Read Masana EZEKIYEL 11 Bible Online

EZEKIYEL 11 - Masana bible

EZEKIYEL 11

¹Ŋusta slan goyo, na' tuɗan hay vun-ziyda vi Ma-Vatɗina, hay vuna' ma gal kuɗuwna. Nan ɗuw hay vun-ziyd kayni, sumun ka dok-ma' yam vasl; jarsiya nan wi Yaazaniya goora vi Azzur, hiɗi Pelatiya, goora vi Benaya, sa ŋulona vi sumuna.

²Ma-Vatɗina di tanu: Goora vi sana, sumun kayni diksi suluku, nisi ɗek yal ma joona mi sum sa hay hoyok-ziyn tanna.

³Nisi di'e: Liyn may kay in ziy wulin tuwaɗi, hoyok-ziyna ti doŋolayta, nay mi sliwn may.

⁴Kuɗ na'ta kayni daŋ vun-jobta katsiya, daŋ vun-jobta, goora vi sana.

⁵Ki kayn nala ŋusta vi Ma-Vatɗina co kanu, na' di tanu: Daŋ va ma Ma-Vatɗin dumna: Daŋ ala: Nigi ka di nala, jafna vi sa Israyella, va ma kal goy hay varta vigina nan wumu.

⁶Nigi ci sumuna vigiyawa ŋolo hay hoyok-ziyn tani, nigi hob hagana vi hoyok-ziynawa hiɗi tuw sum sa mitina.

⁷Kuɗ na'ta kayni Bum-Sumuna Ma-Vatɗina vigi ka di ala: Tuw sum sa mitina vigiya sa nigi molsi goy hay hagata vi hoyok-ziyn kayni, nisi mi sliwna, hoyok-ziyna mi doŋolayna may; may nigiya, nisi ma cukgi goyo.

⁸Nigi li nar kay kew-gaferaŋa; Awa ŋaa'a! Nala nan ma mar kew-gaferaŋ gaa kigiya, Dita vi Bum-Sumuna Ma-Vatɗina.

⁹Nan ma cukgi goy hay hoyok-ziyn pa, nan ma vulgi goy hay ɓam sum sa pulla. Nan ma hob vun kitata van katgiya kaw.

¹⁰Kew-gaferaŋa ma cukgi gaa'a, nan ma ka kitat kigiya kalaf hay nagata vi Israyel, nigi ma wi ala nanu mi Ma-Vatɗina.

¹¹hoyok-ziyna ma muɗ ɗawni ti doŋolayta vigi loɗi, nigi hayɗin ma muɗ kalaf hay hoyok-ziyn ɗawni mi sliwna. Nan ka kitat kigi ɗawni kalaf hay vun-nagata vi Israyel.

¹²Nala nigi ma wi ala nanu mi Ma-Vatɗina, nigi min tap kuɗ ɗota-gatta vanɗi, nigi min vi kuɗ dita vanɗi; may nigi li kayni ŋray ca ki sum sa ŋuyi katgin ka li nala.

¹³Hay li ma nan ka di vun-jobta zaw kayni, Pelatiya goora vi Benaya mita. Nan dab vokan gaa kay nagata, nan siwel hiɗi delan kulo ŋolo ala: Hih! Bum-Sumuna Ma-Vatɗina, mar cimta-goyta kay caw gurona vi Israyel ma hin goyn kayn mi naŋu!

¹⁴Ma-Vatɗina ka di dit tan ala:

¹⁵Goora vi sana, nisi kayni si ɓosiyoŋŋa, ɓosiyoŋŋa, sa hay jafna vaŋu, hiɗi jafna vi Israyel noŋ kafe, nisi sa jafna vi Yerusalem di tisi ala: Lakgi goy gine hiɗi Ma-Vatɗina, nagat kayni vuli muma numa'a.

¹⁶Kay na'ta naŋ ma di ala: Ki kayn nala Bum-Sumuna Ma-Vatɗina di'e: La nan vi tuwan goy gine hiɗi jaf-sum nisina, la nan mersi goy hay nagat ŋolo, hay liyn mara'a nan ma muɗ mi liyn ma peldetna visiya, hay nagata ta nisi may haya' pata.

¹⁷Kuɗ kayni naŋ ma di tisi ala: Bum-Sumuna Ma-Vatɗina ka di ala: Nan ma tapgi kulo jar sumuna, nan ma yawgiyay goy hay naga ma nigi meray goy hayamna pa, nan ma vulgi nagata vi Israyel.

¹⁸Nisi ma coy goy ɗawn pa, liwista hiɗi joot kaf nisi ma yawa' goyo,

¹⁹nan ma vulsi dikga ta kepta, nan tun ŋusta ta wuliya hay diksiya. Nan min sli goy haysiya dikga ta ɗeŋe ki hiɗiyn nala, nan ma vulsi dikga ta lumaɗiya.

²⁰Kay nisi ma li kuɗ ɗota-gatta vanu, kay nisi ma tap kuɗ dita vanu, nisi ma muɗ si sumuna vanu, nan ma muɗ mi Lawna visiya kaw.

²¹May nisi sa diksi tapay kuɗ liwista hiɗi joota visiya, nan ma hin lopna visiya nig gaa kisiya, Din mi Bum-Sumuna Ma-Vatɗina.

²²Sa kerubena*, hiɗi sem-keken tapay kuɗsiya, nisi meɗ gilaŋatsi goyo, gajijita vi Lawna vi Israyel ay kulo kisiya.

²³Gajijita vi Ma-Vatɗina fok kulo hay hoyok-ziyn pa, tun kulo kay hiɗiyta ta ka hay gal ma kuɗuwna vi hoyok-ziyna.

²⁴Ŋusta slanu, tuɗan hay Kaldee kat sa yaway goy gorvona, nan wi slen kayni hiɗi Ŋusta vi Lawna; va ma vul tuwam kiranna vat goy vok iranu.

²⁵Slen ma Ma-Vatɗina ɗekem kiranna nan dum tam sa yaway goy gorvon kaf.