Read Masana EZEKIYEL 25 Bible Online

EZEKIYEL 25 - Masana bible

EZEKIYEL 25

¹Ma-Vatɗin ka di yoboyn tan ala:

²Goora vi sana, muɗaŋ iraŋ kat sa Amonna, daŋ vun-jobta katsiya.

³Naŋ ma di tam sa Amonna ala: Humgi yoboyna vi Bum-Sumuna Ma-Vatɗina. Kayni mi va ma Bum-Sumuna Ma-Vatɗin dumna: Kay nigi cen ala haha! Kuɗ liyn ma peldetna vanu, hay li ma nisi muɗum goy liwisi, nigi cen kuɗ nagata vi Yuda hay li ma nisi kali goy gorvo'o,

⁴kuɗ kayni fay tuwayawa! Nan min vulgi mi gurona vi nagat ta gal kuɗuwta; nisi ma in guruna visi jargiya, nisi ma in ziyna visi jargiya, vuɗ-guna vigi tum ɗawn si nisiya, ci miira vigi ɗawn si nisiya.

⁵Rabba nan ma muɗa' mi liyn ma lamgan ti haya, nagata vi sa Amonna nan ma muɗa' mi liyn ma fok-dimin mol haya. Nala nigi ma wi ala nanu mi Ma-Vatɗina.

⁶Kay kayni mi va ma Bum-Sumuna Ma-Vatɗin dumna: Kay nigi ci ɓigi til-til', dab segi gaa rim-rim' kaw, kay nigi li firiya, nigi pan nagata vi sa Israyel hiɗi dikgi noŋ kafe,

⁷kuɗ kayni fay tuwayawa! Nan meɗ ɓan goy kigiya, nan min vulgi goy tam jaf-sumuna kay nisi ma vurumgiya; nan min kaagi segi goy jar jafna vigiya, nan min vatgi goy hay nagata, nan min cigi goyo. Nala nigi ma wi ala nanu mi Ma-Vatɗina.

⁸Ki kayn nala Bum-Sumuna Ma-Vatɗina ka di ala: Kay sum sa hay Seyir hiɗi Mowab ka di ala: Lakŋi mi ziyna vi Yuda ɗisu, nam muɗi ki jaf-sum segen nala kaw.

⁹Kuɗ kayni nan min mal vun-nagata vi Mowab goyo, nan min yaw hoyok-ziyna va'a, hay vunam hen pa ta-ta hay vunam hen goŋ', hoyok-ziy ma sem nagat suburi kuɗumna, Bet-Yesimot, Baal-Mewon hiɗi Kiryatayim; nan min malam vunam goyo, mi gurona vi nagata ta gal kuɗuwta,

¹⁰nan mal vun nagat goyo, mi gurona vi nagat ta gal kuɗuwta, sa tuɗ dur gurona vi Amon, nan min vul nagat misi nisiya, kay a gurona vi Amon ma li ŋaɓay jar jaf-sumun loɗi.

¹¹Nan min ka kitata van kay sa Mowabna, nala nisi ma wi ala nanu mi Ma-Vatɗina.

¹²Ki kayn nala Bum-Sumuna Ma-Vatɗina di'e: Kay mige sum sa Edomna job yisi kat jafna vi Yuda, nisi kal tuwsi hay joota hay li ma nisi job yisiya,

¹³kuɗ kayni Bum-Sumuna Ma-Vatɗina ka di ala: Nan min meɗ ɓan goyo kat sum sa Edomna, sumuna hiɗi farayna kaw nan min cisi goyo, nan min vatsi goyo tun caway hay Dedan pa, ta-ta hay Teman; kew-gaferaŋa ma vatsi goyo.

¹⁴Nan ma job yan kat sum sa Edomna, hiɗi ɓam sumuna vanu sa Israyella; nisi ma hob vun ɦiyda vanu hiɗi purcakka kat sa Edomna, nisi ma wi job-yamda van tisiya. Din mi Bum-Sumuna Ma-Vatɗina.

¹⁵Ki kayn nala Bum-Sumuna Ma-Vatɗina di ala: Kay sum sa Filistina job yisiya, nisi job yisi hiɗi panta hiɗi diksi noŋ kafe, hay gawta visi ta vatɗita nisi mini ɓulak slen kafe.

¹⁶Kuɗ kayni, Bum-Sumuna Ma-Vatɗina ka di ala: Fay tuwayawa, nan min min meɗ ɓan goy kat sa Filistina, nan vat sa Keretiyen goyo[7] caw sa hin kel niy-lumna nan min vatsi goyo.

¹⁷Nan min job yan katsiya hiɗi purcakka ta ŋolda. Nisi ma wi ala nanu mi Ma-Vatɗina, hay li ma nan hob vun ɦiyda vanawa katsiya.