Read Masana EZEKIYEL 14 Bible Online

EZEKIYEL 14 - Masana bible

EZEKIYEL 14

¹Sum sara'a jar sa maariyana vi Israyel co katanu, nisi lak gaa vok iranu.

²Ma-Vatɗina ka di yoboyn tan ala:

³Goora vi sana, sumun kayni ziy lawayn ma waana visiya hay diksiya, nisi cuk irsi kuɗ sle ma cuksi gaa hay jiw-zlata. Nan as hinsi kay nisi ma jobanu su?

⁴Awa ŋaa'a, naŋ ma law tisi ala: Bum-Sumuna Ma-Vatɗina ka di ala: La san gigekaw hay ziyna vi Israyel, ziy lawayn ma waana valam hay dikamu, cuk iram kuɗ sle ma gum gaa hay jiw-zlata ni, la nam coowa kay job sa ma jobta, hay li ma nam coowan hotom dit ɗawn mi nan Ma-Vatɗina, kuɗ lawayn ma waana valam ma dak-dakŋa.

⁵Kay vi dik jafna vi Israyella, nisi sa cal goy hiɗi nanu kuɗ lawayn ma waana visi kafe.

⁶Kuɗ kayni naŋ ma di tam jafna vi Israyel ala: Bum-Sumuna Ma-Vatɗina ka di'e: Hamgiya, hingi lawayn ma waana vigi goyo, muɗgi ŋorgi mi lawayn ma waana vigi kafe.

⁷Kay sum sa hay ziyna vi Israyel kaf, lebo la sa ma pulu ma ka li ziy jar sa Israyella, la nam calawa goy gine hiɗi nanu, la nam vi lawayn ma waanawa hay dikamu, la nam cuk iramawa kuɗumu, la nam coowa vun sa ma jobta, hotom dit ɗawn mi nan Ma-Vatɗin kay tuwanu.

⁸Nan ma muɗ iran goy kay sa namna, nan ma tun ɗek talamu, nan ma muɗum a sumun cen kuɗumu, nan ma ɦasam selem goyo jar sumuna vanu. Nala nigi ma wi ala nanu mi Ma-Vatɗina.

⁹La sa ma jobta hin tuwam ɗut goyo, la nam di yoboyawa, sa ma jobta namna ɗutum goy kayn mi nanu Ma-Vatɗina; nan ma meɗ ɓan goy kalamu, nan ma kaam selem goy jar jafna vanu sa Israyella.

¹⁰Nisi ma ziy nekka vi jiw-zlata visiya, jiw-zlata vi sa ma jobta namna ma liys ŋray ca hiɗi sa ma job kuɗumna kaw,

¹¹kay a jafna vi Israyel ma cal goy gine'e hiɗi nanɗi, kay nisi ma muɗ tuwsi liwisi hiɗi mat ma cina visiɗi. Ki kayn nala nisi ma muɗ si sumuna vanu, nan ma muɗ mi Lawna visiya kaw. Din mi Bum-Sumuna Ma-Vatɗina.

¹²Ma-Vatɗina ka di yoboyn tan ala:

¹³Goora vi sana, la sum sa hay nagat li suluk katanu hay li ma nisi kal tuwsi hay bay-vida, la nan meɗ ɓan goy kisiya, la vunsi ma tina nan yawam goyo, la nan gi mayt jarsiya, la sumuna hiɗi farayna nan ci segen goy kuɗsiya,

¹⁴la Nuwa, Daniel hiɗi Job, ka jarsi kaw, sum sa ɦidin cani ɗigerta visi as but ciwta vi sum nisin goyɗi. Din mi Bum-Sumuna Ma-Vatɗina.

¹⁵La nan hin muur ma siyna ŋuy nagata, la muur ma siyna vat sum sa hay nagatna goyo, la nagat muɗ goy mi liyn ma wiŋŋa ma sa as jik hayam loɗi kuɗ muuriyan namna,

¹⁶la sum nisin sa ɦidin lakŋi ka jarsi kaw, nisi as but goor-juf goyɗi lay, but goot-ca goyɗi lay, ma but goy ɗawn nisi kay tuwsiya, nagat ma hin goy ɗawni mi liyn ma wiŋŋa din mi Bum-Sumuna Ma-Vatɗina, ma irina.

¹⁷lebo la nan mar kew-gaferaŋa kat nagat tani, la nan di'e: Hin kew-gaferaŋa ŋuy yam nagata, la sumuna hiɗi farayna nan vat sara goy kuɗsiya,

¹⁸la sum sa ɦidin lakŋi ka jarsi kaw, nisi ma but goor-juf goyɗi, but goot-ca goyɗi kaw, may but goy ɗawni si nisi kay tuwsiya. Din mi Bum-Sumuna Ma-Vatɗina ma irina.

¹⁹Lebo la nan gi bakmaran kat nagat kayni, la nan gi ɦiyda van katsiya hiɗi mitta, kay ci sum sara'a hiɗi farayn kaw goyo,

²⁰la Nuwa, Daniel hiɗi Job ka jarsi kaw, nisi as but goor-juf goyɗi, but goot-ca goyɗi, may nisi ma buta' goy ɗawn ti ciwta visiya kuɗ ɗigerta visiya. Din mi Bum-Sumuna Ma-Vatɗina ma irina.

²¹Awa, Bum-Sumuna Ma-Vatɗina di ki kayn nala, kitana van ma ŋulona ma fiɗin lakŋi; kew-gaferaŋa, mayta, muur ma siyna, hiɗi bakmarana, la nan gumawa kat Yerusalem kay ci kuɗ sumuna hiɗi muuriyana, cawsi mara ma hin goyo, guro-jufayna hiɗi guro-boyna kaw.

²²Humgiya kay nisi ma co katgiya: Nigi ma ɗuw poyta visiya hiɗi lopna visiya, nala nigi ma teŋ irgi kay joota ta nan hina' co kay Yerusalem, hiɗi slen kaf ma nan hinim li haya'a.

²³Nisi ma teŋgi irgiya, hay li ma nigi ma wi poyta hiɗi lopna visiya; hay li ma nigi ma wi ala, slen ma nan lum ta' kafna kayni, nan may lum goy waaɗi. Din mi Bum-Sumuna Ma-Vatɗina.