vi Babilon goyo, nan ma hiɗak kaara va' goyo.

³⁷Babilon ma muɗ mi yam-jono ma ɓulakayna, zulla vi cekemna, liyn ma hiweŋŋa hiɗi liyn ma panta; sa as li ziy haya' loɗi.

³⁸Nisi ma ci gum kafe ki zlon nala, nisi ma tiya ki guro-zlon nala.

³⁹Hay li ma tuwsi gaawa kuwa, nan ma vulsi a ci'e, nan ma ɦoysi goyo, kay nisi ma firiya, bugolda nisi ma kal hay senda ta vatɗita, nisi ma zliy kulo loɗi, Din mi Ma-Vatɗina.

⁴⁰Nan ma cuksi gaa'a ki guro-fokŋa ma ŋatam goyna nala, ki fok-gamalana hiɗi fok-ŋekŋa nala.

⁴¹Sargi tige, Sesak sliya, Na'a ta gajijita va'a hobi kay yam-nagat kafta sliya, sargi tige! Babilon toy gaa'a jar naga hen kafe.

⁴²Niy-lumna kulfuti kulo kay Babilon, Babilon ɗubi gaa'a kay billa va' ma ŋolla.

⁴³Hoyok-ziyna va' toy gaa'a, nagat soy goyo, hini goy fulu, ti nagata ta sa mus ziy haya'ɗi, ta sa as jik haya'ɗi kaw.

⁴⁴Nan ma ka kitat kay Bel hay Babilon, slen ma na' ligimna nan ma patam goy vuna'a, sumun ma zat kulo kuɗa' loɗi, gulmunna vi Babilon kaw nigawa gaa'a.

⁴⁵Kalgiyay goy haya' pa, nigi sumuna vanu, hin san gigekaw suɗ irita valamu, hin san gigekaw hulot tuwam goyo vun ɦiyda ŋolda vi Ma-Vatɗina.

⁴⁶Hin dikgi li nar noŋɗi, hin tuwgi vigi bat-bat' kay winekŋa ma biya goy hay nagat ɗawnɗi; kay winekŋa ma co cukudayni, busata vokka winek mara ma co haya' loɗi, ɦawlata ma ti mul hay nagata, sa ma donona ma fok kulo kay sa ma dono mara'a.

⁴⁷Kay na'ta humgiya, buura ka co'o, mi buura ma nan ma ka kitat kay lawayn ma waana vi Babilon, nagata va' kaf ma hob hiɗi zulota; sum sa mitina va' kaf ma cuk gaa haya'a.

⁴⁸Dukalawna hiɗi nagata hiɗi sle ma hayam kafna ma pat ciriy ma firina kay Babilon; kay hay gal gaa pa sum sa ɓulak liyna ma co ka'a, Din mi Ma-Vatɗina.

⁴⁹Nigi sa ciy-goyna vi Israyel, Babilon kaw ma nig gaa'a, ki na'a ci goyo sum sa hay nagat kaf goyo nala.

⁵⁰Nigi sa suɗ goy vun kew-gaferaŋa, kalgiya, vi yigi loɗi. Goy hay naga gineta pa, vargi kay Ma-Vatɗina, Yerusalem ma li ŋomay hay dikgiya.

⁵¹Numa ay muɗi zulo'o hay li ma numa hum sumun ka ŋulma'a, irma poŋ kuloɗi kay zulota, hay ma sum sa pulla co hay liy ma peldetna vi ziyna vi Ma-Vatɗina.

⁵²Kuɗ kayni humgiya, buura ka co'o, Din mi Ma-Vatɗina; mi buura ma nan ma ka kitata kay lawayn ma waana visiya; hay nagat kaf sum sa tuwsi kay goy mili ma tiya.

⁵³Lali Babilon wul ma' ta-ta kulo dukalawn kaw, gulmunna va' ma fiyokŋa, la na' lum a sa jik kalamɗi kaw, nan ma cuk sum sa ɓulak liyna ay ta'a, Din mi Ma-Vatɗina.

⁵⁴ciriyna ka may goy hay Babilon pa, ɓulak-goyta ka ŋolo hay nagata vi sa Kaldeena.

⁵⁵Kay Ma-Vatɗina ka jet Babilon goyo, suwana ma haya'na nam min zanamu, billa vi sa ɓulak liyna ka suwa'a ki niy ma ŋulona ma san as hum suwana valamu nala.

⁵⁶Awa, nam ma ɓulak liyna ka co ka'a, kay Babilon; sum sa duura vi Babilon yawiya, ɓarawta visi kusi goyo, kay Ma-Vatɗina mi Lawna ma vul mi gigekaw kuɗ lopna valamu valamu, mi ma vul mi gigekaw wurakŋa valamu valamu.

⁵⁷Sa yerimana visiya hiɗi sa wi-yalla visiya, nan ma ɦoysi goyo, sa guvernera, sa ŋulona hiɗi sa wi duura visiya kaw; nisi ma cuk sena hay senda vatɗita, nisi as zliy kulo loɗi, din mi mulla ma semda valam ala Ma-Vatɗina vi vok-ma-duura.

⁵⁸Ma-Vatɗina vi vok-ma-duura ka di ala: gulmun ma buɗukŋa vi Babilon ma to gaa'a, vun-galana valam ma fiyokŋa kut ma yum goyo, sum sa li lopna valamna makam kayn mi tuwsi ɦawa'a, jaf-sumuna mak tuwsi kayn mi kuta.

⁵⁹Hagata ta Yeremiyas vula' tam sa ma jobta Seraya goora vi Neriya, goora vi Makseya, hay li ma nam kal hay Babilon hiɗi Sedekiyas, mulla vi Yuda, hay busata fiɗita, hay mulda vi Sedekiyas. Seraya ay mi ma ŋomda ma jewna.

⁶⁰Joota kaf ta min co kay Babilon Yeremiyas ɗo' gaa hay ɗerwelda, yoboyn kaf ma ka ɗoy kay Babilon.

⁶¹Yeremiyas di tam Seraya: hay li ma naŋ coowa hay Babilon, naŋ ma tun ŋalda vaŋu kay jaŋ yoboyn kayni kafe,

⁶²naŋ ma di ala: Ma-Vatɗina naŋu mi ma di ala liyn tani ma ɦo gaa'a, bugolda sa as mus hayam loɗi, muur as mus hayam loɗi kaw, may nam ma muɗ goy mi fulu kay dok-doko.

⁶³Hay li ma naŋ vat jaŋga vi ɗerwel kaynawa, naŋ ma jun degelem kuɗumu, naŋ ma gum hay niy-lumna Eufrata,

⁶⁴bugolda naŋ ma di'e: Babilon ma sir gaa'a ki kayn nala kaw, joota ta nan min mara' ka'ta na' ma fok kulo ka' noŋɗi; nisi ma cuk gaa hiɗi sutaysi toya. Vun yoboyna vi Yeremiyas vat tani.