Read Masana EZEKIYEL 20 Bible Online

EZEKIYEL 20 - Masana bible

EZEKIYEL 20

¹Hay buurta doogota vi til ma vaslna vi busata siɗiyata, sum sara'a jar sa maariyana vi Israyel co'o kay job Ma-Vatɗina, nisi lak gaa vokanu.

²Ma-Vatɗina ka di yoboyn tan ala:

³Goora vi sana, daŋ tam sa maariyana vi Israyel ala: Bum-Sumuna Ma-Vatɗina ka di'e: Nigi co kayni kay joban su? Nan ma hin tuwan a nigi jobanɗi, din mi Bum-Sumuna Ma-Vatɗina, ma irina.

⁴Naŋ ma ka kitat kisi su? Naŋ ma ka kitat kisi su? Goora vi sana? Naŋ ma ɗeksi goyo kay liwista vi sumaysiya.

⁵Naŋ ma di tisiya: Bum-Sumuna Ma-Vatɗina ka di ala: Hay buur ma nan vilek Israyel goyo, nan yi va kanu hiɗi ɓan kulo meɗiya tam jafna vi Yakub, nan ɗek tuwan goy kirsiya hay nagata Egipte, nan yi va kan voksiya hiɗi ɓan kulo meɗiya, nan di'e: Nanu mi Bum-Sumuna, Ma-Vatɗina vigiya.

⁶Hay buur namna kayni, nan halafsiya hiɗi ɓisi yaway kulo'o, kay nan min yawsi goy hay nagat Egipte pa, kay narsi hay nagata ta nan feka'ay goy jewe kisiya, nagata ta miira hiɗi yumda ka riŋ goy haya, nagata ta jifiy suw nagan kafta.

⁷Nan di tisiya: Liwisna ma ka nemgina nigi ma hinim goyo, muɗgi tuwgi liwis hiɗi lawayn ma waana vi Egipte noŋɗi. Nanu mi Bum-Sumuna Ma-Vatɗina vigiya.

⁸Nisi yaw kulo'o katanu, min humanɗi, sa gigekaw min noy lawayn ma waana ma nememna goyɗi; nisi min noy lawayn ma waana vi Egipte goyɗi. Nala nan fi varta kay gi ɦiyda van gaa kisiya, kay dab yam ɦiyda van goy katsi goŋ', hay nagata vi Egipte.

⁹May nan var kayni kay semda vanu, kay na' ma muɗis goy waa'a kir jaf-sum sa nisi ka lakay jarsinɗi, kir sum sa nan ɗek tuwan kirsinɗi kaw, kay kalsi ay goy hay nagat Egipte pa.

¹⁰Nan kalsi ay goy hay nagata Egipte pa, tuni voksi hay fulda.

¹¹Nan vulsi ɗota-gatta vanu, ɗeksi kay dita vanu, ma san as kay li kuɗumu kay mus iri kuɗumu kaw.

¹²Nan vulsi sabatna van kaw, ki ɗekka ta jaran hiɗi nisiya, kay nisi ma wi ala nanu mi Ma-Vatɗina ma lisi goy peldete.

¹³May jafna vi Israyel yaw kulo katanu hay fulda, nisi min tap kuɗ ɗota-gatta vanɗi, nisi noy dita van goyo, slen ma san li kuɗumu kay mus iriya hiɗi namu, buur ma sabatna vanu nisi muɗum goy waa'a suwa, nan vara kay gi ɦiyda van gaa kisiya hay fulda kay vatsi goyo.

¹⁴May nan var kayni kay semda vanu, kay semda van ma muɗ goy waa'a vok ir sum sa nan kalsi ay goy hay Egipte kirsi panɗi.

¹⁵Hay fulda lo, nan yi va kanu hiɗi ɓan kulo meɗiya ala: Nagata ta nan yi va kanu kay vulsiya, nan ma narsi haya' loɗi, nagata ta miira hiɗi yumda ka riŋ goy haya, nagata ta ŋaa'a suw naga hegen kafe.

¹⁶Kayni kay nisi noy dita van goyo, min tap kuɗ ɗota-gatta vanɗi, kay nisi muɗ sabatna van goy waa'a, kay diksi ka hini juni dok-dok tam lawayna ma waana visiya.

¹⁷May nisi muɗ kiran hawi, nan min ɓulaksi goyɗi, min cimsi goy hay fuldaɗi kaw.

¹⁸Nan di tam gurona visiya hay fulda: Tapgi kuɗ ɗota-gatta vi sumaygiɗi, vigi kuɗ dita visiɗi, muɗgi tuwgi liwis hiɗi lawayn ma waana visiɗi kaw.

¹⁹Nanu mi Bum-Sumuna, Ma-Vatɗina vigiya, tapgi kuɗ ɗota-gatta vanu, ligi kuɗ dita vanu, ŋomgita.

²⁰Ligi buur ma sabatna van goy peldete, nam ma hin jargi hiɗi nanu ti ɗekka ta sumun ma wi ala nanu mi Ma-Vatɗina Lawna vigiya.

²¹May gurona yaw kulo'o katanu. Nisi min li kuɗ ɗota-gatta vanɗi, min ŋom dita vanɗi, li kuɗa'ɗi kaw, mi slen ma san as li kuɗumu kay mus iri hiɗi namu. Nisi muɗ sabatna van goy waa'a. Nan fi varta kay gi ɦiyda van gaa kisiya, kay dab yam ɦiyda van goy katsiya hay fulda.

²²May nan yaw ɓan goy katsiya, nan var kayni kay semda vanu, kay semda van ma muɗ goy waa'a kir jaf-sum sa nan kalsi ay goy jarsi hay Egipte panɗi.

²³Hay fulda, mi nanu lo ma yi va kanu hiɗi ɓan kulo meɗiya kay mersi goy jar jaf-sumuna, kay mersi goy hay nagat tara'a tara'a.

²⁴Kay nisi min li kuɗ dita vanɗi, kay nisi noy ɗota-gatta van goyo, muɗ sabatna van goy waa'a, irsi ka juni tam lawayn ma waana vi sumaysiya.

²⁵Mi nanu lo ma vulsi ɗota-gatta hiɗi dita ta tay ŋaaɗita ta hiɗi na'a nisi as mus iriɗita.

²⁶Nan muɗsi liwisi hiɗi vulda visiya, hay li ma nisi ka ŋal gurona visi sa vuɗi jewna hay kuta, hiɗi kayni nan mini kay kalsi hay lasta, a nisi ma wi ala nanu mi Ma-Vatɗina.

²⁷Kuɗ na'ta kayni, naŋ ma law tam jafna vi Israyel, goora vi sana. Naŋ ma di tisi ala: Sumaygi ŋulanu lo, hay li ma nisi min vi kuɗanɗi. Din mi Bum-Sumuna Ma-Vatɗina.

²⁸Nan kalsi hay nagata ta nan yi va kanu hiɗi ɓan kulo meɗiya kay vul tisiya, may nisi cuk irsi kay liy ma kulo ɗiŋiriŋŋa kaf, hiɗi gu ma goɗayna kaf, kayni mi liyn ma nisi li ɗifinna visi hayamna, kayni mi liyn ma nisi mar vulda ta ɓulakan dikan haya'ta, kayni mi liyn ma nisi li ɗifinna visi ma his ŋaana haya, yam niyn ma ɗifinna goy haya kaw.

²⁹Nan di tisiya: Liyn ma ɗiŋiriŋŋa ma nigi tuɗ hayamna kayni mi marige? Nisi vulum semda ala «liyn ma ɗiŋiriŋŋa» ta-ta vaydi.

³⁰Kuɗ na'ta naŋ ma di tam jafna vi Israyel ala: Bum-Sumuna Ma-Vatɗina ka di'e: Nigi may li tuwgi liwisi ki sumaygi nala ɗisu? Nigi min muɗ tuwgi viyuw kuɗ liwisna visiɗi su?

³¹Hay li ma nigi mar vulda vigiya, hay li ma nigi ka ŋal gurona vigi goy hay kuta, nigi ka muɗ tuwgi liwisi ta-ta vaydi hiɗi lawayn ma waana vigi kaf. Nala nan Bum-Sumuna Ma-Vatɗina ma irina di ala: Nan ma hum jobta vigiɗi, nigi jafna vi Israyel.

³²Slen ma nigi ka niŋamna ma liɗi, hay li ma nigi ka di ala: Numa min muɗ ki jaf-sum segen nala, ki jaf-sum sa hay naga hena nala, numa min girif guna hiɗi hiɗiyna.

³³Nan ka iriya, din mi Bum-Sumuna Ma-Vatɗina, nan ma ti mul kigiya hiɗi gaŋeraŋa vanu, hiɗi ɓan goy meɗiya kaw, hay li ma nan ma gi ɦiyda van goy kigiya.

³⁴Nan ma cukgi ay goy jar jaf-sumuna pa, nan ma tokgi ay hay naga ma nigi meri goy hayamna pa, hiɗi gaŋeraŋa vanu, hiɗi ɓan goy meɗiya hay li ma nan ma gi ɦiyda van goy kigiya.

³⁵Nan ma nargi goy hay fulda vi sumuna, ɗawni nan ma lakgi vokanu kay ka kitata vigiya.

³⁶Ki nan ka kitata jaran hiɗi sumaygiya hay nagat Egipte nala, nan ma ka kitat jaran hiɗi nigiya kaw. Din mi Bum-Sumuna Ma-Vatɗina.

³⁷Nan ma jikgi gaa kuɗ zugulda, nan ma kalgi hay junda vi bonota.

³⁸Sa ŋel-gatta hiɗi sa ci-matna vok iranu nan ma jagi jargi goy hiɗi nisiya; nan ma kalsi ay goy hay nagata ta nisi ka lakay haya'ta pa, may nisi ma cuk hay nagata vi Israyelɗi. Nala nigi ma wi ala nanu mi Ma-Vatɗina.

³⁹May nigiya jafna vi Israyel, Bum-Sumuna Ma-Vatɗina vi Israyel ka di ala: Tuɗgiya, hin gigekaw girif lawayn ma waana valamu. May bugol kayni nigi ma human noŋɗi su? Semda van ta peldetta nigi ma muɗa' goy liwisi hiɗi vulda vigiya hiɗi lawayn ma waana vigiɗi.

⁴⁰Kay kulo kay hiɗiyta van ta peldetta, hiɗiyta ta kulo fiyok suw kafe hay Israyel, ɗawni jafna vi Israyel kaf, nigi sa min hin hay nagat kaf ma girifanu; ɗawni nan ma vigi hiɗi dikan haɓi, nan ma job slen ma vulda vigiya, vun-jaf ma jewna hiɗi vulda hiɗi slen ma nigi min lum ɗifin tanu kafe. Din mi Bum-Sumuna Ma-Vatɗina.

⁴¹Nan ma vigi hiɗi dikan haɓi ki ɗifin ma his fayna nala, hay li ma nan kalgi ayawa goy jar sumuna, hay li ma nan tokgi yigiyawa hay nagata ta nigi ay meri goy haya'ta pa, nigi ma lan goy peldete kir jaf-sumuna.

⁴²Nala nigi ma wi ala nanu mi Ma-Vatɗina, hay li ma nan ma hotgi hay nagata vi Israyel, hay nagata ta nan yi va kanu hiɗi ɓan kulo meɗiya kay vula' mi sumaygiya.

⁴³Ɗawni humgi ma gigi kay poyta vigiya, hiɗi lopna ma nigi muɗ tuwgi liwis hiɗi namna kaf; nigi ma as kay sar ir tuwgi noŋɗi, kuɗ lop ma joona kaf ma nigi lum jewna.

⁴⁴Nigi ma wi ala nanu mi Ma-Vatɗina, hay li ma nan ma li tigiya kuɗ semda vanu, may kuɗ lopna vigi ma joona hiɗi poyta vigi ta liwistaɗi, nigi jafna vi sa Israyella. Dita vi Bum-Sumuna Ma-Vatɗina.