Read Masana YEREMIYAS 8 Bible Online

YEREMIYAS 8 - Masana bible

YEREMIYAS 8

¹Ma-Vatɗin di'e: hay liy namna ɗawni, zokŋa vi muliyana vi Yuda nisi ma yawam goy hay zulam pa, zokŋa vi sa ŋulona vi Yuda, zokŋa vi muliyan-sa-ɗifinna, zokŋa vi sa jobta hiɗi zokŋa vi sum sa hay Yerusalemna.

²Nisi ma baram goy vok ir fatta, vok ir tilla, vok ir vok-ma-duura vi dukalawna ma nisi ay minimna kafe, ma nisi ay girif gaa vokomna kafe. Ma nisi jun tuwsi talamna, Ma nisi garamna, ma nisi girif gaa vokomna kaw. Nisi ma yawsi zoksi kuloɗi, nisi ma pum gaaɗi, zok namna ma muɗ ki zigidikŋa nala gaa kay yam nagata.

³Nisi kaf sa hin kuɗ jafna ma joona namna, mitta ma muɗ kirsi ŋaa'a suw musta irita, hay liyn kaf ma nan ma digiɗsi hayamna, din mi Ma-Vatɗina vi vok-ma-duura.

⁴Naŋ ma disi ala bo: Ma-Vatɗin ka di ala: San as puk gaa'a bay fok kulo su? San as cal goyo bay hot bugolom su?

⁵Sum sa hay Yerusalemna hin tuwsi hay vi-goyt dok-dok kay mige? Nisi so tuwsi hay ɗutta, nisi noy hamda goyo.

⁶Ŋalda van tuniya, nan ka huma: nisi may di ki nisi as a di naɗi, sa ma ham kay joota valam mayɗi, sa ma di ala «nan lum mige?» Mayɗi, gigekaw sikaw vokomu vokomu, ki kulumayna ma vun duura nala.

⁷Lay-joriyona kaw wi gefna vi liyna; gukka, lay-ŋusta, hiɗi ŋakŋa kaw wi gef-liyn ma nisi co hayamna; may sumuna vanu may wi gatta vi Ma-Vatɗinɗi,

⁸nigi as di ala «numa yali, gatta vi Ma-Vatɗin ka kuma'a», nigi di nala ɗawn di tige? Sa wi ɗota vigiya mak tuwsi kay ɗom kayn mi sle ma sinna.

⁹Sum sa yalla muɗi zulo'o, tuwsi muɗi nari, nisi yawiya, wulini nisi pan yoboyna vi Lawnawa, nisi fi yalda ara loge?

¹⁰Kuɗ na'ta nan ma vul boyna visi mi sum sara'a, sum sara ma yaw sinena visiya, kay tun caw tam sa gurayn pa ta-ta tam sa ŋulona, nisi kaf garam mi fina; tun caw tam sa jobta pa ta-ta tam muliyan-sa-ɗifinna, kaf gara' ti ɗutta.

¹¹Goota vi sumuna vanu nisi may kot vun milla va' hay liyamɗi, sle'ta, sle'ta, nisi di nala, may sle'ta tayɗi.

¹²Nisi muɗi zulo'o, kay nisi li sle ma liwisna; tuwsi may wirsiɗi; nisi may li zulo noŋɗi, kuɗ kayni nisi ma puk gaa'a hiɗi nisi sa ka puk gaa'a, nisi ma puk gaa'a hay li ma nan ma watsiya, din mi Ma-Vatɗina.

¹³Ma-Vatɗina di'e: nan min vat lawt hiɗi nisiya, gulda-guldana ma vuɗ loɗi, gu-gumna ma vuɗ loɗi, hum-gun ma yak goyo, va ma nan vulsita ma hulot goy vun ɓisiya.

¹⁴Nay lak gaa kay mige lo? Tokgi tuwgi aya, tuɗay hay hoyok-ziy ma donona, kay mit goyo. Kay Ma-Vatɗina Lawna vaya vulayawa goy vun mitta. Niy ma samna kiramna nam vulaytawa a ci'e, kay mige nay li sulukawa kat Ma-Vatɗina.

¹⁵Nay ka cub kay fi sle'ta, va ma sle' may co katayɗi, nay gar yerta-goyta, may co kayni ti narta.

¹⁶Kulumayn ka tiya hay galla vi Dan, kuɗ tiyna valamu nagat kaf ka wira; nam ka co'o, nagata hiɗi sle ma haya'na kaf nam tum ɓuraŋi, hoyok-ziyna hiɗi sum sa hayna kaf nam tum ɓuraŋi.

¹⁷Kay nan ka cuk guyn jargiya, guy-makayna, sum sa li gul-yalda kay hot guy namna goy bugolomu say noŋɗi; guy namna ma calgiya, Din mi Ma-Vatɗina.

¹⁸Nan min kol kay lasta vanu; Dikan ka las ŋolo hayan kalafi.

¹⁹Goota vi sumuna vanu ka tiy ɗaw goyni hay nagata gineta, ala: Ma-Vatɗina may hay Siyon loɗi su? Mulla vi Yerusalem may haya' loɗi su? Nisi muɗan dikan ɦiya hiɗi lawayn ma ceɗayna visiya, hiɗi lawayn ma waana ma pulla kay mige?

²⁰Feɗna kaliya, menda vatiya, may nay bay suɗ goy tuwa.

²¹Sutiyan toya kay tuw-tita vi goota vi sumuna vanu, nan ka hay yorta, narta vanawa.

²²Gurgunu may hay nagata vi Galaadɗi su? Sa ma doktor mayɗi su? Goota vi sumuna van may yer goyɗi kay mige?

²³Yayya! Lali yan ma kulona mi niyo klasige! Lali iranu mi kaar ma law zimiyna klasige! Nan ɗawni ma tiy mitna vi goota vi sumuna vanu hay buurta kafe.