Read Masana TIYNA VI YEREMIYAS 3 Bible Online

TIYNA VI YEREMIYAS 3 - Masana bible

TIYNA VI YEREMIYAS 3

¹Nanu mi sa ma wi sarta hiɗi zugulla vi ɦiyda valamu.

²Nam tun vokanu, nam tuɗan hay jufunda, may hay haraŋaɗi.

³Hay buurta kaf nam ka ton hiɗi way-ɓalamu, hiɗi ŋor-ɓalamu kaw.

⁴Nam liwekan sliwanawa, liwekan ɗigiyanawa kaw, nam kusan zokonawa.

⁵Nam gi damnawa kulo katanu, nam ŋuyanawa hiɗi galakka hiɗi tuw-tita.

⁶Nam musanawa jar jufunda, ki nisi sa ay miti jew ɓa-ɓan nala.

⁷Nam ŋuy gulmunnawa tanu, kay nan ma kal goyɗi, nam ɓalanawa gaa'a hiɗi jaɓ ma nekŋa.

⁸Nan yi ŋolo kay gar sa ma gutanna, may nam duk vun siɗawta vanawa kafe.

⁹Nam tos hagatawa vokanu hiɗi hiɗiy ma fiyokŋa, nam cal hagata vanawa goyo.

¹⁰Nam muɗi ki ursena ma baray vokan hay hagata nala, ki zlona hay liyn ma ŋayayna nala.

¹¹Nam calanawa goyo, nam jetanawa goyo, nam ganawa goy vun yorta.

¹²Nam gan ɓarawta valamu, colanawa goy vokomu kay ɓen hiɗi na'a.

¹³Nam jikanawa hay furanu hiɗi ɓarawta vamu.

¹⁴Nan muɗi mi va ma sumuna van kaf cen kuɗumu, hay buurta kaf, va ma nisi gi nul hiɗi namu.

¹⁵Nam hobanawa hiɗi us ma galakŋa, nam vulan goyo-goyna a ci'e.

¹⁶Nam ton siyanawa goyo hiɗi goorhoyona, nam panawa gaa hay butuw-kuna.

¹⁷Naŋ gan iranawa goy gine'e hiɗi sle'ta, ŋaata yan joka'awa.

¹⁸Nan di'e: Donota van kaf vatawa, cubta-sle'ta van hay Ma-Vatɗina tay loɗi.

¹⁹Humaŋ gaŋ kay sarta vanu hiɗi tulurta van ta goy hay hagata, mi goyo-goyna hiɗi samna;

²⁰Hay li ma human ganu, ciwta vanu sutiya' to'o hayan kalafi.

²¹Wulini nan min var hay dikanu, kuɗ na'ta nan cub hiɗi sle'ta.

²²Kay ŋaata vi Ma-Vatɗina may vat noŋɗi, slugota valamu ya' ma dab mayɗi;

²³Ɗigerta vaŋu na' ŋolo, naŋ hot la' tam sumuna hay culumta dok-doko.

²⁴Ciwta vanu di ala: Ma-Vatɗina mi ir ɓurawta vanu, kuɗ na'ta nan min zamam ɓalamu.

²⁵Ma-Vatɗina li ŋaata valamu tam nisi sa zamam ɓalamu, nam ŋaa'a kay nisi sa garamna.

²⁶Ŋaa'a ŋolo kay cub hotta vi Ma-Vatɗina hay kiliŋga.

²⁷Ŋa'a kay sana a ziy juk ma nekŋa hay joriyota valamu.

²⁸A nam mus gaa valam kepe, ŋal kiliŋi kaw, kuɗ va ma Ma-Vatɗin tunum kalamu.

²⁹Nam ma pi vunam gaa hay butuwna, bay ba cubta-sle'ta valam kafe.

³⁰Nam ma vul geliyamu mi sa ma tomna, nam ma hob hiɗi panta.

³¹Kay Bum-Sumuna may noyay goyo kay dok-dokɗi.

³²May, hay li ma nam las sana, san as muɗ kiram hawi kuɗ ŋaata valam ta ŋolda;

³³kay nam las goora vi sana, nam curoɗom kaw kayni, may kuɗ minda valamɗi.

³⁴Hay li ma sumun tay sum sa daŋgayna vi nagata gaa kuɗ sesi kafe,

³⁵hay li ma sumun gun gasita vi sana vok ir ma Kulo-Jamna,

³⁶hay li ma sumun slugut sana vun kitata, Bum-Sumuna iram may wi kaynɗi su?

³⁷Nam ma as di ala van kayni li'e mi gige? Bum-Sumuna mi ma vul hagata ɗisu?

³⁸Joota hiɗi ŋaata kali goy kayni hay ɓam nam ma Kulo-Jamna paɗi su?

³⁹La nala sa ma irina yor tuwam kay mige lo? Hin san gigekaw yor tuwam kay sulukŋa valamu.

⁴⁰Ɗuway poyta vay ŋaa'a, varay ka'a kaw, hotay tam Ma-Vatɗina.

⁴¹Yaway dikay hiɗi ɓay kulo'o kat Lawna ma ka kulo wuralawna:

⁴²Numa li sulukawa, numa ay sum sa ŋel gatta, may naŋ vulma gid noŋɗi!

⁴³Naŋ ŋuy tuwaŋawa hiɗi ɦiyda vaŋu, naŋ sluma giɗerma'awa, naŋ ci sumunawa bay kir hawi.

⁴⁴Naŋ ŋuy tuwaŋawa hiɗi ɗugulla, kay siɗawta vuma'a ma co taŋɗi.

⁴⁵Naŋ muɗmaawa ki va ma liwisi, ki tugosna nala kaw jar jaf-sum segena.

⁴⁶Nisi ka mal vunsi goy katma'a, nisi sa gaw kuma'na kafe.

⁴⁷Ir ɓurawta vuma'a kayni ti narta hiɗi zulda, ti vurumta hiɗi ɓulak-goyta.

⁴⁸Zimiyna jaŋ kiran ki niy-ɓatna nala, kuɗ ɦo-gaata vi sumuna vanu.

⁴⁹Iran ka jaŋ zimiya bay tun-suku, bay jaram ja'a kaw.

⁵⁰Ta-ta hay li ma Ma-Vatɗina tun ŋalda valamu, ɗuw ay kulo dukalawn pa;

⁵¹Iran ka lasanu kuɗ guro-boyna kaf sa hay hoyok-ziyna vanu.

⁵²Nisi digiɗanawa ki layta nala, nisi sa ka' gaw hiɗi nanu bay lawta.

⁵³Nisi ganawa gaa hay zulla iriya, nisi ko hiɗiynawa gaa kanu.

⁵⁴Niyna ɗubanawa gaa'a; nan di ala: Nan baawa goyo.

⁵⁵Nan yi semda vaŋ naŋ Ma-Vatɗinawa, gaa hay zul ma wiŋŋa pa.

⁵⁶Naŋ human delanawa, naŋ ma duk humaŋu tam tiyta vanɗi, tam ciriyna vanɗi kaw.

⁵⁷Hay buur ma nan yi semda vaŋ kayni, naŋ coowa goboyo, naŋ di tan ala nan ma li narɗi.

⁵⁸Bum-Sumuna, naŋ gutawa kay ciwta vanu, naŋ but irita vanawa goyo.

⁵⁹Ma-Vatɗina naŋ wi lasta vanawa, nala naŋ joban yanu.

⁶⁰Naŋ vi job ma nisi job yisi tannawa kafe, law ma nisi pum kanna kafe.

⁶¹Ma-Vatɗina, naŋ hum ŋulda visiyawa, law ma nisi pum kanna kafe.

⁶²Ɓakŋa vi nisi sa yaw kulo katanu, hay buurta kaf nisi ka ŋra lawt kanu.

⁶³Ɗuwaŋ tige, la nisi lakay gaa'a lebo kulo coliya kaw, nisi gi nul kayn hiɗi nanu.

⁶⁴Ma-Vatɗina, naŋ ma hot li tisi ki kayn nala kaw, kuɗ lopna vi ɓisiya;

⁶⁵Naŋ ma vulsi hay so'otta-dikga visiya, be'da vaŋu ma nig kisiya;

⁶⁶Naŋ ma slisi giɗersi hiɗi ɦiyda vaŋu, naŋ ma vatsi goyo, gaa kay nagata vi Ma-Vatɗina kafe.