Read Masana EZEKIYEL 24 Bible Online

EZEKIYEL 24 - Masana bible

EZEKIYEL 24

¹Hay buurta doogota vi til ma doogona vi busata zleeŋeta, Ma-Vatɗina ka di yoboyn tan ala:

²Goora vi sana, naŋ ma ɗo buurta kayni gaa kaŋu, buur na'ta zawni. Mulla ma Babilon ka co ŋuy Yerusalem hay buur na'ta zawni.

³Naŋ ma di law ma nir-niramna tam jaf-sum nisi sa ŋel-gatta; naŋ ma di tisi ala: Bum-Sumuna Ma-Vatɗina ka di ala: Kotaŋ dowayta, naŋ ma jaka' kulo'o, ɦok niy haya'a kaw.

⁴Naŋ ma cuk sliwn haya'a, sliw ma ŋaan kaf, gayta, bigiyta, naŋ ma hoba' hiɗi zok ma ŋaana kaw.

⁵Naŋ ma yaw fukunayna kuɗ vilekka vaŋu, naŋ ma mol guna gaa kuɗ dowayta, naŋ ma zalam ŋol wilik wilik', kay zok ma hayamna kaw ma zalis goyo.

⁶Kuɗ na'ta kayni Bum-Sumuna Ma-Vatɗina ka di ala: Joot kay hoyok-ziy ma jaŋ busuwn goyna, dowayta ta haya' hobay hiɗi seŋŋa, ta seŋŋa ma haya'na may kor goyɗi. Naŋ ma yaw sliwn goy kep kep kafe, hin mara'a kay ŋaɓta kuɗ ɦaytaɗi.

⁷Kay busuw ma nisi ɦokom goyna ka hini jarsi dok-doko; nisi ɦokom kulo kay yam hiɗiyn goy ɦawa'a, min ɦokom gaa kay nagata kay vi butuw kalamɗi.

⁸Hay ɦiyda van ta ŋolda, hay job yamda van tisiya, nan ɦoksi busuwsi kulo kay hiɗiyn ɦawa'a kaw, kay sa as vi butuw kalamɗi.

⁹Kuɗ kayni Bum-Sumuna Ma-Vatɗina di ala: Joot kay hoyok-ziy ma ɦok busuwn goyna, nan kaw nan min molsi ŋolo ki guna nala.

¹⁰Molaŋ gun yam tuwam ŋolo, ŋalaŋ kuta, zalaŋ sliwn ŋaa'a, cukaŋ mandan kuɗumu, kay zokŋa ma ŋal goyo.

¹¹Bugol kayni dowayta ta goy ɦawata naŋ ma tuna' kay kuta, kay na' ma gi kuwa, kay way ma ta'na ma loɗ goyo, kay ges ma haya'na ma yor gaa haya'a.

¹²Mak-tuwta kayn ɦawa'a, seŋŋa ma hobi haya'na as kor goyɗi, seŋŋa va' mi kuta.

¹³Liwista ka hay gesna vagu, kay nan mini kay porag goyo, may nak may muz goyɗi. Nak ma por goyo kay gesna vagɗi ta-ta nan dab yam ɦiyda van goy tag goŋ'.

¹⁴Nanu, Ma-Vatɗina, nan daawa, van kayni ma li'e, nan ma lumu; nan ma hot goy bugolanɗi, nan ma wisi hawsiɗi, nan ma hot yor tuwanɗi kaw. Nisi ma ka kitat kagu kuɗ poyta vagu hiɗi lopna vagu. Din mi Bum-Sumuna Ma-Vatɗina.

¹⁵Ma-Vatɗina ka di yoboyn tan ala:

¹⁶Goora vi sana, wulin kayni na' ta kiraŋ jifiy ŋolta nan min sla' goy kaŋ yilaŋ', naŋ ma ti do'olɗi, naŋ ma tiyɗi, zimiy ma kiraŋŋa ma jaŋ goy noŋɗi.

¹⁷Yoraŋ tuwaŋu, ti do'olla ki sumun ti do'ol kay sa mitin naɗi, junaŋ katamul kaŋu, cukaŋ tuguru seŋu, kusuɓ jiweraŋɗi, ti tina vi sum segenɗi kaw.

¹⁸Nan law tam sumun hay graw culumta, cata van mit hay vulatit may. Hay grawta vi buurta ka'ta, nan li kuɗ va ma diy tanu.

¹⁹Sumun di tanu: Sle ma naŋ lumna kayni naŋ may duma' cawam goyɗi su?

²⁰Nan hot dit tisiya: Ma-Vatɗina di yoboyn tan ala:

²¹Daŋ tam jafna vi Israyel: Bum-Sumuna Ma-Vatɗina ka di ala: Wulin kayni liyna van ma peldetna nan min muɗum goy puru, mi liyn ma subur-tuwta vi donota vigiya, liyn ma jibetta vi irgiya, mi va ma nigi minim ŋolla, guro-jufayna hiɗi guro-boyna vigi sa nigi hinsi bugolgina kew-gaferaŋa ma calsi goyo.

²²Nigi ma li ki nan li nala, nigi ma kusuɓ jiwergiɗi, nigi ma ti funa vi sum segenɗi,

²³nigi ma ɗut katamulla vigi kigiya, nigi ma cuk tuguruna vigi segiya, nigi ma cuk tokŋaɗi, nigi ma tiyɗi; may nigi ma to sutaygiya kuɗ joota vigiya, nigi ma yor tuwgi jar-tuwgiya.

²⁴Ezekiyel ma lin mi dekga tigiya, nigi ma li kaf ki Ezekiyel li nala. Hay li ma slen kayni coowa, nigi ma wi ala nanu mi Bum-Sumuna Ma-Vatɗina.

²⁵May naŋu, goora vi sana, hay buur ma nan ma yaw sle ma vulsi donot goyo, sle ma vulsi firita hiɗi ganta visiya, jibetta vi irsiya hiɗi va ma diksi minim ŋolla, guro sa jufayna hiɗi guro-boyna visiya,

²⁶hay buur namna ɗawni, sa ma pir goy kuɗsina ma co taŋu kay vaŋ labara.

²⁷Hay buur namna ɗawni, vunaŋ ma mal goyo hiɗi sa ma pir goy kuɗsina, naŋ ma ɓaka, naŋ ma li dugun loɗi; naŋ ma li mi va ma ɗekka tisiya, nisi ma wi ala nanu mi Ma-Vatɗina may.