Read Masana EZEKIYEL 23 Bible Online

EZEKIYEL 23 - Masana bible

EZEKIYEL 23

³Nisi muɗ tuwsi liwisi hay Egipte, nisi muɗ tuwsi liwisi hay wayata visi pa, ɗawni sumun ay lamsi miirsiya, ɗawni sumun ay tun ɓisi kay war-digsiya, ma ay waya tuwana.

⁴Ta ŋolda ya' ala Ohola, ɓasu'ta ya' Oholiba, nisi ir manu, nisi vuɗ guro sa jufayna hiɗi guro sa boyna. Semda visi kayni, Ohola ti Samariya, Oholiba ti Yerusalem.

⁵Ohola ta ir vanta muɗ tuwa' viyuwu. Dika' dar sa cilena va'a, si sa Asiriyana sa ziysi gala'na,

⁶cuki hiɗi sligar ma tuwam zim-zimna, sa guvernera hiɗi sa ɗiger-lawta kaf, sa joriyota visi ɗut sumun goyna, sa ɓe kulumayna lakay kay kulumayna.

⁷Na' tun ŋalda va' kayn kisi nisiya, tam sa ŋulona vi gurona vi Asiriya kafe; na' muɗ tuwa' liwisi hiɗi nisi kaf sa dika' ka darsina, hiɗi lawayn ma waana visi kaf.

⁸Viyuwta va'a ta na' tun caway hiɗi na'a hay Egipte pata, na' may noya' goyɗi, kay nisi ay buri hiɗi na'a hay wayata va' pa, kay nisi tun ɓisi war-diga'a hay wayata va'a, nisi dab yam viyuwta visi goy ta'a.

⁹Kuɗ kayni nan vula'awa goy hay ɓam sa cilena va'a, goy hay ɓam gurona vi Asiriya, nisi sa na' darsi ŋolo.

¹⁰Nisiya si sa wi nalata va'a; nisi yaw gurona va' sa jufayna hiɗi sa boyna, nisi ca' goyo hiɗi kew-gaferaŋa, Arigekaw boyn ka law hiɗi semda va'a; nisi ka kitat ka'a.

¹¹Ɓasu'ta Oholiba wi kayni, na' li tuwa' joo suwa' na'a hay darta va'a, viyuwta va' suw goy kay viyuwta vi ɓasu'ta.

¹²Na' tun darta va' kay gurona vi Asiriya, sa guvernera hiɗi sa ɗiger-lawta, sa ziysi gala'na, sa gani ŋaa'a ŋolo, sa ɓe kulumayna lakay kay kulumayna, sa joriyota visi ɗut sumun goyna.

¹³Nan wi ala na' muɗ tuwa'awa liwisi, a nisi ma' pet sla'awa ti haga ta kepta,

¹⁴na' jor viyuwta va' vok lo, na' wi sumuna ka ceɗay kulo dik gulmunna, slen ma ceɗay sli sum sa Kaldeena nala, tuwam ay slawi,

¹⁵hiɗi kantina hay fursiya, hiɗi katamul ma ŋaana ɗuti kisiya; nisi kaf sli muliyan nala, sli gurona vi Babilon hiɗi Kaldee nala, hay li ma nisi ka hay nagata visiya.

¹⁶Na' tun darta va' kisiya, hay li ma ira' cuk kisi jewna, na' cuksi sum sa sunda hay Kaldee.

¹⁷Gurona vi Babilon kali kuɗa'a kay bur hiɗi na'a, nisi muɗa' liwisi hiɗi viyuwta visiya, na' muɗ tuwa' liwis hiɗi nisiya kaw, bugol kayni dika' ɓuraw goy hiɗi nisiya.

¹⁸Na' pat dir viyuwta va'awa goyo, na' pat dir nalata va'awa goyo, nala dikan ɓurawawa goy hiɗi na'a, ki dikan ɓuraway goy hiɗi ɓasu'ta nala kaw.

¹⁹Viyuwta va'a suwawa ŋolo, huma' ga' kay liyn ma na' ay waya'a, hay li ma na' ay li tuwa' viyuwu hay Egipte.

²⁰Na' tun darta va' kay sum sa puura, sa zlaɗay ki kuron nala, sa molwo ki kulumayn nala.

²¹Humag gagawa kay liwista vagu ta hay wayata vagu, hay li ma sa Egiptena ka lamag war-digagu, miira vag ma bay cuk gaana ka nemsiya.

²²Kuɗ kayni, Oholiba, Bum-Sumuna Ma-Vatɗina ka di ala: Fay tuwayawa, din mi Bum-Sumuna Ma-Vatɗina, fay tuwayawa, nan min zliy sa cilena vagu kulo katagu, nisi sa dikag ɓurawawa goy hiɗi nisiya, nan min marsi ay goy hay liyn kaf katagu.

²³Gurona vi Babilon hiɗi gurona vi Kaldee kaf, Pekod, Suwa hiɗi Kuwa, gurona vi Asiriya hiɗi nisi kaf sa joriyo'o, hiɗi sa ɗut sumun goyna, sa guvernera hiɗi sa ŋulon kaf, soje sa ŋulo sa sesi tiya, kaf ka ɓey kay kulumayna.

²⁴Nisi ka tuɗay duragu, hiɗi sle-ma-duura, keke-ma-duura hiɗi sem-kekena, hiɗi sumun tokay ŋolo, nisi ka ŋuyag hay galag kafe, maray ma ŋulona hiɗi ma gurayna kaw, hiɗi bogoray ma duura kaw, nan vul kitatawa hay ɓisiya, nisi ma ka kitat kagu kuɗ gatta visiya.

²⁵Nan gi hunayta vanawa goy kagu, nisi ma lag wasta tagu, nisi ma kaag cinagu hiɗi humag goyo, jafna vagu kew-gaferaŋa ma vatsi goyo, nisi ma yaw gurona vag sa jufayna hiɗi sa boyna, jafna vagu kut ma ŋalsiya.

²⁶Nisi ma fok sligara vag ma tagŋa goyo, nisi ma yaw ganna vag goyo.

²⁷Nan ma vat bulota vag goyo, hiɗi viyuwta vagu ta musi ta-ta, tun caw hay nagat Egipte pa; nak ma cuk irag kisi loɗi, humag ma gag kay Egipte loɗi.

²⁸Kay Bum-Sumuna Ma-Vatɗina ka di ala: Fay tuwayawa! Nan min vulag goy hay ɓam sum sa nak ka gaw hiɗi nisiya, hay ɓam sum sa nak ja jarag goy hiɗi nisiya.

²⁹Nisi ma lasag gaw gawi, slena vag ma nak mak tuwag kalamna nisi ma yawam kafe, nisi ma hinag goy nala'a, goy nala kaɗaŋ kaɗaŋ', nisi ma pat dir nalata vi viyuwta vag goyo, yawta vagu hiɗi gawlaŋga vagu.

³⁰Nisi ma lag ki kayn nala, kay nak muɗ tuwag viyuwu hiɗi jaf-sumuna, kay nak muɗ tuwag liwisi hiɗi lawayn ma waana visiya.

³¹Nak poyay hay hagata vi ɓasukga, kuɗ kayni nan tun kaway-ma-cina va' hay ɓagu.

³²Nala Bum-Sumuna Ma-Vatɗina ka di ala: Nak ma ci kaway-ma-cina vi ɓasukga, kaway-ma-cina ma beɗaya, zulu kaw, na' ma li mi va ma cenda hiɗi burahta, kay na' hobay ŋolo.

³³Nak ma hob hiɗi ɦoyta hiɗi lasta, kayni mi kaway-ma-cina vi noy-goyta hiɗi sarta. kaway-ma-cina vi ɓasukga Samariya.

³⁴Nak ma ca'a, nak ma tileka'a, nak ma to' goy pek-pek', nak ma jet miirag goyo kaw. Kay nan daawa. Din mi Bum-Sumuna Ma-Vatɗina.

³⁵Kuɗ kayni Bum-Sumuna Ma-Vatɗina di'e: Kay yak jokanawa, kay nak ganawa goy ŋoragu, nak ma ziy nekka vi yawta vagu hiɗi viyuwta vagu kaw.

³⁶Ma-Vatɗina di tanu: Goora vi sana, naŋ ma ka kitat kay Ohola hiɗi Oholiba su? Naŋ ma ɗeksi goy kirsi kay joo ma nisi lumna,

³⁷kay nisi vul tuwsiyawa hay zlata-bulota, busuwn ka vun ɓisiya; nisi li zlata-bulotawa hiɗi lawayn ma waana visiya, suw kayni lo gurona visi sa nisi vuɗantina, nisi cuksi goy hay kuta kuɗ minda visiya, kay kuta ma ŋalsiya.

³⁸Kayni mi slen ma nisi lum tanu lo: Nisi muɗ liyn ma peldetna van goy liwisi, hay buur na kep, kay muɗum goy waa'a. Nisi muɗ sabatna van goy waa'a kaw.

³⁹Nisi li gurona visi ɗifin tam lawayn ma waana, hay buur na'ta de' nisi kal kalaf hay liyna van ma peldetna, kay muɗum goy liwisi. Kayni mi sle ma nisi lum kalaf way-ziyda vanu.

⁴⁰Nisi gar sumuna sa may goy gine pana noŋo, nisi gi sunda kisiya, wulini nisi coowa, kisi nisiya nak muz tuwagawa goyo, nak set iragawa hiɗi mula, nak gan tuwagawa,

⁴¹nak musawa kay va ma buura ma jifiyna, ma tablena ka coli vokomu, urdina vanu hiɗi mula vanu nak zlaramawa kulo kalamu.

⁴²Nisi hum winekŋa vi vok ma ŋol ɦini-ɦinina hay firita, jar vokŋa vi sum nisina, sum sa Sabeena nisi marsiyay goy hay fulda pa, nisi cuk wayna hay ɓam ɓosiyom-tuwsi sa ma'na, hiɗi bogoray ma ŋaana tuni kisiya.

⁴³Nan di kay na' ta tiyof tuwa'awa hiɗi zlata-bulota ala: Na' ma tuɗ vok hiɗi viyuwta va' dok-dok su? Sa as kay co kata' su?

⁴⁴Nisi ka co kata'a ki san tuɗ kat cata gawlaŋga nala, ki kayn nala nisi ka tuɗ kat Ohola hiɗi Oholiba, boy nisi sa viyuwna.

⁴⁵May sum sa ɗigera ma ka kitat kisiya, ki san ka kitat kay boy sa li zlata-bulota nala, ki san ka kitat kay sum sa ɦok busuwn goyna nala; kay nisi li zlata-bulo'o, ɓisi goɓi hiɗi busuwna.

⁴⁶Kayni mi va ma Bum-Sumuna Ma-Vatɗin di'e: Hin sumun tok tuwsi katsiya. Nan min vulsi goy hay hiwirta hiɗi vurumta.

⁴⁷Sum sa tok tuwsi katsina ma gisi hiɗi goorhoyona, ma calsi goy hiɗi kew-gaferaŋa; nisi ma ci gurona visi sa jufayna hiɗi sa boyn goyo, nisi ma ŋal ziyna visi goy hiɗi kuta.

⁴⁸Yawta ta ka hay nagata nan ma vata' goyo, boyn kaf ma hat va'a, nisi ma li sle ma yaw ki cata vigi nala loɗi.

⁴⁹Yawta vigiya ma hot nig kigiya, nigi ma ziy nekka vi sulukŋa vi lawayn ma waana ma nigi girifimna, nala nigi ma wi ala nanu mi Ma-Vatɗina, Lawna.