Read Masana EZEKIYEL 16 Bible Online

EZEKIYEL 16 - Masana bible

EZEKIYEL 16

²Goora vi sana, ɗekaŋ Yerusalem kay sulukŋa va'a.

³Naŋ ma di ta'a: Bum-Sumuna Ma-Vatɗina ka di tam Yerusalem ala: Hiɗi so'olag ma may pana, hiɗi vu'da vag pa nak may goy hay nagat Kanaan; bugu mi sa ma Amoriyana, sugu ti ta Hititta.

⁴Hay vu'da vagu, sa may kaag hifagɗi, sa may muzag goy hay niyna kay poragɗi, sa may kurutag tuwag hiɗi mandaɗi kaw, sa may ɗutag hay sligarɗi kaw,

⁵sa kep kaw may cuk iram kagu kay lag va mara kep kaw kuɗ sle namna cani noŋɗi, kuɗ slugota valam kagu; may nak giys goy hay sinena, hay buur ma nak vuɗna pa, kay jibetag may kir sa loɗi.

⁶Nan jik goboy hiɗi naku, nan fag kayni, nak ka hiwir gaa hay busuwn waŋ, nan di tag ala: Kag jar busuwag na waŋ', nan di tag ala: Kag jar busuwag na waŋ'.

⁷Nan biyag ŋolo sem birim doogo, ki guro-guro ma sinen nala, nak zlibawa. Nak wulawa, nak muɗawa jifiy ŋolo, miirag dayawa, ɗuŋusag wulawa. May nak ay goy nala'a, goy nala kaɗaŋ kaɗaŋ'.

⁸Nan jik goboy hiɗi naku, nan ɗuwag kayni, liyna vag asiya, liyna vi darta. Nan gi vun sligar-tuwna van goy kagu, bar nalata vagu, nan yi va kanu, nan jun bonot hiɗi naku, nak muɗ ir vanu may. -- Dita vi Bum-Sumuna Ma-Vatɗina.

⁹Nan musag goy hay niyna, busuw ma takŋa nan ɦasam goyo, nan setag tuwag hiɗi mula.

¹⁰Nan cukag sligar ma vunam ciliyn tagu, cukag tuguru ma hiɗi bak ma direŋŋa, kusuɓag tuwag hiɗi sligar ma koti hiɗi baraw haɓna, kusuɓag tuwag hiɗi baraw-direŋŋa.

¹¹Nan ganag tuwagu: Nan gi way ɓagu, gi jaɓ kelegu,

¹²gi tuju cinagu, cukag sle humagu, tun bogorayta vi mulda kagu kaw.

¹³Ki kayn nala nak ganay hiɗi ora, hiɗi doorota kaw, nak ganay hiɗi sligar-barawna, hiɗi baraw ma direŋŋa, hiɗi sligar ma vunam ciliyna. Nak tum mi futuw ma digeɗna, yumda hiɗi mula. Nak muɗ jifiy vokag suwa suwa, nagay kay mulda.

¹⁴Seg ma tiyna mer goy jar jaf-sumuna, kuɗ jifiyta vagu, kay na' asay ŋaa'a ŋolo, kuɗ ganta ta nan ganag hiɗi na'ta. Din mi Bum-Sumuna Ma-Vatɗina.

¹⁵May nak tap kuɗ jifiyta vagu, nak muɗ tuwag gawlaŋi, kuɗ semda vag ma tiyna nak muɗ tuwag gawlaŋ vok sum sa ka jik hay hagat kafe, nak vul tuwag goy hay ɓisiya.

¹⁶Nak yaw kuɗ sligara vagu, nak kot liyn ma ɗiŋiriŋŋa hiɗi sligar ma tuwam ɗoyna, nak muɗ tuwag viyuwu hay liy namna, va ma ki kayn nala bay li tuwa, as li noŋɗi kaw.

¹⁷Nak yaw ganna ma nan kotom katagu hiɗi doorota hiɗi ora kaw, nak kot lawayn ma jufayn hiɗi namu kay muɗ tuwag liwis hiɗi namu.

¹⁸Nak yaw sligara vag ma vunam ciliynawa, nak kusuɓumawa talamu, mula hiɗi urdina ma nan vulakgina nak lumawa talamu.

¹⁹Fun ma nan vulakgina, futuw ma digeɗna hiɗi yumda ma nan vulakgi kay tum kafna, nak vulum goy ɗifini ki his ma ŋaana nala. Kayni mi va ma co'o, -- Din mi Bum-Sumuna Ma-Vatɗina.

²⁰Nak yaw guro-jufayna hiɗi guro-boyna vagu, sa nak vuɗantina, nak lisiyawa goy ɗifin misiya kay nisi ma mutsiya. Viyuwta vag na'ta kayni may asayɗi su?

²¹Nak ŋat guro-jufayna vanu, nak vulum goy tisiya hay li ma nak ŋalsi hay kuta hay semda visiya.

²²Jar liwista vagu hiɗi viyuwta vag kaf kayni, humag may gag kay buur ma nak ay waya tuwanɗi, hay li ma nak ay goy nala'a, nala kaɗaŋ kaɗaŋ, hay li ma nak ay rigas gaa jar busuwagu.

²³Bugol lopna vag ma joon kaf, -- joota, joot kagu! -- Din mi Bum-Sumuna Ma-Vatɗina.

²⁴Nak in ziy ma li viyuwt hayamnawa, nak in liyn ma ɗiŋiriŋŋawa hay liyn kafe;

²⁵Nak in liyn ma ɗiŋiriŋŋawa vun hagat kafe, nak li liwistawa hiɗi jifiyta vagu, nak vul tuwagawa mi sum sa jik hay hagat kaf, nak jor liwista vagawa voko.

²⁶Nak muɗ tuwagawa liwisi kuɗ sa Egiptena, sum sa ziysi tagu, sum sa gaŋeraŋi, nak jor liwista vagawa kay ɓulakan dikanu.

²⁷Kuɗ kayni nan meɗ ɓanawa goy kagu, nan kiɗa galla vagawa goyo, nan vulag goy mi sa gaw kagŋa ki va ma tina nala, si guro-boyna vi sa Filistina, sa muɗi zulo'o kay poyta vag ta liwista.

²⁸Nak muɗ tuwag liwisi vok sa Asiriyana, kay mige nak may hobayɗi; nak muɗ tuwag liwis kuɗsiya, hiɗi kayn kaf kaw nak may hobayɗi.

²⁹Nak jor liwista vagu hiɗi nagat Kanaan, hiɗi kayn kaf kaw nak may hobayɗi.

³⁰Dikag muɗi maŋay ŋolo natige, nan Bum-Sumuna Ma-Vatɗina di nala. Hay lita vagu, nak muɗi ki cata ŋolda vi viyuwta nala.

³¹Hay li ma nak in ziyna vag ma li viyuwt hayna goy vun hagat kafe, hay li ma nak in liy ma ɗiŋiriŋŋa vagu hay liyn kafe, nak may muɗ ki cata viyuwta ta job wurakŋa naɗi kaw;

³²nak muɗi ti cata bulota, ta vi jufa'ɗi, may visi si sum sa pulla.

³³Boy sa gawlaŋ kaf sumun wuraksi gurju'u, may naku, nak li vulda mi sa cilena vagu, nak yawsiyawa hiɗi sle ma nak vulsitna, kay nemsi ay katagu, hay galla kaf hiɗi viyuwta vagu.

³⁴Hay viyuwta vagu, nak lum mi va ma boy segen lumɗina, sa may garagɗi, sa may wurakag gurjuɗi kaw, may gar sumun ti naku, wuraksi gurjun ti naku may.

³⁵Awa ŋaa'a, nak ta viyuwta, humag yoboyna vi Ma-Vatɗina.

³⁶Bum-Sumuna Ma-Vatɗina ka di ki kayn nala: Kay nak ko farayna vag goyo, nak fok tuwag goy nala'a vok sa cilena vagu, hiɗi lawayn ma liwisna vag kafe, ki busuwna vi gurona vagu sa nak vuɗsiya nala.

³⁷Awa ŋaa'a! Fay tuwayawa, sa cilena vagu sa nak li darta hiɗi nisina nan ma toksi kafe, nisi sa nak minsi jewn kafe, sa nak kaasi gaw jewn kafe, nan ma toksiyay goy hay liyn kaf katagu, nan ma fokag goy nala'a kirsiya, nisi ma wi nalata vag kafe.

³⁸Nan ma ka kitat kagu ki nisi ka kitata kay boy sa viyuwna hiɗi sa ɦok busuwn goyn nala ɗifinna vi ɦiyda hiɗi hunayta ma lum hiɗi busuwna nan ma lum hiɗi naku.

³⁹Nan ma vulag goy hay ɓisiya; nisi ma ɦo ziyna vag gaa'a, ma ɦo liyn ma diŋiriŋŋa vag gaa kaw; nisi ma fok sligar ma takŋa goyo, ma yaw ganna vag goyo, ma hinag goy nala'a, goy nala kaɗaŋ kaɗaŋ'.

⁴⁰Nisi ma tok tuwsi kagu, nisi ma gag hiɗi goorhoyona, ma jikag hiɗi kew-gaferaŋa;

⁴¹nisi ma ŋal ziyna vag hiɗi kuta, ma hob vun ɦiyda visi katagu, goy haraŋ puɗak kir boyn ŋolo. Nan ma vat viyuwta vag goyo, hin vok ɗawn kaw nak ma wurak gurju loɗi.

⁴²Nan ma hob vun ɦiyda van katagu, nala hunayta van ma vi tuwa' goy katagu, nan ma cuk kacaf', nala nan ma li ɦiy loɗi.

⁴³Kay mige humag may gag kay buura vi wayata vagɗi, kay nak muɗan ɦiya hay slen kayni kaf, nala nan min tun poyta vag kagu, nala nak ma li ci-matta hiɗi liwista vag loɗi, din mi Bum-Sumuna Ma-Vatɗina.

⁴⁴Ki kayn nala nisi kaf sa di law ma nir-niramna ma di kag ala: Goot slum mi zlana vi su'a.

⁴⁵Naku ti goota vi sugu, ta jufa'a hiɗi gurona va' muɗ kira' bisi; naku ki bosiyog sa boyn nala kaw, sa jufaysiya hiɗi gurona visi muɗ kirsi bisi. Sugiya ti goot ta Hititta, bugiya mi sa ma Amoriyana kaw.

⁴⁶ɓasuk ta ŋolda, ta ka musi hay galag ma gulla kayn ti Samariya hiɗi guro-boyna va'a, ɓasuk ta goota ta ka musi hay galag ma jufna, kayni ti Sodoma hiɗi guro-boyna va'a.

⁴⁷Nak may poy hay hagata visi ɦawaɗi, nak may lum mi liwis ma nisi lumna ɦawaɗi, may nak muɗ tuwag liwis suwsi nisiya hay poyta vag kafe.

⁴⁸Nan ka iriya, din mi Bum-Sumuna Ma-Vatɗina, nagat Sodoma hiɗi guro-boyna va'a bay li va ma nak hiɗi gurona vag sa boyna ka lumna tuwa.

⁴⁹Kayni ti joota vi ɓasukga Sodoma: Na' ka hiɗi suburta, tin ka ka' hobaya, musi kiliŋ hay sle'ta, na'a hiɗi guro-boyna va'a, may na' min gut kuɗ sa maŋayna hiɗi sa hawnɗi.

⁵⁰Nisi muɗi joo ŋolo, nisi li slen ma liwisna vok iranu. Hay li ma nan wi kayni, nan basi irsi goyo.

⁵¹Samariya kaw gal sulukŋa vag bay li ka'a tuwa; joota vag liy ŋolo suw fa'na, liwista vagu muɗ bosiyokŋawa ɗiger suwagu.

⁵²Naku ta ka kitat kay bosiyokŋa, wulin kayni liyn asawa kagu kay ziy zulota vag yo, kuɗ sulukŋa vagu ma nak muɗ tuwag liwis hiɗi nam suwsi nisina, sulukŋa ma muɗsi ɗiger suwag naku. Muɗag zulo'o, ziyag zulota vag yo, kay nak muɗ bosiyokŋawa ɗigere.

⁵³Nan hot sa gorvona visi aya, sa gorvona vi Sodoma hiɗi guro-boyna visiya, sa gorvona vi Samariya hiɗi guro-boyna visiya, sa gorvona vagu sa ka jar sa fisina,

⁵⁴kay nak ma muɗ zulo'o, kay nak ma ziy zulota vagu, kay nak ma muɗ zulo kay slen ma nak lumna kafe, kay naku ti teŋ-irta visiya.

⁵⁵Bosiyok sa boyna, Sodoma hiɗi guro-boyna va'a ma hotay hay liyna visi ma jewna; Samariya hiɗi guro-boyna va'a ma hotay hay liyna visi ma jewna, naku hiɗi guro-boyna vagu, nigi ma hotay hay liyna vigi ma jewna kaw.

⁵⁶Hay subur-tuwta vagu, vunag may di law kat ɓasukga Sodomaɗi su?

⁵⁷Jew a joota vagu dira' pat goyo, hay li ma guro-boyna vi Aram hiɗi sa ŋuyi galgi kafna ka panagu hay galag kafe.

⁵⁸Nak ka ziy nekka vi yawta hiɗi liwista vagu. Din mi Ma-Vatɗina.

⁵⁹Kay Bum-Sumuna Ma-Vatɗina di ala: Nan ma li tagu ki nak li nala kaw, naku ta noy va ma yi kamna goyo hay li ma nak ja bonot goyo.

⁶⁰May nanu, human ma gan kay bonota van hiɗi naku hay li ma nak ay waya tuwa, nan ma jun bonota ta vatɗit hiɗi naku.

⁶¹Humag ma gag kay poyta vagu, nak ma muɗ zulo'o, hay li ma nak ma vi bosiyokŋa, sa ŋulona hiɗi sa gurayna, nan ma vulsi magu ki guro-boyna vag nala, may kuɗ bonota ta jaraytɗi.

⁶²Nan ma jun bonota hiɗi naku, nak ma wi ala nanu mi Ma-Vatɗina,

⁶³kay humag ma gag kay sle ma kalina, kay nak ma muɗ zulo'o, kay nak ma poŋ vunag kulo noŋɗi kuɗ zulota vagu, hay li ma nan ma li poora kagu kay sle ma nak lum kafna -- Din mi Bum-Sumuna Ma-Vatɗina.