Read Masana EZEKIYEL 13 Bible Online

EZEKIYEL 13 - Masana bible

EZEKIYEL 13

¹Ma-Vatɗina ka di yoboyn tan ala:

²Goora vi sana, daŋ vun-jobta kat sa jobta vi Israyel sa di law ma voksina. Naŋ ma di tam nisi sa di vun-jobta kuɗ vaara vi diksiya: Humgi yoboyna vi Ma-Vatɗina.

³Kay na'ta Bum-Sumuna Ma-Vatɗina ka di ala: joot kay sa jobta sa ɦay-ɦayna, sa tap kuɗ vaara visiya bay irsi wi va'a.

⁴Nigi sa Israyella, sa jobta vigiya ŋray ca hiɗi cekemna ma jar ziy ma ɦoy gaana nala.

⁵Nigi may jik kulo jar gulmunna kay gi zlaɓ tam ziyna vi Israyelɗi, nigi min lak dono'o vun duura hay buura vi Ma-Vatɗinɗi.

⁶Sle ma vul tuwam kirsin kayn waa'a, law ma nisi dum voksina kaw mi sini; nisi di ala: «Dita vi Ma-Vatɗina», may dolay kayni Ma-Vatɗin may cuksi ayɗi, nisi hin sumun cub ala va ma nisi dumna ma li'e.

⁷Slen ma vul tuwam kirgin kayni waa'a ɗisu? Slen ma nigi dum vokgina kayni mi sini ɗisu? Nigi di ala «dita vi Ma-Vatɗina», may dolay kayni nan may di noŋɗi.

⁸Awa ŋaa'a, humgi dita vi Bum-Sumuna Ma-Vatɗina, kay dita vigiya ti dita waata, sle ma vul tuwam kirgina mi sin ɦawa, awa ŋaa'a! Nan muɗisawa katgi wulin yo, dita vi Bum-Sumuna Ma-Vatɗina.

⁹Nan ma ɗek donota van goy kat sa jobta-Lawna sa slen may vul tuwam kirsi gasiɗi, sa slen ma voksina ma nisi dumna ti sinda; nisi ma lak hay tapta hiɗi sumuna vanɗi, sesi ma ɗoys jar jafna vi Israyelɗi, nisi ma co ta-ta hay nagata vi Israyelɗi, nala nigi ma wi ala nanu mi Bum-Sumuna Ma-Vatɗina.

¹⁰Ki kayni nala, nisi ka viy sumuna van goyo, nisi di ala «toyta» hay li ma toyta tayɗi. Sumuna vanu kot gulmunna, may nisi gum tuwam hiɗi naga-laskaɗayna.[3]

¹¹Daŋ tam nisi sa gum tuwam hiɗi naga-laskaɗayna ala: Nam ma ɦo gaa'a, niy ma si donona ma co'o, mogoyna ma ɗeŋŋa ma yak gaa'a, simeɗna ma biwa.

¹²Wulini gulmunna valam ma ɦo gaa'a, nisi ma di tigi ala: Naga ma nigi gum talamna ka arige?

¹³Awa ŋaa'a, Bum-Sumuna Ma-Vatɗina ka di ala: Hay ɦiyda vanu, nan min hin simeɗn biwa, hay ɦiyda vanu niy ma ŋolla ma si'e; nan ma hin mogoy ma ɗeŋŋa yak gaa'a kay vat slen goy kafe.

¹⁴Gulmunna ma nigi gum tuwam hiɗi naga-laskaɗayna nan ma tom gaa'a, nan ma dabam gaa vi nagat goŋ', bakam ma viy gaana ma hin goy puɗak-ɗak', nam ma ɦo gaa'a, nigi ma vatis goy jaramu may, nala nigi ma wi ala nanu mi Ma-Vatɗina.

¹⁵Nan ma dab yam ɦiyda van goy goŋ' kat gulmunna, kat nisi sa gum tuwam hiɗi naga-laskaɗayna kaw; nala nan ma di tigiya: Gulmun may loɗi, sum sa gum tuwamna say loɗi kaw.

¹⁶Sa jobta-Lawna vi Israyel sa di slen ma voksina kat Yerusalem, sa slen vul tuwam kirsi kayn kay sle'ta, may sle'ta tayɗina, Din mi Bum-Sumuna Ma-Vatɗina.

¹⁷Naŋu, goora vi sana, muɗaŋ iraŋ kat guro-boyna vi sumuna vaŋu, sa di slen ma voksina kuɗ vaara vi diksiya, daŋ vun-jobta katsiya.

¹⁸Naŋ ma di'e: Bum-Sumuna Ma-Vatɗina di ala: Joot kay nisi sa ɗut sligara kay ɓamta-mokita kafe,[4] sa kot sligar ma bar kamna kay sum sa fiyokŋa hiɗi sa galiyan kafe, kay digiɗ ciwta vi sumuna. Nigi ma digiɗ ciwta vi sumuna van ki kayn nala kaw su? Nigi ma ŋom ciwta vigi nigi iri may su?

¹⁹Nigi ka vat suburta van goy vok sumuna vanu hiɗi orgena ma way ɓigi ne' ɦawana, hiɗi dir fu ma ne'na kaw, hay li ma nigi ci ciwta ta nagay kay mittaɗi, hay li ma nigi hin iriya ciwta ta nagay kay mus iriɗi, hay li ma nigi ka sinda tam sumuna vanu sa ka hum sinda vigiya.

²⁰Kay na'ta Bum-Sumuna Ma-Vatɗina ka di ala: Fay tuwayawa! Nan muɗi ɦiya kat sligar ɗutina vigiya, ma nigi digiɗ ciwta vi sumun hiɗi namu ki layayn nalana. Nan ma jetem goy hay gilaŋgiya, ciwta vi sumuna ta nigi digiɗa' ki layn nalata nan ma hulota' goy hay ɓigiya.

²¹Sligar ma kusuɓi tigina nan ma jetem goyo kaw, nan ma but sumuna van goy hay ɓigiya; nisi ma li ti jawta hay ɓigi loɗi, nala nigi ma wi ala nanu mi Ma-Vatɗina.

²²Kay sum sa ɗigera nigi ka muɗsi varta visi maŋaya hiɗi sinda, may nan kay tuwan kaw may muɗsi yorɗi, kay sum sa joona nigi ka vulsi donota, kay telsi a hotay bugolsi tam hagata visi ta joota, kay hinsi lak iriɗi kaw,

²³sle ma vul tuwam kirgi bay-gasita nigi ma wum loɗi, nigi ma law slen ma vokgina loɗi; nan ma but sumuna van goy hay ɓigiya. Nala nigi ma wi ala nanu mi Ma-Vatɗina.