Read Masana EZEKIYEL 21 Bible Online

EZEKIYEL 21 - Masana bible

EZEKIYEL 21

¹Ma-Vatɗina ka di yoboyn tan ala:

²Goora vi sana, muɗaŋ iraŋ hay gal ma jufna, kusaŋ yoboyn kat gal ma kayamna. Daŋ vun-jobta kat fulda ta kayamta.

³Naŋ ma di tam fulda ta gal kayamta ala: Humag yoboyna vi Ma-Vatɗina: Bum-Sumuna Ma-vatɗina ka di ala: Nanu, nan min ŋal kuta kalaf hayagu, guna vigi ma ŋulomna hiɗi ma soyna kaf na' ma ŋalam goyo, kuta ta tilekka ma tew goy noŋɗi, yam-nagat kaf ma ŋal goyo, hay kayam pa ta-ta gal gaa dab'.

⁴Nala sumun kaf ma wi ala nanu, Ma-Vatɗina, ŋal kut mi nanu, kut na'ta as tew goyɗi may.

⁵Nan di'e: Hey! Bum-Sumuna Ma-Vatɗina, sumun kayni di kan ala: San kilan dum mi law ma zuturu'u.

⁶Ma-Vatɗina ka di yoboyn tan lo ala:

⁷Goora vi sana, muɗaŋ iraŋ kat Yerusalem, kusaŋ yoboyn kat liyn ma peldetna, daŋ vun-jobta kat nagata vi Israyel.

⁸Naŋ ma di tam nagata vi Israyel ala: Bum-Sumuna di ala: nan muɗawa katsiya, nan ma pat kew-gaferaŋa vanay goy hay faara valam pa, sum sa ɗigera hiɗi sa joona sa ka jargin kaf nan ma vatsi goyo.

⁹Nan min ci sum sa ɗigera hiɗi sa joona vigi goy kafe, kuɗ na'ta kayni, nan min pat kewta vanay goy hay faara va' pa, kay cal sumuna kafe, hay kayam pa ta-ta gal gaa'a.

¹⁰Sumun kaf ma wi ala nanu Ma-Vatɗina, nan pat kewta vanayawa goy hay faara va' pa, nan ma hota' kulo loɗi.

¹¹May naŋu, goora vi sana, tiyaŋu, ki teleŋ min haw goyo nala kay yorta, naŋ ma tiy tuwaŋu goy kirsi haraŋi.

¹²Ki kayn nala hay li ma nisi joboŋawa ala, naŋ tiy kay mige ni, naŋ ma hot dit ala: Kay labar mara co'o, dik sumun kaf ma kal hay yorta, ɓam sumun kaf ma mak goyo, sutay sumun kaf ma to'o, ŋulofsi kaf ma muɗ visi bat-bat' kew-gaferaŋa ka co'o, nam coowa. Din mi Bum-Sumuna Ma-Vatɗina.

¹³Ma-Vatɗina ka di yoboyn tan ala:

¹⁴Goora vi sana, daŋ vun-jobta. Naŋ ma di ala: Ma-Vatɗina di ala: Kew-gaferaŋa, kew-gaferaŋa siyam ligadiya, tuwam goray wek-wek'.

¹⁵Siyam ligaɗay kayni kay cal sumuna, tuwam goray wek-wek kayni kay wileɗa. Lebo nay as kay li firi su? Zugulda-mulda vi goora vanu pan zugulay hegen kafe.

¹⁶Na' vuli goyo kay gora' tuwa'a, kay ɓamta ma moka'a, siya' ligaɗiya, tuwa' goriya kaw, kay sa ma min ci matna ma dur hiɗi na'a.

¹⁷Tiyaŋu, yor tuwaŋu kaw, goora vi sana, kay kewt ka calsi kayn si sumuna vanu, na' ka calsi kayn si sa ŋulona vi Israyel. Nisi vulis goy vun kew-gaferaŋa hiɗi sumuna vanu, kuɗ na'ta kayni caŋ war-digaŋ dil-dil'.

¹⁸Kay kayni ti wakka. Va ma min co bugol ɗawn mi mige la zugulda mulda ta pan segen kaf may mus ta-ta loɗi?[5] Din mi Bum-Sumuna Ma-Vatɗina.

¹⁹Naŋ hayɗini, goora vi sana, daŋ vun-jobta, caŋ ɓaŋ til-til', hin kewn calsi sem ma', sem ɦidi. Kayn ti kew ta vat sumuna, kew ta vat sumun ŋolo, na' ka jaŋ kuɗsiya.

²⁰Kay donota visi ma vat goyo, kay jor maŋayta visi voko, nan ma horsi hiɗi kewna hay vun-ziyna visi kafe. Hah! Kew-gaferaŋa koti kayni kay wileɗem kulo'o, koti kayni kay cal sumuna.

²¹Tapaŋ donota vaŋu, calaŋ hay gal gulu, calaŋ hay gal jufu, siyaŋ ma hiliw-hiliwna naŋ ma muɗum hay liyn kafe.

²²Nan hayɗini, nan min ci ɓanu, nan min cuk kacaf hay ɦiyda vanu. Din mi nanu Ma-Vatɗina.

²³Ma-Vatɗina ka di yoboyn tan ala:

²⁴Naŋu, goora vi sana, ɓiraŋ hagat ma' kay kew-gaferaŋa vi mul ma Babilon co haya; kew-gaferaŋ namna ma ma'na pete ma kali goy hay nagata ta kepta. Biraŋ va ma li ɗek-goyt kepe, naŋ ma ɓirim vun hagata ta kal hay hoyok-ziy mara kepe.

²⁵Naŋ ma ɓir hagat tara kepe kay kew-gaferaŋa ma co hay Rabba, hoyok-ziyna vi gurona vi Amon, hay Yuda kaw, hay Yerusalem, hoyok-ziy ma donona.

²⁶Kay mulla vi Babilon ka colay goy jar hagata, hay vun-hagat ma ma'na, kay yaw gireyta, nam ka ɦiwel ɓarawta, nam ka job terafimna*, nam ka sar dukka.

²⁷Hay ɓalam ma jufna va ma ŋaɓ Yerusalem kuɗ ɦayta ka'a, nisi ma lak fok-gamalana, vul hagata kay ci sumuna, pat delsi kulo hiɗi siwelda. Nisi ma lak fok-gamalan tam vun-galana, nisi ma gi damna, nisi ma gi zlaɓna kaw.

²⁸Kayni nisi ɗuwum ki girey ɦawa nala, nisi sa yi slen kisiya. May namu, nam gisi humsi kay joota visiya, kay nisi ma yawsiya.

²⁹Awa ŋaa'a! Kuɗ kayni Bum-Sumuna Ma-Vatɗina ka di'e: Kay humgi ka gigi kay joota vigiya, kay nigi pat dir jiw-zlata vigi goyo, hay li ma nigi ɗek sulukŋa vigi goyo hay lopna vigi kaf, kay humgi ka gigi kalamu, nala nam ma yawgi hiɗi ɓalamu.

³⁰May naŋu, ma muɗ slen goy waa'a, sa ma joona, yerimana vi Israyel, ma buura vaŋu coowa hay li ma joot hobawa ŋolo.

³¹Ki kayn nala Bum-Sumuna Ma-Vatɗina di'e: Jakawata ma sliys goy kaŋu, bogorayna ma sliys goy kaŋu kaw. Slen kaf muɗa, va ma yalam hoti gaana yalam ma sliys kulo'o, va ma yalam sliy kulona yalam ma hot gaa'a.

³²Bulak-goyta, ɓulak-goyta, ɓulak-goyta, kayni mi va ma nan ma li'e. Slen kaf muɗiya, kay cub mata vi nam ma kitat ka hay ɓalamu, ma nan ma vulum kitat hay ɓalamna.

³³Naŋu, goora vi sana, daŋ vun-jobta, naŋ ma di'e: Bum-Sumuna Ma-Vatɗina ka law kay sa Amonna hiɗi liwista visi ala: Kew-gaferaŋa ka cala, tuwam gori wek-wek' kay ci sumuna, kay ŋal sumun goyo, kay wileɗa.

³⁴Jar slen ma vul tuwam kirgi waa'a hiɗi yoboy ma sinna, kew-gaferaŋa ma kaagi dekdelgi goyo ki sum segen sa joon nala, nisi sa buura visi coowa kuɗ joota ta vuna' hobawa.

³⁵Hotgi kew-gaferaŋa vigi hay faara valamu, nan ma ka kitat kigiya hay liyn ma nigi ay ini hayamna pa, hay nagata vi sumaygiya.

³⁶Nan ma gi ɦiyda van goy kigiya, nan ma fo kuta vi ɦiyda vanu katgiya, nan ma vulgi goy hay ɓam sum sa ŋal liyna, sum sa lopna visi kayni kay ɓulak slen goyo.

³⁷Kut ma ŋalgi goyo, busuwna vigi ma hin hay nagata; sa humam ma gum kigi loɗi, kay nanu, Ma-Vatɗina nan daawa.