Read Masana EZEKIYEL 1 Bible Online

EZEKIYEL 1 - Masana bible

EZEKIYEL 1

¹Hay busata dok-ɦidita, hay buurta vaslta vi til ma fiɗina, nan ay colay zaw jar sa yaway goy gorvona, goboy hiɗi niy-lumna Kebar, hay na'ta dukalawn mal goyo. Lawna ɗekan slen kiranu.

²Hay buurta vaslta vi tilla, kayni hay busata vaslta ta nisi vi Yoyakin gorvo'o.

³Ma-Vatɗina di yoboyn tam Ezekiyel goora vi Buzi mul-ma-ɗifinna, hay nagata vi sa Kaldeena, goboy hiɗi niy-lumna Kebar. Kayni hay li ma Ma-Vatɗina kal donota valam hay Ezekiyel.

⁴Nan ɗuw goy na kayni, simeɗ ma biw jiw-jiwna may hay gal ma gaan pa, ɗugul ma ŋolo hiɗi kuta ta moki tokolokka, na' ka fo haraŋa goy hay gala' kafe, jar-kuta na'ta ka wile'e ki wayta ta tuwa' goray wek-wekka nala, wileta ka kali goy jar kuta pa.

⁵Goy jar kuta pa muuriyan fiɗi kali goyo, nam sli sana nala.

⁶Muuriyan namna ka hiɗi vokom fiɗi fiɗi pet kaw. hiɗi glaŋatam fiɗi fiɗi pet kaw.

⁷Selem ma gaana lakay ja ɗiger, selem ma tun gaana ki sem goor-putta nala, nam ka wile'e ki wileta vi wayta ta tuwa' gori wek-wekka nala.

⁸Ɓalam ka ki ɓam san nala gaa kuɗ gilaŋatamu, hay galam ma fiɗin pete, nam fiɗi pet ka hiɗi gilaŋatamu, hiɗi vokomu kaw.

⁹Gilaŋatamu ka jaɓay vun tuwamu, hena tam hena, hay li ma nam ka tuɗa nam may cal goyɗi, marige kaw ka tuɗ vokom ɗigere.

¹⁰Tam jifna vi vokom kayni, nam fiɗi pet ka hiɗi vokŋa vi sana, nam fiɗi pet vokom ki zlon nala hay gal ma jufna, nam fiɗi pet ka hiɗi vokŋa vi putna hay gal gulu, nam fiɗi pet ka hiɗi vokŋa vi bakŋa may.

¹¹Vokomu hiɗi gilaŋatamu jaram goy jaya hay galam ma kulona, nam fiɗi pet ka hiɗi gilaŋatna ma' ma' ma jaram jaɓay vun tuwamu, gilaŋatna ma' ma' kaw kay kusuɓum tuwamu.

¹²Gigekaw tuɗis kayn vokom ɗiger, nam tuɗ hay liyn ma simeɗn ka tuɗ hayna, hay li ma nam ka tuɗa, nam may cal goyɗi.

¹³Muuriya namna ɗuw ki veŋŋa ma ka giy kuwa nala; nam sli kuta ta ka ŋala nala, kut na'ta ka jaŋ jar muuriyana; kut na'ta ka mer haraŋa goyo, wileta ka kali goy jar ku na'ta pa.

¹⁴Muuriyan ka jaŋa, ka hota kaw ki wileta nala.

¹⁵Nan ɗuw muuriyan namna; nan wi sem-watira gaa kay nagata, buri tam muuriyana, goy vok vokom ma fiɗina.

¹⁶sem-keke namna jifta valamu hiɗi tuwamu sli hiɗiyn krisolit nala, nam fiɗi kafe sli tuwam nala, jifta valamu hiɗi tuwna valamu ɗuw ki sem-keke ma kepna ka kali kulo hay sem-keke hena nala.

¹⁷Hay li ma nam ka tuɗ vokomu, nam tuɗ hay galam ma fiɗin pete, hay li ma nam ka tuɗa, nam may cal goyɗi.

¹⁸sem-kekena valamu, buɗukam suwi ŋol ku'u, sem-keken fiɗi pete ay hobay cep-cep' hiɗi ira hay galam pete.

¹⁹Hay li ma muuriyan tuɗ vokomu, sem-kekena ma fiɗina ka tuɗ galamu kaw, hay li ma muuriyana fok kulo'o kay nagata, sem-keken ka fok kulo'o kaw.

²⁰Nam ka tuɗ kuɗ liyn ma simeɗn ka tuɗ hayamna, kuɗ biwna vi simeɗna, sem-kekena ka fok kulo'o hiɗi namu, kay ŋusta vi muuriyana ka hay sem-kekena.

²¹Hay li ma nam ɦur vokomu, sem-keken ɦur vokomu, hay li ma nam laka, sem-keken laka, hay li ma nam fok kulo'o kay nagata, sem-keken fok kulo hiɗi namu, kay ŋusta vi muuriyana ay hay sem-kekena namna.

²²Muuriyan namna fiɗi pet kayni, dukalawna ma wiŋŋa ka kulo kalamu kalamu pete, wile'e ki yam-niyna nala.

²³Gaa kuɗ liyn ma wiŋŋa namna, gilaŋatsi ka lakay kulo ɗiger, hena kat hena, muura fiɗi kaf ka hiɗi gilaŋatna ma' ma' kay kusuɓ tuwam hiɗi namu.

²⁴Nan hum suwana vi gilaŋatamu hay li ma nam tun caw tuɗa, suwana valamu ŋray ca ki niy-lum ma ŋolla nala, lebo ki della vi ma gaŋeraŋ-petna; kayni mi suwana ma giji-giji ŋolo ki suwana vi vok-ma-duura nala. Hay li ma nam laka, nam hin gilaŋatam cuk gaa'a.

²⁵Della may goy hay liy ma wiŋŋa ma kulo kalamna pa; hay li ma nam ka laka, nam hin gilaŋatam cuk gaa'a.

²⁶Kulo bugol va ma wiŋŋa ma ka kulo bugol muuriyan namna lo, va hena ka'a sli hiɗiyn Safir nala, sli zlamda-mulda nala, kulo kay zlamda-mulda na'ta, va hena ka'a, nam ɗek tuwam goy ki sa-wurana nala.

²⁷Lo nan hot wi wileta ta tigeɗ goyta, na'a ki kuta nala, kut ka tilek goy talam kafe, tun caw ay gaa hay furam pa ta-ta kulo'o, tun caw tam furam pa ta-ta gaa'a, nan wi ki kuta nala, haraŋa ka ŋuyi talamu.

²⁸Haraŋa ma ŋuyi talamna ɗuw ŋray ca ki kelkedekŋa ma ka kulo hay dukalawna hay buur ma niyn ka si'e nala, kayni ti ir gajijita ta ŋuyi talamta: Ti gajijita vi Lawna ta vul tuwa' goyo. Hay li ma nan wumu, nan dab vokan gaa kay nagata, nan hum del san kep ka lawa.