Read Masana TIYNA VI YEREMIYAS 1 Bible Online

TIYNA VI YEREMIYAS 1 - Masana bible

TIYNA VI YEREMIYAS 1

¹He! Mige? Na' hini goy hiweŋ', nagata ta ay hobay hiɗi sumuna. Wulini na' muɗawa ki cata duhulta nala, jewe na' ay ŋolo jar hoyok-ziy hegena, ay ti mulda kay jaf-sumuna, wulini na' muɗi gorvo'o.

²Hay henjet kaf na' bur iri tiy talal', zimiyn jaŋ gaa kira' di-di', jar nisi sa mina' jew kafna, sa ma teŋa' ira' may loɗi. Boniyo'na kaf di newtawa ka'a, nisi muɗi si sa gaw ka'na.

³Jafna vi Yuda kali goy gorvo'o, yisi hoti gaa'a, muɗi sun sum segena; nisi lakay goy jar jaf-sumuna, may fi tun-sukka noŋɗi; sum sa curoɗsina kalsiyawa vun zlata.

⁴Hagana vi Siyon kaf ka vun do'olla, kay sa may co hay yuldena loɗi, vun-ziyn kaf ɦoy gaa'a, muliyan-sa-ɗifinna va'a ka tiy tuwsiya, guro-boy sa wayana va'a ka lasa, na' kay tuwa'a ka hay galakka.

⁵Sa gaw ka'na kolawa ka'a, sa dura'na ka hay sle'ta, kay Ma-Vatɗina lasa'awa, kuɗ jiw-zlata va'a ta suwi ŋolta. Kuɗ ŋel-vunda va'a, gurona va'a pati gorvo'o vok sa gawta.

⁶Goot-cata vi Siyon ba wileta va'awa kafe; sa ŋulona va'a muɗawa ki lafna ma fi hat ma tiɗi,[1] ma jaŋ vok sa ma digiɗ muur kayni, Sutiyam toy tagay-tagay nala.

⁷Hay buur ma Yerusalem ka vun zlata hiɗi lasta wulin kayni, huma' as ga' kay ŋaata va'a ta na' fa' jewta, hay li ma sumuna va'a puk gaa'a hay ɓam sa curoɗsina, bay sa gut kisiya. Sa gaw ka'na wa'a, nisi cuk tuwsi goy cena kuɗ ni-gaata va'a.

⁸Yerusalem li sulukŋ ŋolo, kuɗ na'ta kayni na' muɗi liwisi, nisi kaf sa ay tiya' se'na muɗi cen kuɗa'a, hay li ma nisi wi nalata va'a. Na' kay tuwa' ka tiya, ka ɦod ira' goyo.

⁹Liwisna va'a ka goɓi vun sligara va'a, na' may var kay dabta va'ɗi; ni-gaata va'a li sa ɦuyum', sa may teŋa' ira'ɗi: Ma-Vatɗina ɗuwaŋ hot-yamda van ta gaa voksita, kay sa ma gawta ka kola.

¹⁰Nisi sa gaw ka'na meɗ ɓisi goyo, yaw sle ma ŋaana va'awa kafe, sum sa naŋ telsi kay tap jar tokŋa vaŋu ka kal kalaf hay ziy ma peldetna va'a.

¹¹Sumuna va' kaf ka tiya, nisi ka gar funa; slena visi ma ŋaan kaf nisi vulum goyo, kay gar tin ma suɗ irita visi hiɗi namna. Ɗuwaŋu, Ma-Vatɗina, saraŋ nisi ka panan natige?

¹²Nan di tigiya, nigi kaf sa ka jik hay hagat waŋŋi, sargiya, ɗuwgi tige, las tara ta ŋiray hiɗi lasta van ka su? Lasta ta nisi lasan hiɗi na'ta, Ma-Vatɗin watanawa hay buura vi ɦiyda valam ta ŋolda.

¹³Hay liyn ma kulon pa nam gi kutiyawa, kay na' kal jar zokonu; nam gan jawtawa gaa vokanu, nam hotanawa goy bugolo, nam noyonawa goyo, hinanawa goy vun lasta hay buurta kafe.

¹⁴Ɓalam jun jukŋa vi jiw-zlata vanawa, na' slewawa jar tuwa'a, na' slewawa kulo dekdelanu; nam geɗ donota vanawa, Bum-Sumuna hinanawa goyo hay ɓam sum sa nan fi col kulo voksiɗina.

¹⁵Sum sa duura van kaf sa ay hiɗi nanu, Bum-Sumuna digiɗsiyawa goy vokanu, nam tok sojenawa katanu, kay cim sum sa joriyona van goyo; goor-wayata vi Yuda Bum-Sumuna taya'awa gaa'a.

¹⁶Nan ka tiy kayni kisi nisiya, iran ka kus zimiya; kay sa ma vul teŋ-irta vi tuwamawa goy gine'e hiɗi nanu, nam ma ay vulan donota, gurona van donota visi tay loɗi, kay sa ma gawta donota valam suwawa.

¹⁷Siyon meɗ ɓa'awa goyo, may sa ma teŋa' ira' mayɗi, sa gawta sa ŋuyi kat Yakubna Ma-Vatɗina cuksi ayawa kay durumu, Yerusalem muɗi liwisi jarsiya.

¹⁸Ma-Vatɗin hayɗin ɗigere, kay nan ŋelem gatta valamu. Humgiya, nigi sumun kafe, ɗuwgi tuw-tita vanu, Guro-boyna vanu hiɗi guro-joriyona vanu kali goy gorvo'o.

¹⁹Nan yi nisi sa minanna, may nisi ketan ketiya, muliyan-sa-ɗifinna hiɗi sa maariyana hay hoyok-ziyna van kaf vatawa goyo: Nisi gar tin kisiya kay hot fi dono'o.

²⁰Ma-Vatɗina ɗuwaŋ lasta van tige, hayan ka suwa'a, dikan ka tiya, kay nan mi sa ma ŋel gatta gasiya, goy jiya, kew-gaferaŋa ti ɓuraŋawa, hay kalafi, na' ay ki mitta kay tuwa' nala.

²¹Nisi humi ala nan ka tiya, may sa may co kay teŋan iranɗi, sa gawta van kaf humi kay lasta vanu, nisi li firiya kay lasta ta naŋ mara' kanta; buur ma naŋ di kalamna naŋ hinimawa co'o, nisi ma li ki nan nala kaw.

²²Hin jiw-zlata visi kaf co goy vok iraŋ coge. Naŋ ma li tisiya ki naŋ li tan nan nala kaw, kuɗ jiw-zlata vanu, kay tiyta van ka ŋolo, dikan ka tiy ŋolo kaw.