Read Masana YEREMIYAS 6 Bible Online

YEREMIYAS 6 - Masana bible

YEREMIYAS 6

¹Gurona vi Benyamin, mungi goy jaŋi hay Yerusalem, buwgi difna hay Tekowa, vigi bay-bayn kulo'o hay Bet-Hakkerem, kay joota hiɗi ɓulakka ŋolda ka co ay hay gal gaa'a pa, ir sumun ka wa' kafe.

²Goota vi Siyon ta jifiyta ta ŋaata, nan min ho' gaa'a.

³Sum sa ŋomda hiɗi farayna visiya ka tuɗ kata'a; nisi ka vi guɗukŋa visi gala'a; ŋuyi ta' kafe; gigekaw ka mut hatna valamu valamu.

⁴Vulgi tuwgi goyo kay dura'a, yawgi kulo'o, tuɗay hay falay calak calak! May joota kayn ala liyn ka kal tay vulatiya, ŋus ma vulatina ka moɗ goy fiyoko.

⁵Yaway kulo'o, tuɗay hay henjeta, ɦoy ziy ma mulda visi gaa'a.

⁶Kay Ma-Vatɗina vi vok-ma-duura ka di ala: kaagi guna, pigi zlaɓna tam Yerusalem, kayni mi hoyok-ziyna ma as a fi watta, kay sum sa hay hoyok-ziyn kayn kaf muɗi waskaya.

⁷Ki niy ma hay kaara kulfut goy nala, Yerusalem kulfut joota ta haya'ta goyo; winek ma haya'na kayni ti waskayta hiɗi ɓulak-goyta tuta, nan ɗuw kayni, tuw-tita hiɗi milla jaram may jaɗi.

⁸Vigi gatta, nigi sa Yerusalemna, kay la naɗi jaran ma ja goy hiɗi nigiya, nan ma hin nagata vigi goy ɦawa hiweŋ', sa muɗ mus ka' loɗi.

⁹Ki kayn nala, Ma-Vatɗina vi vok-ma-duura di'e: caw Israyel ma hinina sumun ma garsiya, ki san gar baŋal gulda-guldana nala, kalgi ɓigi mara lo, ki sa ma ja vuɗ gulda-guldan nala.

¹⁰Nan muɗ iran kat gige? Sa ma nan min ala nam ma hum haya mi gige? Humsi may kaay gosayɗi, nisi nagay kay lak kiliŋɗi; yoboyna vi Ma-Vatɗina kirsi kayn mi va ma muɗ sa zulo'o, va ma firisi haysi mayɗi.

¹¹Nan hobay hiɗi ɦiyda vi Ma-Vatɗina, nan as tela' loɗi. Yamaŋ ɦiyda vaŋ goyo kay gurosgurayna hay hagata, yamaŋ ɦiyda vaŋ goyo kay sum sa joriyona, kay nisi ma vi jufna hiɗi cata, sum sa maara hiɗi sum sa busay takay-takayna kaw nisi ma yawsiya.

¹²Ziyna visi ma muɗ vi sum sara'a, sinena hiɗi boyn kaw, hay li ma nan ma meɗ ɓan goyo kay sum sa hay nagata. Din mi Ma-Vatɗina.

¹³Kay tun caw tam sa gurayn jarsi pa ta-ta tam sa ŋulona, gigekaw min gar fita; tun caw tam sa jobta pa ta-ta tam muliyan-sa-ɗifinna, kaf min sinda.

¹⁴Nisi jun vun milla vi sumuna van hay liyamɗi, nisi di ala: Sle'ta, sle'ta, may sle'ta tay noŋɗi;

¹⁵nisi asay a li zulo'o kay sle ma liwisna ma nisi lumna, may zulot may visiɗi, tuwsi may wirsiɗi. Kay na'ta nisi ma puk gaa'a hiɗi nisi sa puk gaa'a, dugumna ma dabsi sesiya hay buur ma nan ma co dursiya, din mi Ma-Vatɗina.

¹⁶Ma-Vatɗina ka di ala: Zlargi goy hay hagata, ɗuwgiya, vigi labara kay haga ma jewna: haga ma ŋaana ka arige? Poygi haya, figi tun-sukka kay ciwta vigiya. May nisi hot dita: Numa as tuɗ hayɗi.

¹⁷Nan yaw sum sa ŋomda kulo jargiya, tungi ŋalda vigi tam buwna vi difna. May nisi hot dita: Numa may tun ŋalda vumaɗi.

¹⁸Kuɗ na'ta, humgiya, jaf-sumuna, nigi vokŋa, humgi slen ma ka li jargiya.

¹⁹Humagu nagata, joo na'ta mara' kay sumun ɗawn mi nanu; vuɗna vi varta visiya, kay nisi min tun ŋalda visi kay yoboyna vanɗi; gatta van kaw nisi pana'awa.

²⁰Ɗifin ma no'osna ma may goy hay Saba pana, nan ma lum hiɗi nam mi mige? Cerewna ma hisna ma may goy hay nagat ta gine pata, nan ma lum hiɗi nam mi mige? Ɗifin ma ŋal-goyna vigi may kiran ŋaaɗi, ɗifinna vigiya may kiran ŋaa'a noŋɗi.

²¹Kay na'ta, Ma-Vatɗina ka di ala: Fay tuwayawa! Nan min lak hiɗiy ma dab semna vok sum nisina, sumayna hiɗi gurona ma tupa tam hiɗiy namna, sum sa ziy kepna hiɗi boniyom-tuwsina ma tupa talamu, nisi ma mit goyo.

²²Ma-Vatɗina ka di ala: Jaf-sum sara hay nagata ta gal gaat pa ka tuɗay zaw, sum sa jafsi ŋol ɦini-hini ka fokay kulo'o hay vun dabaŋ-gu'ta vi nagat pa.

²³Nisi ka wileɗ ɓarawna visiya hiɗi yakana visi kulo'o, nisi taŋgasi, haw sa kirsiɗi; delsiya ci gumu ki niy-lum ma ŋolla nala; nisi ɓey kulo kay kulumayna, zlari kuɗ tuwsiya ki san kep nala kay duura, kay durag naku, goota vi Siyon.

²⁴Numa hum labarawa, ɓuma muɗi maŋaya, yorta kalawa dikma'a, tuw-tita vuma'a ki cata ta ka puka nala.

²⁵Cukgi goy hay sinenɗi, tuɗgi goy hay haganɗi; kay sa ma gawta ka'a hiɗi kew-gaferaŋa valamu, narta ka ŋuyi hay liyn kaf.

²⁶Goota vi sumuna vanu, jun bolla furag ki bagasina nala, lugutag tuwag gaa hay butuwna, tag do'olla ki san ti do'ol kay goora valam ma kepna nala, tiyag dono ŋolo, kay sa ma ɓulak liyna ka co kay tugumu.

²⁷Nan tunaŋawa ki sa ma wak sumuna vanu nala, ki gulmunna nala, kay naŋ ma wi'e, kay naŋ ma wak hagata visiya.

²⁸Nisi kaf kayni si sa ŋel-gatta visi suwiya, sa yaw dira, wayna hiɗi kaway ɗeŋŋa; nisi kaf muɗi liwisi.

²⁹Birim ma fo simeɗna sliy kuwa, plomna ɦuwali gaa jar kuta. Nisi mak tuwsi kay yorom kayn ɦawa'a, suɗoy-kawayna iram as poŋ goyɗi.

³⁰Yisi ala doorota ta bista, kay Ma-Vatɗina muɗsiyawa kiram bisi.