Read Masana TIYNA VI YEREMIYAS 5 Bible Online

TIYNA VI YEREMIYAS 5 - Masana bible

TIYNA VI YEREMIYAS 5

¹Ma-Vatɗina, humaŋ ma gaŋ kay slen ma co kuma'na gi ge! Ɗuwaŋu, saraŋ tige numa muɗi zulo'o.

²Vocota vuma'a muɗi goy vi sum sa pulla, ziyna vuma' vuli mi sum sa sa may wisiɗi.

³Numa muɗi kuyu'u, bay bumu: Sumayma sa boyna muɗi ki boy sa duhulla nala.

⁴Niy ma cina numa gusum gusiya, gu ma ŋalla co tuma kayn numa gusumay gusiya.

⁵Sum sa lasma'na ka jaɓi kulo bugolma lak'; sutayma tooya, sa may hinma tun-sukka noŋɗi.

⁶Numa meɗ ɓuma'a tam sum sa Egiptena, kat sum sa Asiriyana kay nisi hobma hiɗi funa.

⁷Sumayma li sulukawa, may wulini nisi say loɗi, may ziy nekka vi sulukŋa visi wulin kayn si numa'a.

⁸Sa gorvona ka ti mul kuma'a, sa ma as butma goy hay ɓisi mayɗi.

⁹Tina vuma numa garam kayni hiɗi mitta buri galma waŋ', kay numa ka tupa dig kew-gaferaŋa ma may ful pana.

¹⁰Tuwma ka giy ku keŋ ki giwinna nala, kuɗ mayta ta ka cuma'ta.

¹¹Nisi bur hiɗi boyn dono'o hay Siyon, bur hiɗi guro-boy sa wayan dono'o hay hoyok-ziyna vi Yuda.

¹²Hiɗi ɓisiya, nisi ɓal sa ŋulon kulo kat guna; sum sa maariyana sa ma slisi yisi kulo mayɗi.

¹³Sum sa joriyona ziy hiɗiyna, gurosguray sa joriyona ka tuwur gaa kuɗ gu ma nisi ziyimna.

¹⁴Sum sa maariyana may lak goy vun-gala loɗi, sum sa joriyona nul ma gina muɗi kirsi bisi.

¹⁵Dikma muɗi min firit loɗi, demerena vuma'a muɗi goy ɦehe'e.

¹⁶Bogoray ma kuma'na nigawa gaa'a. Joot kuma'a, kay numa li sulukawa.

¹⁷La dikma ka ci lasta, la irma muɗi jufunu,

¹⁸kayn kuɗ ta ala hiɗiyta vi Siyon vurumiya, kayn kuɗ ta ala cekemna ka poy haya.

¹⁹Naŋ Ma-Vatɗin hayɗini, mulda vaŋ may vatɗi. Zlamda-mulda vaŋu ka tam jafsi voksi lo lo.

²⁰Yaŋ as jokma kay dok-doko kay mige? Naŋ as hinma goyo hay buura vi irita vuma kafe kay mige?

²¹Hotma'ay kataŋu Ma-Vatɗina, numa min hotiya, vulma buura lo ki jew nala.

²²Naŋ noyma goy kayn kay dok-doko su? ɦiyda vaŋu ɓaŋ kal ta' kayn ki kayn nala su?