Read Masana TIYNA VI YEREMIYAS 2 Bible Online

TIYNA VI YEREMIYAS 2 - Masana bible

TIYNA VI YEREMIYAS 2

¹He! Mige? Bum-Sumuna hay ɦiyda valamu, ŋuy goot-cata vi Siyonawa hiɗi ɗugulla. Nam gi gajijita vi Israyeliyawa kulo dukalawn pa, (ta-ta) gaa vi nagata, hay buura vi ɦiyda valamu, humam may gum kay va ma nam tun way-selem hayamnaɗi.

²Bum-Sumuna to liyn ma musta vi Yakubawa goy kafe, bay kir-hawta. Hay ɦiyda ŋolda valamu, gulmunna vi goot-cata vi Yuda nam tomawa gaa kafe, nam cuksiyawa gaa kay nagata; nagata hiɗi sum sa ti mul ka'na kafe, nam muɗsiyawa goy waa'a.

³Hay ɦiyda valamu ta ŋolda, nam vat donota vi Israyelawa goy kafe; vok sa gawt ka'na, nam hot ɓalam ta juftawa goy bugolo; nam do kutawa hay jafna vi Yakub, kut ka ŋala hay liyn kafe.

⁴Nam gan ɓarawta valamawa ki sa ma gawta nala, ɓalam ta jufta nam sla'awa kulo'o ki sa ma gawta nala, slen ma kir san jifiya nam cumawa goy kafe; nam gi ɦiyda valamawa goyo ki kut nala, kay guɗukŋa vi goota vi Siyon.

⁵Bum-Sumuna muɗawa ki sa ma gawta nala; nam lig Israyelawa goyo, nam lig zlamda-mulda va'awa goy kafe, nam ɦo gulmunna va'awa gaa'a, nam biya tiyna hiɗi yortawa jar guro-boyna vi Yuda.

⁶Nam to zlaɓ ma ta'nawa gaa'a, ki zlaɓna vi jardeŋŋa nala, guɗuk ma fi-tuwna va'a nan tomawa gaa'a, dakŋa ma ŋulona hiɗi sabatna Ma-Vatɗin yalam jokomawa hay Siyon, hay ɦiyda valamu ta ŋolda, muliyana hiɗi sa li ɗifinna nam hinsiyawa goy vun ŋulda.

⁷Bum-Sumuna bis giwin-ma-ɗifinna valamawa, liyn ma peldetna valamu nam noyomawa goyo, gulmunna vi mulda vi Siyon nam vulumawa goy hay ɓam sa gawtna; ciriyna patay kulo'o hay ziyna vi Ma-Vatɗina ki buur ma yuldeta nala.

⁸Ma-Vatɗin hayam minawa a to gulmunna vi goota vi Siyon gaa'a gasi. Nam meɗ zigewna valamawa goyo, la nisi bay ɦosi gaa'a, nam may hot ɓalam goy bugolomɗi; gulmunna hiɗi dolla kaf nam kalam hay do'olla. Nam ma' kaf ɦoy gaa'a.

⁹Vun gulmunna ɦoy goy gaa vi nagata; nam ɓulakamawa goyo, kus cokoromnawa goyo kaw. Mulla va'a hiɗi sa ŋulona va'a kali goy jar jaf-sum sa waana; gatta tay loɗi. Sa jobta va' kaw Lawn may ɗeksi va kirsi loɗi.

¹⁰Sa maariyana vi goota vi Siyon lakay gaa kay nagata, vunsi duki duk'; nisi ko butuwnawa kulo kisiya, nisi cuk sligar-bollawa tisiya; guro-boy sa wayana vi Yerusalem ka cok yisi gaa kay nagata.

¹¹Iran ka cor hiɗi zimiyna, hayan ka suwa'a kaw, miyawan ka yam goy gaa kay nagata, kuɗ joota ta co kay goota vi sumuna vanu, kay gurosgurayna hiɗi guro sa koyona ka yak goy gaa'a hay hagana vi hoyok-ziyna.

¹²Nisi di tam sumaysiya sa boyna: Alkamarena hiɗi vinna fum ɗawn arige? Nisi cuk gaa hay hagata vi hoyok-ziyna, ki sum sa kawayn visiya nala. Nisi fi mitta kulo dig sumaysi moki kay kay'.

¹³Nan ma dum tag ɗawn mi mige? Nan as ŋirag hiɗi gige, goota vi Siyon? Sa ma nan as fum slag nak nala ɗawni mi gige, goota vi Siyon? Nan ma vulakka mi teŋ-irta mige? Goor-wayata, goot-cata vi Siyon? Kay ɓulak-goyta vagu ŋolo ki niy-lumna nala: Sa ma as yerag goy ɗawn mi gige?

¹⁴Sa jobta vagu slen ma waa ɗaara vul tuwam kirsiya; nisi may ɗekag kay joota vagu kay hulotag goy vun yawta-gorvotaɗi; slen ma vul tuwam kirsiya, hiɗi dita ta nisi da'ta kaf mi ket ɦawa.

¹⁵Nisi kaf sa jik hay hagata ci ɓisi til-til' kagu, nisi feɗ kuy-kuy', caɓ yisi kiŋ-kiŋ' kat goot-cata vi Yerusalem. Nisi di ala: Tani mi hoyok-ziy ma yum jew ala jifiyta ta suw kafta su? Ma yum ala firita vi nagat kafena su?

¹⁶Nisi sa gaw kagŋa kaf ma mal vunsi goy katagu, nisi feɗa, nisi mut siysiya, nisi ka di ala: Numa ɦosiyawa gaa'a, kayni mi buur namna ma numa ay cubumna, numa coowa talamu, numa ka wum hiɗi irma'a.

¹⁷Ma-Vatɗina li slen ma nam var kay lumnawa, yoboy ma nam dum hay liy ma ɓa-ɓana nam hobom vunamawa, nam ɦo liynawa gaa'a bay kir-hawta, nam muɗagawa mi va ma sa gawta firi kalamu, nam vul donotawa mi sa gaw kagŋa.

¹⁸Diksi ka tiy vok Bum-Sumuna kagu, gulmunna vi goota vi Siyon, hin zimiy ma kiragŋa jaŋ goyo, hay falayta hiɗi henjeta kafe, Ki niy ma riŋŋa nala, nak ma mak noŋɗi, hin irag tun suk noŋɗi.

¹⁹Fokag kulo'o, cag luluna hay henjet kaf, hay li ma sumun tun caw bur sene. Hokag dikag goyo ki niyn nala vok ir Bum-Sumuna. Yawag ɓak kulo vokomu kay irita vi gurona vagu, sa ka cuk gaa hay hagan kafe kay mayta.

²⁰Ɗuwaŋu, Ma-Vatɗina, saraŋ sa ma naŋ ka lasam ki kayn nalana. Ŋaa'a kay boyna mut gurona visi sa nisi vuɗsin su? Gurona visi sa nisi kutuksi hay digsina? Ŋaa'a kay muliyan-sa-ɗifinna hiɗi sa jobta fi cita-goyta hay liyn ma peldetna vaŋ su?

²¹Sa joriyona hiɗi sa maariyana ka cuki goy gaa butuwu hay hagana; guro-boy sa wayana vanu hiɗi sum sa joriyona vanu cuki gaa'a kay kew-gaferaŋa; naŋ ci sumunawa hay buura vi ɦiyda vaŋu, naŋ ŋat sumunawa goy bay kir-hawta.

²²Naŋ yi nartiyawa kanu hay galan kafe, ki sumun co'o hay buur ma yuldeta nala. Hay buura vi ɦiyda vi Ma-Vatɗina, sa ma hulot goy mayɗi, sa ma suɗ goy mayɗi kaw. Nisi sa nan ay minsi ŋolo, sa nan wulsina kaw, sa gaw kanna ŋalsiyawa goyo.